Read Dagbani Tuma 26 Bible Online

Tuma 26 - Dagbani bible

Tuma 26

¹Di saha ka Naa Agiripa daa yɛli Pool, “M bah’ a noli ni a tɔɣisi zabi amaŋ’ zuɣu.” Ka Pool daa teeg’ o nuu ka piligi tɔɣisiri ni o chih’ omaŋ’ noli yɛra,

²“Naa, n tɛhi ni n nyɛla zuɣusuŋlana n ni zan’ a tooni zuŋɔ ni n tɔɣisi chihi mmaŋ’ noli Yɛhudianim’ ni fiɣisiri ma yɛl’ shɛŋa zaa zuɣu la,

³di bahi bamdi a ni nyɛ ŋun mi Yɛhudianim’ kaya mini bɛ naŋgbankpeeni ŋmɛbu ni nyɛ shɛm yɛla zuɣu. N suhir’ a ni a niŋ suɣilo wum n yɛtɔɣa ŋɔ:

⁴“M bilim ni n daa bela mmaŋmaŋ’ tindɔɣirili ni mini Jɛrusalɛm; ka di saha zaŋ kana zuŋɔ Yɛhudianim’ zaa mi m bebu ni nyɛ shɛm.

⁵ Bɛ mi ma ka di yuui, ka hal bɛ yi ni saɣi tɔɣisi yɛlimaŋli, bɛ mi ni n daa doli Farisiinim’ daadiini soli din dolibu kpɛm’ pam la.

⁶N ni mali Naawuni ni daa lo ti yaannim’ alikauli shɛl’ la tahima zuɣu ka n ʒe kpe ŋɔ saria karibu shee pumpɔŋɔ ŋɔ.

⁷Alikauli maa zuɣu ka ti zuliya pinaayi jɛmdi Naawuni yuŋ ni wuntaŋ’ ni, ka mali tahima ni ti ti nya di palibu. Naa, tahima maa zuɣu ka Yɛhudianim’ ŋmari ma tiŋŋmaŋ maa.

⁸Bɔ n-niŋ ka yi ku tooi niŋ yɛda ni Naawuni neeri kpiimba?

⁹“Mmaŋmaŋ’ daa tɛhi ni di luhiya ni n tum shɛlikam chihi Yisa Nazarɛt nira yuli.

¹⁰Lala ka n daa shiri niŋ Jɛrusalɛm. Maligumaaniba kpamba daa ti ma yiko, ka n gbahi Yisa nyaandoliba pam ti kpɛhi duu, amaa pa lala kɔŋko ka n daa niŋ. Bɛ ni daa ti yɛn ku bɛ ni shɛb’ la n gba daa ʒiɛla bɛn yɛn ku ba maa nyaaŋa.

¹¹ N daa niŋdi ba alaka waawaayili Yɛhudianim’ jɛmbu duu kam ni, ka kpaŋdi mmaŋa ni m muɣisi ba ka bɛ tu Yisa. N suhu ni daa yiɣisi bahi bɛ zuɣu pam maa zuɣu ka n daa du tin’ duya ni ni m paai ba nimaani ti niŋ ba alaka.

¹²“Naa, ka n daa ti deei yiko maligumaaniba kpamba sani m-be soli chani Damaskus;

¹³di daa nyɛla wuntaŋ’ zuɣusaa saha, ka n ti nya neesim din ne pam gari wuntaŋa ka di yi zuɣusaa na ti neei gili m mini bɛn daa laɣim chani maa soli maa ni.

¹⁴Ka ti zaa daa lu tiŋa, ka n wum ka kukol’ shɛli yɛri ma Hiburuli ni, ‘Sool, Sool, bɔ n-niŋ ka a niŋdi ma alaka? Di to ni a tabigi gɔhi.’

¹⁵Ka m bɔhi, ‘Ŋuni n-lee bala, n Duuma?’ Ka o yɛli, ‘Man’ Yisa so a ni niŋdi alaka maa m-bala.

¹⁶Yiɣisim’ zani, dama daliri ŋɔ zuɣu ka n yi a zuɣu ni n zal’ a ka a leei n tumo, ka niŋ a ni nya ma ni shɛlikam ŋɔ mini n ni na yɛn wuh’ a shɛli shɛhiralana.

¹⁷N ni tilig’ a a niriba mini bɛn pa Yɛhudianim’ shɛb’ sani n ni timd’ a maa nuu ni.

¹⁸N timd’ a la bɛ sani ni a ti neei bɛ nina ka bɛ yi zibisim ni kpe neesim ni, ka yi Sintani nuu ni kpe Naawuni nuu ni n-nya bɛ daalahichi chɛ m-paŋ, ka nya zaashee Naawuni ninvuɣ’ gahinda sunsuuni bɛ ni niŋ man’ Yisa yɛda zuɣu.’ ”

¹⁹“Naa, dinzuɣu ka n daa bi zaɣisi Naawuni ni wuhi ma shɛli ʒii maa puuni la.

²⁰ N daa piligi di molo molibu la Damaskus n-yi ni chaŋ Jɛrusalɛm ni Judia tiŋkpansi zaa ni zaŋ tabili bɛn pa Yɛhudianim’ sani n-yɛri ni bɛ niŋm’ tuuba ŋ-ŋmaligi lab’ Naawuni sani, ka tum tuun’ shɛŋa din ni wuhi ni bɛ shiri niŋ tuuba.

²¹Yɛla ŋɔ zuɣu ka Yɛhudianim’ daa gbaai ma Naawuni jɛmbu duu m-bɔri ni bɛ ku ma la.

²²Dindali maa zaŋ na hal ni zuŋɔ Naawuni n-kul sɔŋdi ma, dinzuɣu ka n ʒe kpe n-diri di shɛhira wɔɣira mini tarimba sani n-kul yɛrila Anabi Musa min’ anabinim’ ni daa yɛli ni shɛli ni ti niŋ pali la yɛla kɔŋko.

²³ Dina n-nyɛ ni di nyɛla talahi ni Masia di wahala n-leei ŋun tuui neei kum ni, ka moli tiliginsim lahibal’ suŋ Yɛhudianim’ mini bɛn pa Yɛhudianim’ sani n-neei bɛ nina.”

²⁴Pool ni daa tɔɣisiri ni o zab’ omaŋ’ zuɣu maa, ka Gomna Fɛstus ti duh’ o yee yɛl’ o, “Pool, di ni bɔŋɔ a kpɛla yinyari! A baŋsim pam zuɣu n-chɛ ka a kpe yinyari maa!”

²⁵Ka Pool yɛl’ o, “N dana, m bi kpɛla yinyari, amaa nimmaŋtali yɛtɔɣa mini yɛlimaŋli ka n yɛra.

²⁶Dama Naa mi yɛla ŋɔ zaa, di zuɣu ka n tɔɣisiri li bahiri mmaŋa o sani maa; yɛla ŋɔ zaa shɛli bi sɔɣi o sani, dama di daa bi niŋla ashilɔni.”

²⁷Ka ŋmaligi bɔhi Naa Agiripa, “Naa, a niŋ anabinim’ yɛligu yɛda? M mi ni a niŋ bɛ yɛligu yɛda.”

²⁸Di saha ka Naa Agiripa yɛli Pool, “Di ni bɔŋɔ a tɛhiya ni a ni lɛbigi ma Kristiɛn saha biɛla ŋɔ puuni!”

²⁹Ka Pool garigi yɛl’ o, “Di yi nyɛla saha biɛla bee pam puuni, pa a kɔŋko gba, amaa bɛn zaa be kpe n-wumdi n yɛligu ŋɔ, n di bi zaɣisi ni yi zaa be kaman n ni be shɛm ŋɔ kul gbaai yihila zoligɔnim’ din lo ma ŋɔ.”

³⁰O ni daa yɛl’ lala maa ka Naa Agiripa mini Bɛɛnis ni Gomna Fɛstus ni bɛn zaa daa ʒi bɛ sani yiɣisi yi.

³¹Bɛ ni daa yi maa ha ka bɛ yɛli taba, “Doo maa bi tum tuun’ shɛli din simdi kum bee sarika kpɛhibu.”

³²Ka Naa Agiripa yɛli Gomna Fɛstus, “Doo maa yi di bi yɛli ni o ni zaŋ o yɛtɔɣa maa chaŋ Naa Siiza sani, nir’ naan tooi zaŋ o bahi kpe.”