Read Dagbani Tuma 22 Bible Online

Tuma 22 - Dagbani bible

Tuma 22

¹“M banima mini m mabihi, wummiya n ni yɛn yɛli shɛm zabi mmaŋ’ zuɣu ŋɔ.”

²Bɛ ni daa wum ka o tɔɣisiri ba Hiburuli ni maa ka bɛ maan fo baalim; di saha ka o yɛli,

³ N nyɛla Yɛhudia nira. Bɛ dɔɣi ma la Taasus, Kilikia tiŋgbɔŋ ni, amaa n zoola Gamaliɛl sani ya ŋɔ; ka bɔhim n yaannim’ zaligunim’ mini bɛ kaya yɛla o sani, ka n suhu ye Naawuni zuɣu kaman yi zaa ni niŋdi shɛm pumpɔŋɔ ŋɔ.

⁴N daa niŋ bɛn doli soli ŋɔ alaka, hal ka chɛ ka bɛ ku bɛ shɛba, ka chɛ ka bɛ lo bɛ shɛb’ bɛn nyɛ dɔbba mini paɣiba mihi kpɛhi duu.

⁵ Hal maligumaaniba zuɣulana mini ya ŋɔ jintɔriba zaa ni tooi di ma shɛhira, dama bɛ sani ka n daa deei gbana n-chani ni n ti ti bɛ mabihi bɛn be Damaskus la, ka gbahi bɛn doli soli ŋɔ n-lo ba mihi tahi Jɛrusalɛm ŋɔ na ka bɛ ti darigi bɛ tiba.

⁶Pool daa lan yɛli, “Amaa n ni daa ti be soli chana nti miriti Damaskus kaman wuntaŋ’ zuɣusaa saha ka neesim titali daa ti dii yi zuɣusaa na ti neei gili ma.

⁷Ka n lu tiŋa ka wum kukol’ shɛli damli ka di booni ma yɛra, ‘Sool, Sool, bɔ n-niŋ ka a niŋdi ma alaka?’

⁸Ka n garigi bɔhi, ‘Ŋuni n-lee bala, n Duuma?’ Ka o yɛli ma, ‘Man’ Yisa Nazarɛt nira ŋun nyɛ a ni niŋdi so alaka maa m-bala.’

⁹Bɛn daa be n sani daa nya neesim maa, amaa ka lee bi wum kukoli maa ni yɛli ma shɛm maa.

¹⁰Ka n yɛli, ‘N Duuma, ka wula ka n lee yɛn niŋ?’ Ka n Duuma yɛli ma, ‘Yiɣisim’ bahi paai Damaskus tiŋ’ puuni, nimaani ka bɛ ni ti wuh’ a n ni zal’ a ni a niŋ shɛm.’

¹¹Ka neesim maa nyaɣisibu zuɣu daa chɛ ka m bi lan ne, ka bɛ daa gbaala n nuu ni n-vo ma tahi Damaskus.

¹²“Do’ so ŋun yuli daa booni Ananias ka o nyɛ wuntizɔra kaman Naawuni zaligu ni wuhi shɛm la daa nyɛla ŋun mali yu’ suŋ nimaani Yɛhudianim’ zaa sani.

¹³Ŋuna n-daa ka n sanna nti zani baɣili ma ka yɛli, ‘M mabia Sool, a nina maa neema!’ Ka n nina naa daa dii neei di saha maa, ka n nya o.

¹⁴Ka o yɛli ma, ‘Ti yaannim’ Naawuni m-piig’ a ni a baŋ o yubu ka nya ŋun nyɛ yɛlimaŋlilana n-wum o nol’ ni yɛligu;

¹⁵dama a ni nya ka wum shɛli ŋɔ zuɣu a ni niŋ o shɛhiralana sokam zaa sani.’

¹⁶O ni daa yɛl’ lala maa ka ŋmaligi bɔhi ma, ‘Dinzuɣu bɔ ka a lee lan guhira? Yiɣisima n-deei kom baptaizibu ka kuhi boli ti Duuma yuli ka a daalahichi kpihim.’ ”

¹⁷Pool daa lan yɛli, “N ni daa ti lab’ Jɛrusalɛm na nti be Naawuni jɛmbu duu suhiri Naawuni saha shɛli

¹⁸ka n daa ti nya ʒii ka n Duuma yɛli ma, ‘Zom’ yom yi Jɛrusalɛm, dama bɛ ku deeg’ a shɛhira zaŋ chaŋ m polo.’

¹⁹Ka n yɛli, ‘N Duuma, bɛ zaa mi ni n daa kpe Yɛhudianim’ jɛmbu duu kam ni nti gbahi ninvuɣ’ shɛb’ bɛn niŋ a yɛda m-bu ba ka kpɛhi ba duu.

²⁰ Bɛ ni daa ti ku a dabili Stiivin la, n gba daa be bɛ ni ka yu o kubu maa, ka daa gbib’ bɛn ku o maa binyɛra.’

²¹Ka n Duuma yɛli ma, ‘Kul yim’ chaŋ, dama n yɛn tim a la katiŋ’ ha bɛn pa Yɛhudianim’ sani.’ ”

²²Salo maa ni daa wum Pool yɛtɔɣa maa viɛnyɛliŋga hal ti paai o ni yoli yɛli shɛm ŋɔ ka bɛ duhi bɛ yee yɛra, “Kumiy’ o! Kumiy’ o! Dama nira ŋ-ŋɔ tatabo bi simdi ni o be.”

²³Bɛ ni daa kuhiri yɛri lala maa ka bɛ mali bɛ binyɛra gahiri ka toori taŋkpaɣu yaɣindi zuɣusaa.

²⁴Ka sapashin’ kpɛm’ maa daa yɛli ni bɛ zaŋm’ o kpɛhi tɔbbihi biɛhigu shee ka bɛ ti fiɛb’ o n-vih’ o baŋ din chɛ ka niriba maa tahiri pampam o zuɣu maa.

²⁵Bɛ ni daa zaŋ gbantolima lo Pool naai ka o bɔhi sapashin’ so ŋun daa ʒe nimaani, “Di luhiya ni yi fiɛbi Rom tiŋbia ka na bi kar’ o saria ŋ-ŋmaag’ o yɛtɔɣa?”

²⁶Sapashini maa ni daa wum Pool ni yɛli shɛm maa ka o chaŋ ti bɔhi sapashin’ kpɛm’ la, “Tuun’ bɔ ka a lee yɛn tum ŋɔ? Doo maa nyɛla Rom tiŋbia!”

²⁷Di saha maa ka sapashin’ kpɛm’ maa daa chaŋ ti bɔhi Pool, “Yɛlim’ ma, a shiri nyɛla Rom tiŋbia?” Ka Pool saɣi, “Iin!”

²⁸Ka sapashin’ kpɛm’ maa yɛl’ o, “N daa yihila liɣiri pam da Rom tiŋbitali.” Ka Pool yɛl’ o, “Bɛ kul dɔɣila mani Rom tiŋbia.”

²⁹Di saha ka bɛn daa yɛn vih’ o maa dii yiɣis’ o sani yi; ka dabiɛm daa kpe sapashin’ kpɛm’ maa gba o ni daa baŋ ni Pool nyɛla Rom tiŋbia ka o lo o zoligɔnim’ lala maa zuɣu.

³⁰Ka biɛɣu daa neei ka sapashin’ kpɛm’ maa bɔri ni o baŋ daliri din chɛ ka Yɛhudianim’ zaŋ o taali n-fiɣis’ o maa, ka daa lɔrig’ o ka tim ti boli maligumaaniba kpamba mini jintɔriba zaa ni bɛ laɣimna. Di saha ka o daa zaŋ Pool ti zali bɛ tooni.