Read Dagbani Jɔn 2 Bible Online

Jɔn 2 - Dagbani bible

Jɔn 2

¹Dimbɔŋɔ nyaaŋa daba ata dali ka so daa ti niŋdi amiliya Galili tiŋgbɔŋ ni tiŋkpan’ shɛli din yuli booni Kɛna la. Yisa ma daa be amiliya maa ni.

²Ka bɛ daa boli Yisa min’ o nyaandoliba gba ni bɛ ka amiliya maa ni na.

³Ka amiliya yilinim’ maa wain daa ti pooi ba, ka Yisa ma yɛl’ o, “Bɛ lan ka wain din nyura.”

⁴Ka Yisa yɛl’ o, “M ma, ka wula ka a yɛl’ ni n niŋ? N saha na bi paai.”

⁵Ka o ma daa ŋmaligi yɛli yili maa ni bihi, “O yi ti yɛli ya ni yi niŋm’ shɛlikam, yin’ niŋmiya li”.

⁶Yɛhudianima adiini kali soli dolibu puuni kɔsins’ ayɔbu daa ʒe nimaani bɛ ni paɣibu zuɣu, ka di zaa zaɣ’ yiniyini daa naan tooi deei ko’ guŋgɔna ayɔbuyɔbu bee ayopɔinpɔin.

⁷Ka Yisa daa ti yɛli yili maa ni bihi maa, “Niŋmiya kom pali sinsi ŋɔ.” Ka bɛ daa niŋ kom pali di zaa ha nti paai di naŋgbanyɛra tarisi.

⁸Di saha ka o daa yɛli ba, “Pumpɔŋɔ toomiya li ti ti aŋgo zo.” Ka bɛ tooi li ti ti o.

⁹Ka aŋgo zo maa vooi ko’ shɛli din leei wain maa ka bi baŋ di ni yi shɛli na, amaa yili maa ni bihi bɛn daa tooi kom maa bɛn’ daa mi. Ka o daa boli aŋgo na

¹⁰ti yɛl’ o, “Amiliya lɔbu ni sokam daŋdila wain viɛlli tibu pɔi, ka niriba yi ti nyu n-tiɣi, di saha ka bɛ naanyi zaŋdi wain piti na, amaa nyin’ zaŋla wain nyaɣisili sɔɣi hal ni pɔŋɔ!”

¹¹Dimbɔŋɔ n-nyɛ Yisa ni daa tuui wuhi shihir’ shɛli ka di wuhi o yiko ni nyɛ shɛm, ka o nyaandoliba daa niŋ o yɛda. Galili tiŋgbɔŋ ni tiŋkpan’ shɛli din yuli booni Kɛna la ka o daa wuhi shihirili maa.

¹² Dimbɔŋɔ nyaaŋa ka o min’ o mabihi ni o ma ni o nyaandoliba daa chaŋ Kapɛrinium n-daa ti niŋ daba ayi nimaani.

¹³ Yɛhudianim’ Yaɣigari Chuɣu puhibu daa ti miri, ka Yisa daa chaŋ Jɛrusalɛm

¹⁴ti kpe Naawuni jɛmbu duu n-nya ka naɣikɔhiriba mini piɛkɔhiriba ni ŋmaŋkɔhiriba be di puuni m-pahi laɣitaɣiriba bɛn ʒi bɛ teebuya gbini.

¹⁵Ka o daa zaŋ gabiga m-pɔripɔri li n-zaŋ kari bɛ mini bɛ biŋkɔbiri maa zaa yihi Naawuni jɛmbu duu maa ni, ka daai laɣitaɣiriba la teebuya maa luhi n-kpahi bɛ liɣiri bahi.

¹⁶Ka daa yɛli ŋmaŋkɔhiriba la mi, “Zaŋmiya yi binyara yi! Di zaŋya m Ba duu leei daa!”

¹⁷ Ka o nyaandoliba daa teei di ni daa sab’ yɛli shɛm la yɛla. Di ni daa sab’ shɛm maa m-bɔŋɔ: “Yaa n Duuma Naawuni, n suhu zaa kul yɛla a jɛmbu duu zuɣu, ka di yɛla kul nyamdi n ni.”

¹⁸Di saha ka Yɛhudianim’ daa bɔh’ o, “Shihir’ bɔ ka a lee yɛn zaŋ wuhi ti ka di wuhi ni a mal’ soli ni a niŋ a ni niŋdi shɛm ŋɔ?”

¹⁹ Ka Yisa garigi yɛli ba, “Wurimmiya Naawuni jɛmbu duu ŋɔ, ka n lan labi me li zali daba ata sunsuuni.”

²⁰Ka Yɛhudianim’ maa yɛl’ o, “Yuun’ pihinahinaayɔbu ka bɛ daa zaŋ me duu ŋɔ, ka nyin’ ti yɛli ni a ni labi me li zali daba ata sunsuuni?”

²¹Amaa o niŋgbuŋ din nyɛ Naawuni jɛmbu duu ŋmahinli la yɛla ka o daa yɛri maa.

²²O ni daa ti neei kum ni la nyaaŋa ka o nyaandoliba teei ni o daa pun yɛli yɛlli ŋɔ zali; ka daa niŋ Naawuni Kundi mini Yisa ni daa yɛli yɛtɔɣ’ shɛŋa zaa yɛda.

²³Yisa ni daa be Jɛrusalɛm Yaɣigari Chuɣu puhibu saha maa, niriba pam daa niŋ o yɛda bɛ nini ni daa nya shihir’ shɛŋa o ni wuhi la zuɣu.

²⁴Amaa Yisa daa bi saɣi bahi omaŋ’ ti ba, dama o daa mi din be ninsal’ kam suhu ni.

²⁵Di daa bi lan kpa ni so wuh’ o ninsal’ biɛhigu ni nyɛ shɛm, dama omaŋmaŋ’ pun mi din be ninsalinim’ suhuri ni.