Read Dagbani Tuma 12 Bible Online

Tuma 12 - Dagbani bible

Tuma 12

¹Di saha maa ka Naa Hɛrɔd[4] daa piligi n-gbahiri cheechi ni ninvuɣ’ shɛba n-niŋdi ba alaka;

²ka daa chɛ ka bɛ zaŋ takɔbi ku Jɔn mabia Jeemsi.

³O ni daa nya ka lala niŋbu tiɣi Yɛhudianim’ nini zuɣu ka o daa gbaai Pita gba. Bɔrɔbɔro din ka Dabindi Chuɣu la puhibu saha ka o daa niŋ lala maa.

⁴ O ni daa gbaag’ o maa o daa kpɛh’ o la duu, ka chɛ ka duguliba pinaayɔbu ʒe n-gul’ o, dama o daa lɔrila nia ni Yaɣigari Chuɣu puhi gari ka o zaŋ o niŋ Yɛhudianim’ nuu ni.

⁵Lala zuɣu ka bɛ daa chɛ Pita niŋ duu, amaa ka cheechi daa kul suhiri Naawuni ni nimmoo o zuɣu.

⁶Naa Hɛrɔd ni daa yɛn chɛ ka bɛ zaŋ Pita tah’ o sanna dahin’ shɛli dazɔhigu dali yuŋ, Pita daa dola dansarika guliba ayi sunsuuni gbihira. Bɛ daa zaŋla zoligɔnim’ ayi lo o, ka dugul’ shɛb’ ʒe n-guli dunoli.

⁷Ka ti Duuma malaika daa ti kpe duu maa ni na, ka neesim neei duu maa puuni zaa; ka malaika maa daa chaŋ ti kpahi Pita luɣili n-neeg’ o yɛli, “Yiɣisim’ yomyom!” Ka zoligɔnim’ din daa lo o nuhi la surigi lu tiŋa.

⁸Ka malaika maa yɛli Pita, “Malim’ shili ka zaŋ a namda piri.” Ka o niŋ lala. Ka o lan yɛl’ o, “Zaŋm’ a binyɛrigu ye n-doli ma.”

⁹Ka Pita daa dol’ o yi ka bi baŋ ni malaika maa ni niŋ o shɛm maa nyɛla yɛlimaŋli. O daa tɛhi ni o zahimla zahindi.

¹⁰Bɛ ni daa ti gari dunoya ayi shɛŋa dunɔguliba ni daa ʒiɛya guli maa zuɣu, bɛ daa mali ti paala kurigu dunoli din yiri kpɛri tiŋ’ maa puuni. Ka di daa yooi di toli, ka bɛ yi n-doli solɔɣu chaŋ ha ka malaika maa ti dii chɛ o ka chaŋ.

¹¹Di saha maa ka Pita nini daa neei ka o yɛli, “Pumpɔŋɔ m baŋya ni Naawuni n-tim o malaika na ka o ti fa ma Naa Hɛrɔd mini Yɛhudianim’ zaa ni lɔri nia ni bɛ niŋ ma bɛ ni yu shɛm la nuu ni bahi.”

¹²Pita ni daa baŋ lala maa, ka o chaŋ Jɔn ŋun yuli lan booni Maak la ma Mariama yiŋa. Niriba pam n-daa laɣim be nimaani suhiri Naawuni.

¹³Ka Pita daa zani dunol’ ni niŋdi gaafara, ka paɣisar’ so ŋun yuli booni Roda daa kana ni o ti nya ŋun bala.

¹⁴O ni daa baŋ Pita kukoli, suhupiɛlli zuɣu daa chɛ ka o bi yooi dunol’ maa, amaa ka naɣ’ zomi kpe nti yɛli ni Pita ʒe dunol’ ni.

¹⁵Ka bɛ yɛl’ o, “A zuɣu n-lɛbigi!” Amaa ka o nini kul mooi ka o yɛri ni di shiri nyɛla yɛlimaŋli. Ka bɛ yɛl’ o, “O malaika m-bala!”

¹⁶Amaa ka Pita na kul ʒiɛya niŋdi gaafara, ka bɛ daa kana ti yooi dunoli maa nya o, ka di gari ba pam.

¹⁷Ka Pita kpuɣ’ o nuhi gahi wuhi ni bɛ foma, ka o daa kahigi Naawuni ni niŋ shɛm yih’ o duu maa ni wuhi ba; ka yɛli ba ni bɛ yɛlim’ Jeemsi mini yɛdaniŋdiba zaa di yɛla. Ka daa yi nimaani chaŋ luɣ’ shɛli.

¹⁸Ka biɛɣu daa ti neei, ka Pita ni daa yi duu maa ni shɛm yɛla gari duguliba maa pam, ka bɛ mɔhiri vuri di zuɣu.

¹⁹Naa Hɛrɔd ni daa ti tim ti bɔri Pita ka bi nya o, ka o vihi duguliba maa yɛlli maa zuɣu, ka bahi noli ni bɛ kum’ ba. Di nyaaŋa ka Naa Hɛrɔd daa yiɣisi Judia chaŋ Siizaria nti kpalim be nimaani.

²⁰Ka Naa Hɛrɔd daa ti je suli pam niŋ Taainim’ mini Sidɔnnima. Ka bɛ daa laɣim chaŋ Blastus ŋun daa nyɛ Naa Hɛrɔd yɛdalan’ la sani ni bɛ ti balim o ka o maai Naa Hɛrɔd suhu ti ba, dama bɛ bindira daa yirila o tiŋgbɔŋ ni na.

²¹Ka Naa Hɛrɔd daa zali ba dabisili ni bɛ ka o sanna. Ka dindali maa daa ti paai ka o ye o nam binyɛrigu ʒin’ o nam ʒiishee n-tɔɣisiri ba yɛtɔɣa.

²²Ka niriba maa daa kuhiri yɛra, “Naawuni kukoli m-bɔŋɔ, pa ninsal’ dini!”

²³Ka ti Duuma malaika daa kana ti dii ŋme Naa Hɛrɔd o ni daa bi tiri Naawuni jilima la zuɣu, ka zunzuya wɔɣ’ o ni ŋ-ŋub’ o ka o kpi.

²⁴Amaa ka Naawuni yɛligu din’ daa kul maan chanila tooni pahira.

²⁵Baanabas mini Sool ni daa tum bɛ tuma naai, ka bɛ zaŋ Jɔn ŋun yuli daa lan booni Maak la pahi bɛmaŋ’ zuɣu yi Jɛrusalɛm n-lan chaŋ bɛ chandi shee.