Read Dagbani Tuma 10 Bible Online

Tuma 10 - Dagbani bible

Tuma 10

¹Do’ so daa be Siizaria ka o yuli booni Kɔniilius. O daa nyɛla sapashini n-su tɔbbi’ shɛb’ bɛ ni daa booni Italinim’ Bɔŋ la.

²O daa nyɛla wuntizɔra ŋun kul suhiri Naawuni sahakam, ka o min’ o yiŋnim’ zaa daa zɔri Naawuni, ka o tiri nandaamba pina pam.

³Dahin shɛli, kaman kurig’ ata saha ka o nini daa ti nya Naawuni malaika ʒii ka o kpɛr’ o sanna ka bol’ o, “Kɔniilius!”

⁴Ka dabiɛm daa gbaag’ o ka o kpaag’ o nina kpa malaika maa ka bɔh’ o, “N dana, wula?” Ka malaika maa yɛl’ o, “Naawuni deeg’ a suhigu, ka nya a ni tiri nandaamba pina la, di zaa leei ŋun’ Naawuni ni ku tam shɛli yɛla.

⁵Dinzuɣu timmi Jɔpa ti boli Saimɔn ŋun yuli lan booni Pita la na.

⁶O kpɛrila o tɔɣima Saimɔn ŋun nyɛ gbanzaba, ka o yiŋ’ baɣi teeku noli la yiŋa.”

⁷Malaika maa ni daa yɛl’ o lala ka chaŋ naai, ka o bol’ o yiŋbih’ ayi mini tɔbbi’ so ŋun daa nyɛ wuntizɔra ka gul’ o sahakam la na

⁸nti kahigi yɛla maa zaa wuhi ba, ka naanyi tim ba Jɔpa maa.

⁹N-yi biɛɣu ka bɛ chaŋ ti miri Jɔpa, di saha ka Pita mi daa du jirambisa zuɣusaa ni o ti suhi Naawuni. Di daa nyɛla agbaa saha.

¹⁰Ka kum daa wum o pam ka o bɔri bindirigu ni o di, amaa ka bɛ daa na duɣirimi; di saha maa ka o daa nya ʒii

¹¹ka Naawuni daa chɛ ka o nini nya ka zuɣusaa bɔɣi, ka o nya binshɛli ka di kɔtomsi be kaman adiiku tital’ la, ka di sirigiri o sanna hal ti paai tiŋa.

¹²Ka di puuni zaa daa palila biŋkɔbiri balibu kam mini tinvura ni biŋgbamda ni noonsi.

¹³Ka kukol’ shɛli daa yɛl’ o, “Pita, yiɣisima n-kɔrigi ŋubi!”

¹⁴Amaa ka Pita yɛli, “N Duuma, n ku tooi niŋ lala, dama n na ʒi n-di bin’ yoya ŋɔ tatabo bee n ni chihiri binshɛŋa.”

¹⁵Ka kukoli maa lan yɛl’ o pahi buyi, “Naawuni ni lihi binshɛŋa bin’ suma, nyin’ miri ka a bol’ li bin’ yoya.”

¹⁶Ka di daa niŋ lala siɣimsiɣim buta ka lan lab’ zuɣusaa.

¹⁷Pita ni daa na kul mal’ o ni nya shɛli ʒii maa puuni yɛla bilisir’ o suhu ni saha shɛli maa ka Kɔniilius tuumba maa bɔhi n-kana ti ʒe Saimɔn ŋun nyɛ gbanzab’ yiŋ’ maa dunol’ ni

¹⁸bɔhira, “Kpe ka Saimɔn ŋun yuli lan booni Pita la kpɛra?”

¹⁹Pita ni daa kul ʒiya tɛhiri ʒii maa yɛla maa ka Naawuni Shia Kasi yɛl’ o, “Nyama, niriba ata kana ti bɔr’ a.

²⁰Dinzuɣu yiɣisim’ siɣi doli ba chaŋ ka di biɛhind’ a suhu ni, dama mani n-tim ba a sanna.”

²¹Di saha ka Pita daa siɣi ninvuɣ’ shɛb’ Kɔniilius ni daa timna maa sani ti yɛli ba, “Mani n-nyɛ yi ni bɔri so maa.” Ka bɔhi ba, “Bɔ n-lee tahi ya na?”

²²Ka bɛ garigi yɛl’ o, “Naawuni n-sa tim o malaika suŋ sapashin’ so ŋun yuli booni Kɔniilius la sanna nti yɛl’ o ni o timmina ti boli nyin’ Pita nti wum din be a nol’ ni. Ti dan’ Kɔniilius nyɛla ninvuɣ’ maŋli ŋun zɔri Naawuni, ka mali yu’ suŋ Yɛhudianim’ zaa sani.”

²³Ka Pita daa zaŋ ba kpe duu ka o mini ba ti gbe. N-yi biɛɣu ka Pita yiɣisi ni o mini Kɔniilius tuumba maa chaŋ, ka Yisa nyaandol’ shɛb’ bɛn daa be Jɔpa pahi Pita zuɣu ka bɛ chaŋ.

²⁴N-kaai biɛɣu ka bɛ paai Siizaria, ka Kɔniilius pun laɣim o dɔɣiriba min’ o zo suma na ka bɛ ti ʒiya guli ba.

²⁵Pita ni daa ti kul zaŋ o zuɣu tiriti dunol’ ni ka Kɔniilius dii yiɣisi nti gban’ o tooni jɛmd’ o.

²⁶Ka Pita daa gbaag’ o nuu ni yiɣis’ o zali ka yɛl’ o, “Yiɣisima! Man’ gba kul nyɛla ninsala kaman nyin’ la.”

²⁷O ni daa yɛl’ o lala bahi ka kpe yili maa ni, o nya ka niriba pam m-pun laɣim ʒiya.

²⁸Ka o yɛli ba, “Yi zaa mi di ni chihiri ni Yɛhudia nira mini zuliya shɛb’ laɣim shɛm bee ka bɛ ti kpe zuliya shɛb’ yinsi yɛla; amaa Naawuni wuhi ma ni n di lihi so yoli bee n-siŋ so.

²⁹Dina n-chɛ ka m bi biɛhim ka ka yi sanna yomyom maa, dinzuɣu yɛlimiya ma yi ni boli ma na shɛli zuɣu.”

³⁰Ka Kɔniilius yɛl’ o, “Daantal’ la kurig’ ata saha ka n daa suhiri Naawuni n yili ŋɔ nti nya ka do’ so ye binyɛr’ piɛlli ʒe n tooni

³¹ka yɛli ma, ‘Kɔniilius, Naawuni deeg’ a suhigu, ka nya a ni tiri nandaamba pina shɛm la, di zaa leei ŋun’ Naawuni ni ku tam shɛli yɛla.

³²Dinzuɣu timmi Jɔpa nti boli Saimɔn ŋun yuli lan booni Pita la na. O kpɛrila o tɔɣima Saimɔn ŋun nyɛ gbanzaba ka o yiŋ’ baɣi teeku nol’ la yiŋa.

³³Dina n-daa chɛ ka n dii tim a sanna maa, ka a mi ni kana maa a niŋ viɛnyɛla. Dinzuɣu pumpɔŋɔ ti zaa bela Naawuni tooni ni ti wum ŋun’ Naawuni ni ti a zilin’ shɛli ni a ti ti.’ ”

³⁴ Ka Pita daa yaag’ o noli yɛli ba, “Pumpɔŋɔ m baŋya ni Naawuni shiri bi gaŋdi niriba;

³⁵dama Naawuni deeri zuliya kam ni ninvuɣ’ so ŋun zɔr’ o ka tumdi din tuhi.

³⁶Yi mi Naawuni ni daa chɛ ka bɛ zaŋ yɛtɔɣ’ shɛli nti yɛli Izraɛlnim’ la yɛla; bɛ daa yihi lahibal’ suŋ waazu wuhi ni suhudoo yirila Yisa Masia sanna. Ŋuna n-nyɛ sokam zaa Duuma.

³⁷Jɔn Baptaizira ni daa yihi kom baptaizibu yɛla waazu la nyaaŋa ka yɛligu ŋɔ daa pili Galili m-mol’ gili Judia tiŋgbɔŋ ni zaa

³⁸n-wuhiri Naawuni ni daa ti Yisa Nazarɛt nira Shia Kasi yiko ka o gindi tumdi tuun’ suma, ka chɛ ka Sintani ni daa nahindi ninvuɣ’ shɛb’ zaa kpaŋdi shɛm, dama Naawuni daa be o sani.

³⁹Tinima n-nyɛ o ni daa tum shɛlikam Yɛhudianim’ tinsi ni mini Jɛrusalɛm maa zaa shɛhiranima. Ka bɛ daa ti zaŋ o kpahi tabili dapulli zuɣu ku o;

⁴⁰amaa ka Naawuni daa neeg’ o kum ni daba ata dali ka chɛ ka o yi palo.

⁴¹Pa sokam zaa n-daa nya o, naɣila Naawuni ni daa pii tinim’ shɛb’ leei shɛhiranim’ maa n-daa nya o, ka ti min’ o laɣim di ka nyu o ni daa neei kum ni maa nyaaŋa.

⁴²Ka o daa yɛli ti ni ti yihim’ waazu ti niriba, ka wuhi ba ni ŋuna ka Naawuni zaŋ leei nyɛvilinim’ mini kpiimba zaa sariakarita.

⁴³Ŋuna ka anabinim’ zaa di shɛhira ni ŋunkam niŋ o yɛda ni nya alahichi chɛ m-paŋ o yuli zuɣu la.”

⁴⁴Pita ni daa kul yɛri maa ka Naawuni Shia Kasi daa siɣi bɛnkam daa wum yɛligu maa zuɣu na.

⁴⁵Ka di daa niŋ Yisa yɛdaniŋdib’ bɛn nyɛ Yɛhudianima n-doli Pita na la alahiziba bɛ ni daa nya ka bɛn pa Yɛhudianim’ gba deei Naawuni Shia Kasi maa zuɣu;

⁴⁶dama bɛ daa wum ka bɛ tɔɣisiri tinzun yɛligu balibu kam yɛtɔɣa paɣiri Naawuni. Di saha ka Pita bɔhi,

⁴⁷“So ni tooi mɔŋ ninvuɣ’ shɛb’ bɛn deei Naawuni Shia Kasi kaman ti gba ni daa deei shɛm la kom baptaizibu?”

⁴⁸Ka daa yɛli ba ni bɛ deem’ kom baptaizibu Yisa Masia yuli zuɣu. Ka bɛ daa balim Pita ni o kpalimmi bɛ sani niŋ daba ayi.