Read Dagbani Tuma 23 Bible Online

Tuma 23 - Dagbani bible

Tuma 23

¹Ka Pool daa mirig’ o nina kpa jintɔriba maa ka yɛli, “M mabihi, m bilim ni hal ni zuŋɔ n suhu ni tɛha nyɛla din tuhi Naawuni sani.”

²Ka maligumaaniba zuɣulana ŋun yuli daa booni Ananias yɛli bɛn ʒe m-miri Pool maa ni bɛ ŋmɛm’ o naŋgbani.

³ Ka Pool daa yɛl’ o, “Naawuni ni ŋme nyin’ dukpin’ piɛlli ŋɔ! A ʒinimi ni a kari ma saria kaman zaligu ni wuhi shɛm, ka ti yaɣi zaligu maa zuɣu yɛli ni bɛ ŋmɛm’ ma?”

⁴Ka bɛn daa ʒe nimaani bɔh’ o, “Naawuni maligumaaniba zuɣulana ka a tu lala maa?”

⁵ Ka Pool garigi yɛli, “M mabihi, m bi mi ni o nyɛla maligumaaniba zuɣulana; dama di sabiya, ‘Miri ka a tɔɣisi yɛtɔɣ’ biɛri n-dalim a zuliya zuɣulana.’ ”

⁶ Pool ni daa baŋ ni jintɔriba maa ni shɛb’ nyɛla Sadusiinima ka shɛb’ mi nyɛla Farisiinim’ la zuɣu ka o daa kuhi yɛli jintɔriba laɣiŋgu maa ni, “M mabihi, n nyɛla Farisiinim’ bia, ka mmaŋmaŋ’ gba nyɛ Farisii. Ka n ni mali tahima ni kpiimba ni ti neei kum ni la zuɣu ka bɛ kariti ma saria ŋɔ.”

⁷O ni daa yɛl’ lala maa ka Farisiinim’ mini Sadusiinim’ maa daa gbaai tab’ naŋgbankpeeni ŋmɛbu, ka jintɔriba maa noya daa woli taba.

⁸ Dama Sadusiinim’ daa wuhiri niriba ni kpiimba kum ni neebu kani, ka lan yɛri ni malaikanim’ bee shihi gba kani, amaa ka Farisiinima bɛn’ daa wuhiri ni di zaa beni.

⁹Ka vuri daa mɔni, ka Naawuni zaligubaŋdi’ shɛb’ bɛn nyɛ Farisiinim’ daa yiɣisi zani n-zaɣisi ka yɛli, “Ti bi nya doo ŋɔ galimi ni nyɛ shɛli. Di pa shɛli shi’ so bee malaika n-shiri tɔɣis’ o di yɛla.”

¹⁰Naŋgbankpeeni maa ni daa mali ti mooi nini saha shɛli ka sapashin’ kpɛm’ maa zɔri ni bɛ ti bu Pool n-chɛrisi o nimdi gari taŋkpaɣu ni zuɣu daa chɛ ka o yɛli tɔbbihi ni bɛ cham’ ti fa Pool bɛ sani n-zaŋ o tahi bɛn’ tɔbbihi maa biɛhigu shee.

¹¹Dindali maa yuŋ ka ti Duuma daa kana nti zani baɣili Pool yɛl’ o, “Chɛ ka a suhu kpɛma, dama a ni niŋ n shɛhiralana Jɛrusalɛm ŋɔ shɛm, lala ka a ni ti niŋ n shɛhiralana Rom gba.”

¹²Ka biɛɣu daa neei ka Yɛhudianim’ shɛb’ lo nia ni bɛ ku Pool, ka daa laɣim po pɔri ni shee bɛ ku Pool ni di yi pa lala bɛ ku di bee n-nyu.

¹³Bɛn daa po pɔri maa daa gari ninvuɣ’ pihinahi.

¹⁴Ka bɛ daa chaŋ maligumaaniba kpamba mini tiŋ’ maa ni kpamba sani ti yɛli ba, “Ti pola pɔri ni shee ti ku Pool, di yi pa lala ti ku di shɛli.”

¹⁵Dinzuɣu yi mini jintɔriba timmiya ti yɛli sapashin’ kpɛm’ maa ni o sa zaŋm’ Pool tahi yi sanna, ka di be kaman yi bɔrimi ni yi vihi baŋ o yɛtɔɣa maa kpaa shee viɛnyɛliŋga la. Ti mali shili ni ti ti ku o ka o na bi paai yi sanna.

¹⁶Ka Pool ŋahiŋga daa wum bɛ ni to jina gbaai shɛm maa, ka chaŋ ti kpe tɔbbihi biɛhigu shee maa nti zaŋ yɛlli maa yɛli Pool.

¹⁷Ka Pool daa boli sapashinnim’ ni yino na ti yɛl’ o, “Zaŋm’ nachimbil’ ŋɔ tahi sapashin’ kpɛm’ sani; o malila yɛtɔɣ’ shɛli ni o yɛl’ o.”

¹⁸Ka sapashini maa daa zaŋ o tahi sapashin’ kpɛm’ maa sani ti yɛl’ o, “Dansarika so ŋun yuli booni Pool la m-boli ma nti yɛli ma ni n zaŋ nachimbil’ ŋɔ tahi a sanna ni o malila yɛtɔɣ’ shɛli ni o yɛl’ a.”

¹⁹Ka sapashin’ kpɛm’ maa daa gbaai nachimbil’ maa nuu ni n-zaŋ o yi kpaŋa nti bɔh’ o ashilɔni, “Yɛtɔɣ’ bɔ ka a mali ni a yɛli ma?”

²⁰Ka o yɛl’ o, “Yɛhudianim’ to jina n-naai noli ni bɛ suh’ a ka a sa zaŋ Pool tahi jintɔriba sanna biɛɣu ni, ka di be kaman bɛ bɔrimi ni bɛ vihi baŋ o yɛtɔɣa maa kpaa shee viɛnyɛliŋga la.

²¹Dinzuɣu di wum bɛ yɛligu maa, dama bɛ niriba gari ninvuɣ’ pihinahi do sol’ ni gu o. Bɛ laɣimmi po pɔri ni shee bɛ ku Pool ni di yi pa lala bɛ ku di bee n-nyu. Ka pumpɔŋɔ bɛ guhirila a nol’ ni yɛligu.”

²²Ka sapashin’ kpɛm’ maa daa yɛli nachimbil’ maa, “Miri ka a yɛli so ni a kana ti yɛli ma yɛlli maa.” Ka daa chɛ ka o yi n-kuli.

²³Ka sapashin’ kpɛm’ maa daa boli sapashinnima ayi na ti yɛli ba, “Malimiya shili n-zaŋ tɔbbihi kɔbisiyi mini wɔribariba pisopɔin ni kpan’ ŋmɛriba kɔbisiyi m-pa yimaŋ’ zuɣu ka yiɣisi kpe kurigu awɛi saha yuŋ ŋɔ n-chaŋ Siizaria.

²⁴Ka bo wɔr’ shɛb’ Pool ni ti yɛn ba n-zali, ka mal’ o baalim tahi Gomna Filiksi sani.”

²⁵Ka o daa sab’ gbaŋ zaŋ chaŋ yɛlli maa polo pahi ba. O ni daa sab’ yɛli shɛm m-bɔŋɔ:

²⁶“Man’ Klɔdius Lisias n-sab’ gbaŋ ŋɔ m-puhiri n dan’ Gomna Filiksi.

²⁷Yɛhudianim’ n-daa gbaai do’ so n ni tahi a sanna ŋɔ n-yɛn ku o, ka n daa wum ni o nyɛla Rom tiŋbia ka daa zaŋ tɔbbihi chaŋ ti fa o bahi.

²⁸Ka n daa bɔri ni m baŋ bɛ ni gbaag’ o shɛli zuɣu, ka zaŋ o tahi bɛ jintɔriba sani

²⁹nti nya ka di nyɛla bɛ zaligu dolibu zuɣu ka bɛ daa fiɣis’ o, amaa ka o mi bi tum taal’ shɛli din simdi ni bɛ ku o bee n-kpɛh’ o duu.

³⁰Ka n ti wum lahibali ni Yɛhudianim’ dɔni n-gu o soli, dinzuɣu ka n chɛ ka bɛ tah’ o a sanna yomyom maa; ka yɛli bɛn fiɣisir’ o maa ni bɛ kam’ a sanna nti yɛl’ a bɛ ni fiɣisir’ o shɛli zuɣu maa.”

³¹Ka tɔbbihi maa daa niŋ sapashin’ kpɛm’ maa ni wuhi ba shɛm maa n-zaŋ Pool yuŋ m-mali ti paai Antipatiris.

³²Ka biɛɣu daa neei, ka tɔbbihi maa chɛ Pool ti wɔribariba la ni bɛ zaŋ o tahi, ka bɛn’ daa ŋmaligi lab’ bɛ biɛhigu shee.

³³Bɛ ni daa ti paai Siizaria ka bɛ zaŋ Pool ti zali Gomna maa tooni, ka zaŋ gbaŋ maa ti o.

³⁴O ni daa karim gbaŋ maa naai ka o bɔhi ni luɣ’ dini ka Pool lee yina. O ni daa wum ni o yila Kilikia na

³⁵ka o yɛl’ o, “Dindina bɛn fiɣis’ a maa n-ni kana ka n naanyi wum a nol’ ni.” Ka daa yɛli ni bɛ zaŋm’ o ti niŋ Naa Hɛrɔd yiŋa n-gul’ o.