Read Dagbani Jɔn 5 Bible Online

Jɔn 5 - Dagbani bible

Jɔn 5

¹Dimbɔŋɔ nyaaŋa ka Yɛhudianim’ chu’ shɛli daa ti yɛn puhi, ka Yisa daa chaŋ Jɛrusalɛm.

²Been shɛli daa be Jɛrusalɛm n-do m-miri duno’ shɛli bɛ ni daa booni Piɛri Dunol’ la. Hiburuli ni bɛ booni biaŋ maa la Bɛtizata, ka lunfanima anu daa be nimaani.

³Barinim’ pam bɛn gbarigi n-daa kul do lunfanim’ maa ni: Zoomba mini gbariti ni bɔɣukpimanima ni gbalikpimanima. [Bɛ daa doya gulila kom maa dambu,

⁴dama malaika n-daa yi siɣirina sahasaha ti damdi kom maa. Ka o daa yi ti dam li ka ŋunkam daŋ di ni siɣibu, dɔr’ shɛlikam din mal’ o bahir’ o mi.]

⁵Dɔro ni daa mali do’ so yuun’ pihinahaayika gba daa do nimaani.

⁶Yisa ni daa nya o ka baŋ ni o dɔni nimaani yuui maa ka o bɔh’ o, “A bɔri ni a nya alaafee?”

⁷Ka dɔrolan’ maa garigi yɛl’ o, “N Duuma, kom maa yi ti dam, n ka so ŋun ni zaŋ ma siɣi di ni, ka mmaŋmaŋ’ yi chani ni n ti siɣi, so daŋdi ma la di ni siɣibu.”

⁸Ka Yisa yɛl’ o, “Yiɣisima n-kpuɣ’ a bindoo chaŋ.”

⁹Ka doo maa dii nya alaafee, ka kpuɣ’ o bindoo chaŋ o chandi. Dindali maa daa nyɛla Vuhim Dabisili dali.

¹⁰ Lala zuɣu ka Yɛhudianim’ daa yɛli do’ so ŋun kpaŋ maa, “Zuŋɔ nyɛla Vuhim Dabisili dali; di bi luhi ni a kpuɣ’ a bindoo maa n-ʒiri li chana.”

¹¹Ka o yɛli ba, “Do’ so ŋun tib’ ma maa n-yɛli ma ni n kpuɣimi m bindoo maa chaŋ.”

¹²Ka bɛ bɔh’ o, “Ŋuni n-lee yɛl’ a ni a kpuɣim’ a bindoo chaŋ maa?”

¹³Do’ so ŋun daa kpaŋ maa daa bi mi ŋun chɛ ka o kpaŋ maa ni nyɛ so, dama salo daa galisiya nimaani, ka Yisa mi pun yi ni chaŋ o chandi.

¹⁴Di nyaaŋa ka Yisa daa ti nya doo maa Naawuni jɛmbu duu yɛl’ o, “Nyama, a kpaŋya zaa! Di lan tum alahichi din ni chɛ ka zaɣ’ biɛɣu din gari din’ la ti paag’ a yaha!”

¹⁵Ka doo maa daa chaŋ ti yɛli Yɛhudianima ni Yisa n-nyɛ ŋun daa chɛ ka o kpaŋ la.

¹⁶Yisa ni daa niŋ li Vuhim Dabisili dali maa zuɣu daa chɛ ka Yɛhudianim’ maa muɣisi Yisa pam.

¹⁷Amaa ka Yisa daa yɛli ba, “M Ba kul tumdimi, ka n gba tumda.”

¹⁸Lala zuɣu ka Yɛhudianim’ daa maan mooi bɛ nini bɔri ni bɛ ku o, dama bɛ daa zaŋ zali ni o bi saɣim la Vuhim Dabisili dali zaligu kɔŋko, amaa ni o yɛliya ni Naawuni n-nyɛ o Ba, ka di wuhi ni o zaŋ omaŋ’ maɣisi Naawuni.

¹⁹Ka Yisa daa yɛli ba, “Achiikatim, yɛlimaŋli ka n yɛri ya, Bia maa ku tooi niŋ shɛli omaŋmaŋ’ yubu ni naɣila o ni nya ka o Ba niŋdi shɛli, dama Ba maa ni niŋdi shɛli, dina ka Bia maa gba niŋda.

²⁰Ba maa yur’ o Bia maa, ka wuhir’ o omaŋmaŋ’ ni niŋdi shɛlikam zaa, ka ni lan wuh’ o tuun’ kara gari dimbɔŋɔnima din ni chɛ ka di niŋ ya alahiziba.

²¹Ba maa ni neeri kpiimba kum ni ka tiri ba nyɛvili shɛm, lala ka Bia maa gba tiri o ni bɔri so nyɛvili.

²²Ba maa bi kariti so saria, amaa o zaŋ saria karibu yɛla zaa niŋla o Bia maa nuu ni

²³ni di chɛ ka sokam zaa ti Bia maa jilima kaman bɛ ni tir’ o Ba maa jilima shɛm. Ŋunkam bi tiri Bia maa jilima bi tirila o Ba ŋun tim o maa na jilima.”

²⁴Yisa daa lan yɛli, “Achiikatim, yɛlimaŋli ka n yɛri ya, ŋunkam wum n yɛligu ka niŋ ŋun tim ma na maa yɛda mali nyɛvili din ka bahigu; ka bɛ ti ku lan kar’ o saria, dama o pun yi kum ni kpe nyɛvili ni.

²⁵Achiikatim, yɛlimaŋli ka n lan yɛri ya, saha kanna, hal di paaya gba, ka kpiimba ni ti wum Naawuni Bia maa kukoli, ka bɛnkam ti wum li ni mali nyɛvili.

²⁶Ba maa ni mali nyɛvili omaŋmaŋ’ ni shɛm, lala ka o ti o Bia maa yiko ni o gba mali nyɛvili omaŋmaŋ’ ni.

²⁷Ka lan ti o yiko ni o kari saria, o ni nyɛ Daadam Bia la zuɣu.

²⁸Di chɛliya ka dimbɔŋɔ niŋ ya alahiziba, dama saha kanna ka bɛnkam zaa be gbala ni ni ti wum o kukoli

²⁹ ka yina. Bɛn daa tum tuun’ suma ni ti neei kum ni n-nya nyɛvili; ka bɛn mi daa tum tuumbiɛri ti neei kum ni n-nya saria karibu.”

³⁰Yisa daa lan yɛli yaha, “N ku tooi niŋ shɛli mmaŋmaŋ’ yiko ni; n ni wum shɛm, dina ka m mali kariti saria, ka n sariakaribo maa mi nyɛla din tuhi, dama m bi bɔri mmaŋmaŋ’ yubu, amaa ŋun tim ma na maa yubu ka m bɔra.

³¹“N yi di mmaŋ’ shɛhira, n shɛhira maa ku nyɛla shɛhira maŋli.

³²Amaa so beni ŋun diri ma shɛhira, ka m mi ni o ni diri ma shɛhira shɛli maa nyɛla shɛhira maŋli.

³³ Yi daa tim tuumba Jɔn Baptaizira sani, ka o gba daa di yɛlimaŋli ŋɔ shɛhira.

³⁴M bi zaŋ mmaŋ’ dalimla ninsal’ shɛhira, amaa n yɛli ya la dimbɔŋɔ yi tiliginsim nyabu zuɣu.

³⁵Jɔn daa nyɛla firila din diri ka ne, ka yi daa saɣi m-mali suhupiɛlli o neesim maa ni daba ayi.

³⁶Amaa m-mali shɛhira din gari Jɔn shɛhira maa; dama tuun’ shɛŋa m Ba Naawuni ni zali ma ni n tum, dina ka n tumda; ka tuun’ shɛŋa n ni tumdi maa mi diri ma shɛhira ni m Ba n-shiri tim ma na.

³⁷ Ka m Ba ŋun tim ma na maa gba diri ma shɛhira. Yi na ʒi n-wum o kukoli bee n-nya o ni be shɛm ni yi nini;

³⁸ka o yɛligu mi ka yi suhuri ni, dama yi bi niŋ o ni tim so na la yɛda.

³⁹Yi vihiri Naawuni Kundi, dama yi tɛhiya ni di ni ka yi ni nya nyɛvili din ka bahigu; ka Naawuni Kundi maa maŋmaŋ’ gba diri ma shɛhira.

⁴⁰Amaa ka yi zaɣisi ni yi ku ka n sanna ti nya nyɛvili.

⁴¹“M bi bɔri jilima ninsalinim’ sani.

⁴²M min ya, ka lan mi ni yi bi yuri Naawuni yi suhuri ni.

⁴³M Ba Naawuni yuli ka n zaŋ kana, ka yi ti bi deei ma, amaa so yi ti zaŋ omaŋmaŋ’ yuli kana, ŋuna ka yi ni deei.”

⁴⁴Ka ŋmaligi bɔhi ba, “Wula ka yinim’ bɛn bi bɔri jilima Naawuni ŋun kɔŋko kul nyɛ Naawuni ŋɔ sani, amaa ka bɔri jilima la yi tab’ sani ŋɔ lee yɛn tooi niŋ yɛda?

⁴⁵Di tɛhiriya ni n ni tɔɣisi yi din bie yɛla m Ba sani; ŋun ni tɔɣisi yi din bie yɛla o sani beni, ŋuna n-nyɛ Anabi Musa yi ni zaŋ yi tahima zaa niŋ so ni la.

⁴⁶Yi yi di niŋ Anabi Musa yɛda, yi naan niŋ n gba yɛda, dama o daa sabi n yɛla zali.

⁴⁷Amaa ka yi yi bi niŋ o ni daa sab’ shɛm maa yɛda, wula ka yi lee ni niŋ n yɛligu yɛda?”