Read Dagbani Jɔn 18 Bible Online

Jɔn 18 - Dagbani bible

Jɔn 18

¹Yisa ni daa naag’ o wunsuhigu ŋɔ puuni yɛtɔɣa ŋɔ, o min’ o nyaandoliba daa yimi chaŋ ti du Kidirɔn kulibɔŋ duli nti kpe tihi pu’ shɛli din daa do nimaani la ni.

²Judas ŋun daa yi o nyaaŋa la daa mi tihi puu maa ni, dama Yisa min’ o nyaandoliba daa yi kul chanila nimaani waawaayili.

³Lala zuɣu ka Judas daa chaŋ ti zaŋ maligumaaniba kpamba mini Farisiinim’ ni daa tim tɔbbi’ shɛb’ mini Naawuni jɛmbu duu tuun’ shɛb’ la pa omaŋ’ zuɣu; ka bɛ bo firilanim’ mini buɣim mokpala ni bidibbina n-kari Yisa naba nimaani.

⁴Yisa ni daa pun mi binshɛɣukam zaa din yɛn niŋ o maa zuɣu ka o daa chaŋ ti tuhi ba soli bɔhi ba, “Ŋuni ka yi bɔra?”

⁵Ka bɛ yɛl o, “Yisa Nazarɛt nir’ la ka ti bɔra.” Ka Yisa yɛli ba, “Mani m-bɔŋɔ.” Ka Judas ŋun yi o nyaaŋa maa ʒiɛya m-pahi niriba maa zuɣu.

⁶Yisa ni daa kul yɛli ba, “Mani m-bɔŋɔ maa, ka bɛ tiŋsi lab’ nyaaŋa ti lu tiŋa.”

⁷Ka Yisa lan bɔhi ba, “Ŋuni ka yi bɔra?” Ka bɛ yɛl’ o, “Yisa Nazarɛt nir’ la ka ti bɔra.”

⁸Ka o yɛli ba, “Ka mami m pun yɛli ya ni mani m-bɔŋɔ; dinzuɣu yi yi bɔrila mani, yin’ chɛ ka bɛmbɔŋɔnim’ zaa chaŋ.”

⁹O daa yɛlila lala ni di chɛ ka o ni daa pun yɛli shɛm la niŋ pali. O ni daa yɛli shɛm maa m-bɔŋɔ: “M Ba, a ni daa zaŋ ninvuɣ’ shɛb’ ti ma la, m bi chɛ ka bɛ ni yino bɔrigi.”

¹⁰Di saha ka Saimɔn Pita ŋun daa mali takɔb’ la ŋooi li n-chɛ n-shɛligi maligumaaniba zuɣulan’ dabili nudirigu tibili bahi. Dabili maa yuli n-daa booni Malikus.

¹¹ Ka Yisa yɛli Pita, “Labisim’ takɔbi maa su di tɔɣu ni!” Ka bɔh’ o, “N di nyu pipi’ shɛli m Ba ni zaŋ ti ma la ni binnyurigu maa?”

¹²Di saha ka tɔbbihi mini bɛ sapashini ni Naawuni jɛmbu duu tuumba daa gbaai Yisa n-lo o mihi.

¹³Bɛ daa tuui zaŋ o tahila Annas sani, dama Annas daa nyɛla Kaiafas ŋun daa nyɛ maligumaaniba zuɣulana di yuuni maa la deemba.

¹⁴ Kaiafas maa n-daa nyɛ ŋun yɛli Yɛhudianim’ ni di nyɛla talahi ni ninvuɣ’ yino kpi sokam zaa zuɣu la.

¹⁵Ka Saimɔn Pita mini Yisa nyaandoliba ni so daa doli Yisa chaŋ. Ka maligumaaniba zuɣulan’ maa ni daa mi nyaandol’ ŋuni maa zuɣu daa chɛ ka ŋun’ doli Yisa kpe maligumaaniba zuɣulan’ maa yiŋ dundɔŋ’ ni.

¹⁶Ka Pita ŋun’ daa kpalim ʒe samban’ dunol’ ni. Ka maligumaaniba zuɣulan’ maa ni daa mi nyaandol’ so maa daa yi nti suhi soli yili maa ni bipuɣin’ so ŋun daa guli dunoli la sani n-zaŋ Pita kpe.

¹⁷Ka yili maa ni bipuɣiŋga ŋun daa guli dunoli maa bɔhi Pita, “A pala doo ŋɔ nyaandoliba ni yino?” Ka Pita garigi yɛl’ o, “M pala o nyaandola.”

¹⁸Yili maa ni bihi mini Naawuni jɛmbu duu tuumba maa daa malila sala buɣim zali ʒiɛya wuɣisira, dama wari n-daa be; ka Pita gba daa ʒe bɛ sani n-wuɣisiri buɣim maa.

¹⁹Ka maligumaaniba zuɣulan’ maa daa bɔhi Yisa bɔhigu n-vihir’ o ni o baŋ o nyaandoliba min’ o wuhibu yɛla.

²⁰Ka Yisa garigi yɛl’ o, “N wuhirila niriba palɔni, ka kul wuhiri Yɛhudianim’ jɛmbu duri ni mini Naawuni jɛmbu duu puuni luɣ’ shɛŋa Yɛhudianim’ ni laɣindi la. N na ʒi n-yɛli shɛli ashilɔni.

²¹Ka wula ka a bɔhi ma lala? Bɔhimila bɛn wum n wuhibu maa m-baŋ n ni yɛli ba shɛm, dama bɛ mi n ni yi yɛri ba shɛm.”

²²Yisa ni daa yɛl’ lala maa, ka Naawuni jɛmbu duu tuumba bɛn ʒe nimaani ni yino lab’ o tapaɣa ka bɔh’ o, “Lala ka a garigi maligumaaniba zuɣulan’ maa?”

²³Ka Yisa yɛl’ o, “N yi yɛlila din bi tuhi, nyin’ wuhim’ di ni nyɛ shɛli; ka n yi yɛlila din tuhi, di chaŋ wula ka a ŋme ma?”

²⁴Ka Annas daa chɛ ka bɛ lo o mihi n-zaŋ o tahi maligumaaniba zuɣulan’ Kaiafas sani.

²⁵Di saha maa Saimɔn Pita daa ʒiɛmi wuɣisiri buɣim. Ka bɛ bɔh’ o, “A gba pala o nyaandoliba ni yino?” Ka o daa chihi yɛli, “M pala o nyaandola.”

²⁶Ka maligumaaniba zuɣulan’ yiŋbihi ni yino ŋun daa nyɛ Pita ni daa chɛ n-shɛligi so tibili la dɔɣim bɔh’ o, “N di bi nya a o sani tihi puu la ni?”

²⁷Ka Pita lan chihi yaha; ka nolɔɣu dii kum.

²⁸Ka bɛ daa zaŋ Yisa Kaiafas yiŋ’ maa ni n-tahi Gomna yiŋa asibaasi. Bɛmaŋmaŋ’ daa bi saɣi doli kpe Gomna yiŋ’ maa ni, dama bɛ daa bi bɔri ni bɛ tum birigi bɛ kali din ni chɛ ka daɣiri tab’ ba ka bɛ ku tooi di Yaɣigari Chuɣu bindirigu.

²⁹Lala zuɣu ka Gomna Pailɛt maŋmaŋ’ daa yina ti bɔhi ba, “Yi ni tahi do’ so ŋɔ na taali lee nyɛla dini?”

³⁰Ka bɛ garigi yɛl’ o, “O yi di pala ŋun tum taali, ti naan ku tah’ o a sanna.”

³¹Ka Gomna Pailɛt yɛli ba, “Ka dindina zaŋmiy’ o chaŋ ti doli yimaŋmaŋ’ zaligu soli kar’ o saria.” Ka Yɛhudianim’ maa yɛl’ o, “Ti ka soli ni ti ku nira.”

³² Dimbɔŋɔ daa niŋmi ni di chɛ ka Yisa ni daa yɛli shɛm zaŋ chaŋ kum shɛli ŋun’ Yisa ni ti yɛn kpi la polo yɛla niŋ pali.

³³Ka Gomna Pailɛt daa lab’ kpe saria karibu shee maa ka boli Yisa na ti bɔh’ o, “A nyɛla Yɛhudianim’ Naa?”

³⁴Ka Yisa garigi bɔh’ o, “Amaŋmaŋ’ n-kul bɔhi ma lala bee shɛba n-yɛl’ a n yɛla lala?”

³⁵Ka Gomna Pailɛt bɔh’ o, “Yɛhudia nira n-nyɛ ma? Amaŋmaŋ’ niriba mini maligumaaniba kpamba n-zaŋ a tahi n sanna! Tuumbiɛ’ bɔ ka a lee tum?”

³⁶Ka Yisa yɛl’ o, “N nam pala dunia ŋɔ nam. N nam yi di nyɛla dunia ŋɔ nam, n niriba naan zabi n zuɣu ka so ku tooi zaŋ ma niŋ Yɛhudianim’ nuu ni. Amaa n nam pala dunia ŋɔ nam.”

³⁷Ka Gomna Pailɛt bɔh’ o, “Ka daɣila a nyɛla naa?” Ka Yisa garigi yɛl’ o, “A ni yɛli shɛm maa n-nyɛ li. Bɛ daa dɔɣi ma dunia ŋɔ ni ni n dila yɛlimaŋli shɛhira. Ka ŋunkam suhu ye yɛlimaŋli zuɣu wumdi n yɛligu.”

³⁸Ka Gomna Pailɛt bɔh’ o, “Yɛlimaŋli maa lee nyɛla dini?” Gomna Pailɛt ni daa yɛli shɛm ŋɔ nyaaŋa ka o lan yi Yɛhudianim’ maa sani ti yɛli ba, “M bi nya o taali baabiɛla.

³⁹Amaa yi mali kali din ti ma soli ni n yihi dansarika yino so yi ni bɔri bahi Yaɣigari Chuɣu puhibu saha; dinzuɣu yi bɔri ni n yihi Yɛhudianim’ Naa maa bahi?”

⁴⁰Ka bɛ daa lan mɔhi vuri pam yɛli, “Pa doo ŋɔ ka ti bɔri ni a yihi bahi. Barabas ka ti bɔri ni a yihi bahi!” Barabas daa nyɛla ŋmɛnditoli.