Read Dagbani Tuma 4 Bible Online

Tuma 4 - Dagbani bible

Tuma 4

¹Pita mini Jɔn ni daa na kul wuhiri niriba maa saha shɛli maa ka maligumaaniba mini Naawuni jɛmbu duu tuumba kpɛma ni Sadusiinim’ dii vana ti zani bɛ tooni

²ni suhuyiɣisili, Yisa nyaandoliba ayi maa ni daa wuhiri niriba n-yɛri ni Yisa ni neei kum ni maa zuɣu kum ni neebu beni la zuɣu.

³Ka bɛ daa gbahi ba nti kpari duu ni biɛɣ’ neei, dama di daa nyɛla zaawun’ yuŋ.

⁴Ka niriba pam bɛn daa wum bɛ wuhibu maa niŋ yɛda. Dɔbba kɔŋko daa nyɛla kaman ninvuɣ’ tusaanu laasabu.

⁵N-daa yi biɛɣu ka Yɛhudianim’ zuɣulaannim’ mini bɛ kpamba ni Naawuni zaligubaŋdiba ni maligumaaniba zuɣulan’ Annas mini Kaiafas nti pahi Jɔn mini Alikizanda ni bɛnkam daa nyɛ maligumaaniba zuɣulan’ dɔɣiriba zaa daa laɣim Jɛrusalɛm.

⁷Bɛ ni daa laɣim maa ka bɛ yihi Yisa tuumba ayi maa na nti zali bɛ sunsuuni m-bɔhi ba, “Ŋun’ yiko bee ŋun’ yuli ka yi lee zaŋ tum yi ni tum tuun’ shɛli ŋɔ?”

⁸Di saha ka Naawuni Shia Kasi daa kpe m-pali Pita ka o yɛli ba, “Yinim’ bɛn nyɛ zuɣulaannim’ mini kpamba ŋɔ,

⁹zuŋɔ dabisili ŋɔ yi yi vihiri ti mi ni yi baŋ tuun’ sun shɛli din sa tum ti gbarigu ŋɔ ka o kpaŋ maa,

¹⁰dindina yi mini Izraɛlnim’ zaa yin’ baŋmiya ni Yisa Masia Nazarɛt ninvuɣ’ so yi ni daa kpahi tabili dapulli zuɣu ka Naawuni neeg’ o kum ni la yuli zuɣu ka do’ so ŋun yi nyɛ gbarigu ŋɔ ti ʒe yi sani ni alaafee ŋɔ.

¹¹ Di sabi Yisa maa yɛla Naawuni Kundi ni yɛli: ‘Kuɣ’ shɛli yinim’ tammɛriba ŋɔ ni daa zaɣisi la n-yipa leei kuɣ’ gahindili.’

¹²Tiliginsim mi lan ka so sani yaha, dama Naawuni bi lan zaŋ so yuli ti ti dunia ŋɔ ni ka di zuɣu ni chɛ ka ti tiligi.”

¹³Bɛ ni daa nya Pita mini Jɔn suhukpeeni, ka mi ni bɛ nyɛla tarimba ni zuɣusabila maa ka di gari ba pam, ka bɛ baŋ ni bɛ mini Yisa n-daa be.

¹⁴M-pahi bɛ ni daa nya ka do’ so ŋun kpaŋ maa ʒe bɛ sani maa zuɣu ka bɛ daa naan ku tooi ŋme ba naŋgbankpeeni.

¹⁵Lala zuɣu ka bɛ daa yɛli Yisa tuumba ayi maa ni bɛ na yim’ kpaŋ pɔi. Ka jintɔriba maa daa niŋ tab’ saawara

¹⁶yɛli, “Ka wula ka ti lee yɛn niŋ niriba ŋɔ? Yɛlimaŋli, bɛ tum alahiziba tuun’ karili ka Jɛrusalɛmnim’ zaa nya li, ka ti ku tooi chihi li.

¹⁷Amaa ti ni yɛn niŋ shɛm ka di ku moli gili m-bɔŋɔ: Chɛliya ka ti kpɛhi ba dabiɛm pam ni bɛ miri ka bɛ lan boli Yisa yuli n-tɔɣisi o yɛla so sani.”

¹⁸Ka bɛ daa boli ba na nti yɛli ba ni bɛ miri ka bɛ lan boli Yisa yuli n-tɔɣisi o yɛla so sani baabiɛla gba.

¹⁹Amaa ka Pita mini Jɔn bɔhi ba, “Naawuni sani, di luhiya ni ti wumla yi noli bee ŋun’ Naawuni dini? Yɛlimiya ti!

²⁰Dama tinim’ ku tooi chɛ ti ni daa nya ka wum shɛli maa yɛla tɔɣisibu.”

²¹Ka jintɔriba maa daa lan kpɛhi ba dabiɛm pahi, ka bahi ba ka bɛ chaŋ. Bɛ daa ʒi bɛ ni yɛn niŋ shɛm darigi bɛ tibili, dama bɛ daa zɔrila niriba dabiɛm, sokam zaa ni daa paɣiri Naawuni tuun’ shɛli din tum ka bɛ nini nya maa zuɣu la.

²²Do’ so ŋun daa nya alahiziba tibbu maa yuma daa gari yuun’ pihinahi.

²³Bɛ ni daa zaŋ Pita mini Jɔn bahi maa ka bɛ chaŋ bɛ nyaandolitab’ sani nti yɛli ba maligumaaniba kpamba mini tiŋ’ maa ni kpamba maa ni yɛli ba shɛm zaa.

²⁴ Bɛ ni daa wum lala maa ka bɛ zaa laɣim duhi bɛ yɛhi n-suhiri Naawuni yɛra, “Zallakudura Naa ŋun nam zuɣusaa mini tiŋgbani ni teeku ni binshɛɣukam zaa din be di ni ŋɔ,

²⁵ nyini n-daa chɛ ka a dabili ti yab’ Naa Dauda yaag’ o noli Naawuni Shia Kasi yiko ni yɛli: ‘Bɔzuɣu ka bɛn pa Yɛhudianim’ jɛri suli tahira, ka zuliya kam tɔri jin’ yoya?

²⁶Dama dunia ŋɔ nanim’ lo tɔbu, ka nazuɣuri laɣim n-zaɣisi ti Duuma Naawuni min’ o Masia.’

²⁷ Yɛlimaŋli, Naa Hɛrɔd mini Pɔntius Pailɛt ni chɛfirinim’ zaŋ tabili Izraɛlnim’ zaa daa shiri laɣim ya n-zaɣisi a Wundab’ Suŋ Yisa, a ni daa zaŋ so leei Masia

²⁸ni bɛ niŋ o kaman a ni daa pun lo shɛm a yiko ni min’ a milinsi ni la, dama di daa ʒe o la lala.

²⁹Ti Duuma, nyam’ bɛ ni kpɛhi ti dabiɛm shɛm. Chɛ ka tinim’ bɛn nyɛ a daba ŋɔ na kul tɔɣisim’ a yɛligu ni suhukpeeni,

³⁰ka chɛ ka a nuu din mali yiko ŋɔ chɛri ka barinim’ kpaŋda, ka chɛ ka shihira mini alahiziba tumtumsa tumdi a Dab’ Suŋ Yisa yuli zuɣu.”

³¹Bɛ ni daa suhi Naawuni maa nti fo ka bɛ laɣiŋgu maa shee ti gbaai dambu, ka Naawuni Shia Kasi kpe m-pali bɛ zaa, ka bɛ tɔɣisiri Naawuni yɛligu ni suhukpeeni.

³² Bɛn daa niŋ Yisa yɛda maa zaa daa malila suhu yini ni tɛhi’ yini, ka bɛ ni so daa bi yɛli ni o ni su shɛli nyɛla o kɔŋko dini, amaa bɛ zaa daa laɣim sula bɛ ni mali binshɛɣukam zaa.

³³Ka Yisa tuumba la daa tɔɣisiri ti Duuma Yisa kum ni neebu yɛla ni yiko pam; ka Naawuni daalibarika pam daa be bɛ zaa ni.

³⁴Shɛli daa bi poori bɛ ni so, dama bɛnkam daa mali puri bee yiya daa kɔhi li mi n-zaŋ di liɣiri maa zaa na

³⁵nti sɔŋ Yisa tuumba maa tooni, ka bɛ pirigiri li n-tiri bɛ ni sokam kaman di ni simdi ni bɛ zaa deei shɛm tariga.

³⁶Lala ka Yisifu so tuumba maa ni daa ti yuli Baanabas[2] la daa niŋ. O daa nyɛla Saipurus tiŋbia, ka nyɛ Lɛvi zuliya ni nira.

³⁷O gba daa zaŋ o puu kɔhi n-zaŋ di liɣiri ti sɔŋ Yisa tuumba maa tooni.