Read Dagbani Jɔn 21 Bible Online

Jɔn 21 - Dagbani bible

Jɔn 21

¹Dimbɔŋɔ nyaaŋa ka Yisa daa lan yi o nyaandoliba maa zuɣu Taibɛrias Teeku ni. O ni daa yi bɛ zuɣu shɛm m-bɔŋɔ:

²Saimɔn Pita mini Tomas ŋun daa nyɛ jaa la ni Nataniɛl ŋun daa yi Kɛna din be Galili tiŋgbɔŋ ni na la ni Zɛbidii bihi la m-pahi nyaandoliba ayi n-daa laɣim taba.

³ Ka Saimɔn Pita yɛli ba, “Man’ ni chaŋ kulipaligu.” Ka bɛ yɛl’ o, “Ti gba ni dol’ a chaŋ.” Ka bɛ daa yi nti kpe ŋariŋ chaŋ, amaa dindali maa yuŋ maa bɛ daa bi gbaai shɛli.

⁴Biɛɣu ni daa ti neerina saha shɛli ka Yisa kana ti ʒe teeku duli, ka o nyaandoliba maa daa na bi baŋ ni ŋun’ Yisa m-bala.

⁵Ka o bɔhi ba, “N yilikpɛrinima, yi nya zahim? Ka bɛ yɛl’ o, “Aai!”

⁶ Ka o yɛli ba, “Zaŋmiya yi laŋ’ maa bahi yi ŋariŋ maa nudirigu polo; yi yi niŋ lala yi ni nya shɛli.” Ka bɛ daa niŋ lala n-gbahi zahim pam hal nti tarigi laŋ’ maa vɔbu zahim maa galisim zuɣu.

⁷Ka Yisa ni daa yuri nyaandol’ so la yɛli Pita, “Ti Duuma m-bala!” Pita daa pirigila o binyɛrigu sɔŋ ka tumdi tuma, ka o ni daa ti wum ni di nyɛla bɛ Duuma maa, ka o zaŋ o binyɛrigu maa ye n-kpilim lu teeku kom maa ni ha.

⁸Amaa ka o nyaandolitab’ la bɛn daa be ŋariŋ maa ni n-du duli ka vɔri laŋ’ din daa pali zahim maa na, dama bɛ mini duli daa bi lan wɔɣa. Di daa kul nyɛla kaman mita kɔbiga zuɣu.

⁹Ka bɛ daa duna n-yi ŋariŋ maa ni na nti nya ka bɔrɔbɔro doya, ka nya sala buɣim ka zahim pa di zuɣu.

¹⁰Ka Yisa yɛli ba, “Piimiya yi ni na yoli gbahi zahin’ shɛb’ maa ni na.”

¹¹Ka Saimɔn Pita daa chaŋ ti kpe ŋariŋ maa n-vo laŋ’ din pali ziŋ’ kara maa duna. Zahim maa kalinli daa nyɛla kɔbiga ni pihinunaata, amaa bɛ ni daa zooi shɛm maa zaa yoli, laŋ’ maa daa bi cheei.

¹²Ka Yisa yɛli ba, “Kamiyana ti suui yi noli.” O nyaandoliba maa ni so daa bi buɣisi ni o bɔh’ o, “Ŋuni n-nyɛ a?” Bɛ daa mi ni bɛ Duuma m-bala.

¹³Ka Yisa daa zaŋ bɔrɔbɔro la ti ba, ka daa zaŋ zahim la gba pahi ba.

¹⁴Dimbɔŋɔ n-daa nyɛ Yisa ni kahig’ omaŋa wuhi o nyaandoliba m-pahi siɣim buta o kum ni neebu la nyaaŋa.

¹⁵Bɛ ni daa suui bɛ noli maa naai ka Yisa bɔhi Saimɔn Pita, “Saimɔn Jɔn bia, a yuri ma gari bɛmbɔŋɔ?” Ka o saɣi, “Iin n Duuma, a mi ni n yur’ a.” Ka Yisa yɛl’ o, “Dihimi m piɛbihi.”

¹⁶Ka lan bɔh’ o pahi buyi, “Saimɔn Jɔn bia a yuri ma?” Ka o saɣi, “Iin n Duuma, a mi ni n yur’ a.” Ka Yisa yɛl’ o, “Dihimi m piɛri.”

¹⁷Ka lan bɔh’ o pahi buta yaha, “Saimɔn Jɔn bia, a yuri ma?” Ka Pita suhu saɣim o ni bɔh’ o m-pahi buta ni o yur’ o maa zuɣu, ka yɛl’ o, “N Duuma, a mi binshɛɣukam zaa; a mi ni n yur’ a.” Ka Yisa yɛl’ o, “Dihimi m piɛri.”

¹⁸Ka lan yɛl’ o, “Achiikatim, yɛlimaŋli ka n yɛr’ a, a ni daa nyɛ nachimbila saha shɛl’ la, amaŋmaŋ’ n-daa lɔri shɛgiriŋga a toli chani a suhu ni yu shɛli polo, amaa a yi ti kurigi, a ni kpuɣila a nuhi zuɣusaa ka so lo a mihi n-zaŋ a chaŋ a ni je ni a chaŋ shɛli.”

¹⁹O daa yɛl’ lala ni o wuhi kum shɛli Pita ni daa ti yɛn kpi, ka di ti Naawuni jilima la. Dimbɔŋɔ nyaaŋa ka Yisa daa yɛli Pita, “Doli ma.”

²⁰ Ka Pita daa ŋmaligi lihi nya ka Yisa ni daa yuri nyaandol’ so la doli ba. Nyaandol’ maa n-daa nyɛ ŋun ʒi n-tab’ Yisa bɛ ni daa ʒiya diri bindirigu ka bɔh’ o, “N Duuma, ŋuni n-lee nyɛ ŋun yɛn yi a nyaaŋ’ la.”

²¹Pita ni daa nya o maa ka o bɔhi Yisa, “N Duuma, ka ŋumbɔŋɔ mi yɛla lee nyɛla wula?”

²²Ka Yisa daa yɛl’ o, “N yi yu ni o kul kpalim beni hal ka n ti labina, di lee nya a ya? Nyin’ dee doli ma!”

²³Ka o ni daa yɛli shɛm ŋɔ moli gili nyaandoliba maa ni ni nyaandol’ ŋɔ ŋun’ ku kpi; amaa Yisa daa bi yɛli Pita ni nyaandol’ maa ku kpi. O daa yɛl’ o mi, “N yi yu ni o kul kpalim beni hal ka n ti lan labina, di lee nya a ya.”

²⁴Nyaandol’ maa n-nyɛ ŋun di dimbɔŋɔnim’ shɛhira ni ŋun sabi dimbɔŋɔnim’ ŋɔ, ka ti mi ni o shɛhira maa nyɛla yɛlimaŋli.

²⁵Amaa Yisa daa lan tum tuun’ shɛŋa pam pahi, ka di yɛla bi sabi niŋ kpe. Di zaa yi di sabi, n tɛhi n suhu ni ni di litaafinim’ naan ku nya palo dunia ŋɔ ni.