Read Dagbani Jɔn 19 Bible Online

Jɔn 19 - Dagbani bible

Jɔn 19

¹Di saha ka Gomna Pailɛt daa chɛ ka bɛ fiɛb’ Yisa.

²Ka tɔbbihi daa zaŋ gɔhi n-wuɣi zuɣupiligu zaŋ pili Yisa, ka zaŋ kpar’ ʒiɛɣu yɛl’ o,

³ka gbaag’ o ansarisi malibu yɛra, “Ti puhir’ a Yɛhudianim’ Naa!” Ka ŋmɛr’ o nutala.

⁴Ka Gomna Pailɛt daa lan yi nti yɛli Yɛhudianim’ maa, “Nyamiya, n yɛn zaŋ o mi yina nti wuhi ya ka yi baŋ ni m bi nya o taali baabiɛla.”

⁵Ka Yisa daa yina n-na kul yɛla kpar’ ʒiɛɣu la, ka pili gɔhi zuɣupiligu maa. Ka Gomna Pailɛt daa yɛli ba, “Nyamiya doo maa!”

⁶Maligumaaniba kpamba mini Naawuni jɛmbu duu tuumba ni daa nya o maa bɛ daa kuhimi yɛli, “Kpahim’ o tabili dapulli zuɣu! Kpahim’ o tabili dapulli zuɣu!” Ka Gomna Pailɛt yɛli ba, “Yimaŋmaŋ’ zaŋmiy’ o chaŋ ti kpahi tabili dapulli zuɣu! Dama man’ bi nya o taali baabiɛla.”

⁷Ka Yɛhudianim’ maa yɛl’ o, “Ti mali zaligu shɛli din wuhiri ni o simdi kum, o ni yɛli ni o nyɛla Naawuni Bia la zuɣu.”

⁸Gomna Pailɛt ni daa wum bɛ ni yɛli shɛm maa ka dabiɛm maan gbaag’ o pahi;

⁹ka o lan labi kpe saria karibu shee maa ti bɔhi Yisa, “Tiŋkani ka a yina?” Ka Yisa bi garig’ o shɛli.

¹⁰Ka Gomna Pailɛt daa lan bɔh’ o, “A ku garigi ma? A bi mi ni m mali yiko din ni chɛ ka bɛ kpah’ a tabili dapulli zuɣu, ka lan mali yiko din ni tooi tilig’ a?”

¹¹Ka Yisa garigi yɛl’ o, “A ku tooi nya di yiko, ka pa ni Naawuni n-ti a li; dinzuɣu ninvuɣ’ so ŋun zaŋ ma niŋ a nuu ni ŋɔ daalahichi galisi gar’ a dini.”

¹²Di saha zaŋ chana, ka Gomna Pailɛt daa lo nia ni o bahi Yisa, amaa ka Yɛhudianim’ maa kuhi yɛl’ o, “A yi bahi doo ŋɔ a pala Naa Siiza sima, dama ŋunkam zaŋ omaŋ’ leei naa lola Naa Siiza zaɣ’ biɛɣu!”

¹³Gomna Pailɛt ni daa wum yɛtɔɣa ŋɔ o daa zaŋla Yisa yihina nti ʒin’ o saria karibu ʒiishee din nyɛ luɣ’ shɛli bɛ ni booni Gabata Hiburuli ni la. Di gbinni nyɛla luɣ’ shɛli bɛ ni zaŋ kuɣa ŋme m-malimali.

¹⁴Di daa nyɛla Yaɣigari Chuɣu dazɔhigu dali kaman agbaa saha, ka o yɛli Yɛhudianim’ maa, “N-nyɛ yi Naa maa!”

¹⁵Ka bɛ duhi bɛ yee yɛli, “Kum’ o! Kum’ o! Kpahim’ o tabili dapulli zuɣu!” Ka Gomna Pailɛt bɔhi ba, “N kpahimi yi Naa maa tabili dapulli zuɣu?” Ka maligumaaniba kpamba daa garigi yɛl’ o, “Ti ka naa pahila Naa Siiza!”

¹⁶Di saha ka o daa zaŋ o ti ba ni bɛ ti kpah’ o tabili dapulli zuɣu.

¹⁷Ka bɛ daa zaŋ Yisa chaŋ. Ka Yisa daa ʒi omaŋmaŋ’ dapulli maa hal ti paai luɣ’ shɛli din yuli booni Goligɔta Hiburuli ni la. Di gbinni nyɛla Zuɣuŋmaŋ Shee.

¹⁸Nimaani ka bɛ daa kpah’ o tabili dapulli maa zuɣu, ka daa kpahi niriba ayi gba tabili dapula n-zaŋ sa m-pahi Yisa zuɣu: Yino o nudirigu polo, ŋun’ la mi o nuzaa polo, ka Yisa daa be bɛ sunsuuni.

¹⁹Gomna Pailɛt daa sab’ sabbu shɛli tabili Yisa dapulli maa zuɣu. Di ni daa sab’ shɛm m-bɔŋɔ: “Yisa Nazarɛt nira ŋun nyɛ Yɛhudianim’ Naa la m-bɔŋɔ.”

²⁰Di daa sabila Hiburuli ni mini Latinli ni ni Giriikili ni. Ka Yɛhudianim’ pam daa karim di ni sab’ shɛm maa, dama bɛ ni daa kpahi Yisa tabili dapulli zuɣu luɣ’ shɛli maa daa mirila tiŋ’ maa.

²¹Ka Yɛhudianim’ maligumaaniba kpamba daa yɛli Gomna Pailɛt, “Di sabi ni Yɛhudianim’ Naa la m-bɔŋɔ, amaa sabimila, ‘Doo ŋɔ yɛliya ni o nyɛla Yɛhudianim’ Naa.’ ”

²²Ka Gomna Pailɛt yɛli ba, “N ni pun sab’ shɛm maa n-ni zani!”

²³Tɔbbihi maa ni daa kpahi Yisa tabili dapulli maa zuɣu bɛ daa zaŋla o binyɛra m-pirigi li ʒii bunahi, ka bɛ zaa zaŋ yimyim, ka daa bɔri ni bɛ niŋ o binyɛr’ tital’ la gba lala. Amaa o binyɛr’ titali maa din’ daa ka shɛrimia, di daa kul wuɣila di zuɣusaa polo hal ti siɣi di tiŋli.

²⁴ Dinzuɣu ka bɛ daa yɛl’ taba, “Di chɛliya ka ti chee’ li, amaa chɛliya ka ti tola tɛte n-nya ŋun yɛn di li.” Dimbɔŋɔ daa niŋmi ni di chɛ ka Naawuni Kundi ni yɛli shɛm la niŋ pali. Di ni yɛli shɛm maa m-bɔŋɔ: “Bɛ pirigi m binyɛra ti taba, ka zaŋ m binyɛr’ titali mi to tɛte.” Lala ka tɔbbihi maa daa shiri niŋ.

²⁵Di saha maa Yisa ma Mariama min’ o tizo Mariama ŋun daa nyɛ Klɔpas paɣa la ni Mariama ŋun daa yi Magdala na la daa ʒiɛla Yisa dapulli maa gbini.

²⁶Yisa ni daa nya ka o ma min’ o ni daa yuri nyaandol’ so la ʒe nimaani maa, ka o yɛl’ o ma, “N-nyɛ a bia!”

²⁷Ka yɛl’ o nyaandola maa mi, “N-nyɛ a ma!” Di saha maa zaŋ chana, ka nyaandola maa daa zaŋ Yisa ma maa mali kul’ o yiŋa.

²⁸ Dimbɔŋɔ nyaaŋa Yisa ni daa baŋ ni binshɛɣukam niŋya naai maa ka o daa yɛli, “Kɔnyuri mali ma.” O daa yɛlila lala ni di chɛ ka Naawuni Kundi ni yɛli shɛm la niŋ pali.

²⁹La’ shɛli daa ʒe nimaani ka komihigu pali li, ka bɛ daa zaŋ gumdi tim di ni n-zaŋ taaŋkɔro gbab’ li n-zaŋ tiri ha n-niŋ o nol’ ni.

³⁰Ka Yisa daa deei komihigu maa ka yɛli, “Di naaya!” Ka silim o zuɣu tiŋa n-dii bahi.

³¹Dindali maa ni daa nyɛ Vuhim Dabisili dazɔhigu dali zuɣu ka bɛ daa bi bɔri ni bɛ ni kpahi shɛb’ tabili dapula zuɣu la kpalim pa dapula maa zuɣu Vuhim Dabisili dali. Dama Vuhim Dabisili din daa kanna maa daa nyɛla Vuhim Dabisi’ tibisili. Lala zuɣu ka Yɛhudianim’ daa suhi Gomna Pailɛt ni o bahim’ tɔbbihi noli ka bɛ kab’ bɛ ni kpahi shɛba n-tabili dapula zuɣu maa gbaya, ka di chɛ ka bɛ kpi ka bɛ siɣisi ba na ti sɔɣi.

³²Dinzuɣu ka tɔbbihi daa chaŋ ti kabi bɛ ni daa kpahi niriba ayi shɛb’ tabili dapula zuɣu pahi Yisa zuɣu la ŋun daŋ tooni min’ o kpee la gbaya;

³³amaa ka bɛ daa ti paai Yisa sani n-nya ka o pun kpimi, dinzuɣu ka bɛ daa bi kabi ŋun’ gbaya.

³⁴Amaa ka tɔbbihi maa ni yino daa zaŋ kpani kuhi Yisa luɣili, ka ʒim mini kom dii zɔri yirina.

³⁵Ŋun daa nya li ni o nini n-yɛl’ li ni yi niŋ yɛda. O yɛligu maa mi nyɛla yɛlimaŋli, ka o mi ni di shiri nyɛla yɛlimaŋli.

³⁶ Dimbɔŋɔnim’ daa niŋmi ni di chɛ ka Naawuni Kundi yɛligu niŋ pali. Di ni yɛli shɛm m-bɔŋɔ: “Hal o kɔb’ yini gba ti ku kabi.”

³⁷ Naawuni Kundi ni luɣ’ shɛli lan yɛli, “Bɛ ni ti lihiri bɛ ni daa zaŋ kpani kuhi so la.”

³⁸Dimbɔŋɔ nyaaŋa ka Yisifu ŋun daa nyɛ Arimatia tiŋbia ka nyɛ Yisa nyaandola ashilɔni Yɛhudianim’ zɔbu zuɣu la daa chaŋ Gomna Pailɛt sani nti suh’ o soli ni o chɛ ka o zaŋ Yisa ti sɔɣi, ka Gomna Pailɛt daa saɣi. Ka o daa chaŋ ti zaŋ o.

³⁹ Ka Nikɔdimus ŋun daa chaŋ Yisa sani yuŋ la gba daa bo mɛɛr din to kaman yabiga la mini bɛ ni booni ti’ shɛli aloosi la sum gari taba n-zaŋ na. Di tibisim daa nyɛla kaman kilɔgiram pihita laasabu.

⁴⁰Ka bɛ daa zaŋ Yisa n-zaŋ mɛɛr maa mini aloosi tia sum maa n-niŋ o, ka bo bimpiɛlli niŋ o kaman Yɛhudianim’ kum sɔɣibu kali ni daa nyɛ shɛm.

⁴¹Pu’ shɛli daa do m-miri bɛ ni daa kpahi Yisa tabili dapulli zuɣu luɣ’ shɛli maa, ka sil’ pal’ shɛli bɛ ni daa na ʒi n-sɔɣ’ so di ni do puu maa ni.

⁴²Ka dindali maa ni daa nyɛ Yɛhudianim’ Vuhim Dabisili dazɔhigu dali zuɣu daa chɛ ka bɛ zaŋ Yisa sɔɣi di ni, dama siliga maa shee daa bi wɔɣ’ ni nimaani.