Read Dagbani Tuma 16 Bible Online

Tuma 16 - Dagbani bible

Tuma 16

¹Pool daa ti chaŋ Dɛɛbi mini Listra gba. Yisa nyaandol’ so daa be nimaani ka o yuli booni Timoti. O ma daa nyɛla Yɛhudia paɣa ka nyɛ Yisa nyaandola, ka o ba mi nyɛ Giriiki doo.

²Timoti daa mali yu’ suŋ Yisa nyaandoliba bɛn daa be Listra mini Aikɔnium la sani.

³Ka Pool daa bɔri ni o zaŋ o pah’ omaŋ’ zuɣu chaŋ; dinzuɣu ka o daa guni Timoti, Yɛhudianim’ bɛn daa be tinsi maa ni la zuɣu, dama bɛ zaa daa mi ni Timoti ba nyɛla Giriiki doo.

⁴Ka bɛ daa paai tinsi maa ni nti zaŋ Yisa tuumba maa mini Jɛrusalɛm cheechi kpamba ni daa tɔɣisi gbaai yɛtɔɣ’ shɛŋa la wuhi ba ni bɛ dol’ li.

⁵Ka di daa kpaŋsi nimaani yɛdaniŋdib’ suhuri, ka niriba kul pahiri bɛ zuɣu dabisili kam.

⁶Ka bɛ daa kpe Firijia mini Galɛshia tiŋgbana ni garita, ka Naawuni Shia Kasi daa bi saɣi ni bɛ yihi waazu Ɛsha tiŋgbɔŋ ni.

⁷Ka bɛ daa ti paai Misia tintariga shee m-bɔri ni bɛ chaŋ Bitinia, amaa ka Yisa Shia daa bi saɣi;

⁸dinzuɣu ka bɛ daa baɣisi Misia gari chaŋ Troas.

⁹Ka Pool daa ti nya Masidɔnia do’ so ʒii yuŋ ka o ʒiɛya m-balindi ŋun’ Pool yɛra, “Kam’ Masidɔnia na ti sɔŋ ti!”

¹⁰Pool ni daa nya ʒii maa nyaaŋa ka ti daa dii gbaai nia lɔbu ni ti chaŋ Masidɔnia maa ti ni daa baŋ ni Naawuni n-tim ti ni ti ti yihi Yisa Masia lahibal’ suŋ waazu ti nimaani nim’ gba zuɣu.

¹¹Ka ti daa yiɣisi Troas kpe ŋariŋ chaŋ Samɔtirɛsi n-yi biɛɣu n-naanyi paai Niapolis

¹²nti yi ŋariŋ ni nimaani chaŋ Filipai din daa nyɛ Masidɔnia tiŋgbɔŋ ni tinzuɣu ka Romnim’ su li la. Ka ti daa niŋ daba ayi nimaani.

¹³Ka Vuhim Dabisili dali daa ti paai, ka ti yi tiŋ’ maa ni chaŋ mɔɣili noli luɣ’ shɛli ti ni daa tɛhi ni Naawuni suhibu shee be n-daa ti ʒini paɣ’ shɛb’ bɛn daa laɣim sani n-tɔɣisiri ba Naawuni yɛtɔɣa.

¹⁴Ka paɣ’ so ŋun daa yi Taiatira na n-nyɛ ago chinchin’ kɔha, ka o yuli booni Lidia, ka o daa nyɛ ŋun jɛmdi Naawuni la daa be nimaani. Ka ti Duuma daa yoog’ o suhu ka o niŋ Pool ni daa yɛli shɛm yɛda.

¹⁵O min’ o yiŋ’ zaa ni daa deei kom baptaizibu nyaaŋa ka o balim ti yɛli, “Yi yi zahim ma nya ka n nyɛla ŋun ʒe yim n suhu ni ni ti Duuma, yin’ kamiyana ti be n yiŋa.” Ka o ni daa balim ti ni nimmoo zuɣu chɛ ka ti niŋ lala.

¹⁶Ka ti daa ti chani Naawuni suhibu shee n-tuhi bipuɣin’ so ŋun daa nyɛ dabili ka lan nyɛ kpilikparisilana soli. Bɛn daa su o daa diri kpilikparisi maa baɣitali nyɔri pam.

¹⁷Ka bipuɣiŋga maa daa doli ti mini Pool kuhiri yɛra, “Niriba ŋɔ nyɛla Zallakudura Naa daba bɛn wuhiri ya tiliginsim soli.”

¹⁸Ka o daa niŋ lala paai dabisa shɛm, ka Pool nyee ti nyɔni ka o ŋmaligi tahi kpilikpariga ŋun daa sɔŋdi bipuɣiŋga maa ka o buɣiri baɣiri maa zuɣu n-yɛli, “Yisa Masia yuli zuɣu, zom’ ka chɛ o!” Ka kpilikpariga maa daa shiri zo ka chɛ o di saha maa.

¹⁹Bɛn su bipuɣiŋga maa ni daa nya ka bɛ ku lan di o baɣibuɣibo maa nyɔri maa ka bɛ daa gbaai Pool mini Silas n-vo ba tahi tiŋ’ maa kpamba sani daa puuni.

²⁰Ka bɛ daa zaŋ ba paai sariakaritib’ sani ti yɛli, “Niriba ŋɔ nyɛla Yɛhudianima, ka saɣindi ti tiŋgbɔŋ ŋɔ.

²¹Bɛ malila ka’ shɛŋa din bi simdi ni tinim’ bɛn nyɛ Romnim’ ŋɔ doli n-wuhiri niriba.”

²²Ka salo daa pahi bɛ zuɣu liri ba; ka sariakaritib’ maa daa dari tɔhi Pool mini Silas binyɛra, ka bahi noli ni bɛ zaŋm’ jaaŋgbɛbihi fiɛb’ ba.

²³Ka bɛ daa fiɛb’ ba pam ka zaŋ ba ti kpɛhi duu, ka yɛli dansarika gula ni o guli ba viɛnyɛliŋga.

²⁴Lala zuɣu ka dansarika gula maa daa tom ba kpɛhi duu din be puuni ha ni nti ba ba bandi ʒili.

²⁵Ka di daa ti niŋ yuntisuɣu, ka Pool mini Silas suhiri Naawuni ka yiini yila paɣiri Naawuni, ka bɛ dansarika tab’ ʒiya wumda.

²⁶Bɛ nini nyabu yim ka tiŋgbani ti dam pam hal ka duu maa gbinni ti sɔhira, ka sarika duu maa dunoya zaa dii yooi, ka sokam bandi baai.

²⁷Ka dansarika gula daa neei gom ni n-nya ka dunoya maa zaa yoomi, ka o ŋoog’ o takɔbi ni o kuhi ku omaŋa, dama o daa tɛhiya ni dansarikanim’ maa zaa yimi zo.

²⁸Amaa ka Pool daa kuhi pam yɛl’ o, “Di niŋ amaŋ’ shɛli, dama ti zaa be kpe.”

²⁹Di saha ka dansarika gula maa kuhi yɛli ni bɛ zaŋm’ firila na, ka o daa guui kpe ka dabiɛm gbaag’ o ka o ni sɔhira, ka o damdi Pool mini Silas tooni.

³⁰Di nyaaŋa ka o daa zaŋ ba yina ti bɔhi ba, “N duumanima, ka wula ka n lee yɛn niŋ tiligi?”

³¹Ka bɛ yɛl’ o, “Niŋm’ ti Duuma Yisa yɛda, ka a min’ a yiŋnim’ zaa tiligi.”

³²Ka bɛ daa wuh’ o min’ o yiŋnim’ zaa ti Duuma yɛligu.

³³Kulla di saha maa ka o daa paɣi bɛ fiɛbbu dansi la, ka Pool mini Silas daa baptaizi dansarika gula maa min’ o yiŋnim’ zaa.

³⁴Ka o daa zaŋ ba kul’ o yiŋa nti niŋ bindirigu ti ba; ka o suhu daa paligi pam o min’ o yiŋnim’ zaa ni niŋ Naawuni yɛda maa zuɣu.

³⁵N-yi biɛɣu ka sariakaritib’ la daa tim pirinsi nti yɛli dansarika gula maa ni o yoomi Pool mini Silas bahi ka bɛ chaŋ.

³⁶Ka dansarika gula maa daa yɛli Pool ni sariakaritib’ maa tim na ti yɛl’ o ni o yoom’ ba bahi ka bɛ chaŋ; dinzuɣu ni bɛ yim’ n-chaŋ ni suhuʒia.

³⁷Amaa ka Pool yɛli ba, “Ti nyɛla Rom tiŋbihi ka bi tum taali, ka bɛ fiɛb’ ti palɔni ka zaŋ ti kpɛhi duu, ka lee ti bɔri ni bɛ yihi ti la ashilɔni bahi? Aai! Chɛ ka bɛmaŋmaŋ’ kana ti yihi ti bahi.”

³⁸Ka pirinsi maa daa lab’ ti yɛli sariakaritib’ maa Pool ni yɛli shɛm, ka dabiɛm gbahi ba bɛ ni daa wum ni Pool mini Silas nyɛla Rom tiŋbihi maa zuɣu;

³⁹lala zuɣu ka bɛ daa kana ti balim ba ni bɛ niŋm’ suɣilo, ka daa naanyi yihi ba bahi, ka yɛli ba ni bɛ yim’ bɛ tiŋ’ maa ni.

⁴⁰Ka Pool mini Silas daa yi sarika duu maa ni n-chaŋ Lidia yiŋa nti puh’ o; ka daa nya bɛ yɛdaniŋditab’ bɛn be nimaani n-kpaŋsi bɛ suhuri ka naanyi yi n-chaŋ.