Read Dagbani Tuma 6 Bible Online

Tuma 6 - Dagbani bible

Tuma 6

¹Saha shɛli Yisa nyaandoliba kalinli ni daa ti kul zoori pahiri biɛɣukam la, ka bɛ ni Yɛhudianim’ bɛn wumdi Giriikili daa ti ŋumdi bɛ kparima ni niŋdi Yɛhudianim’ bɛn nyɛ Jɛrusalɛm tiŋbihi la. Bɛ pakoya ni daa bi nyari bɛ ni pirigiri bindir’ shɛŋa tiri ba sahakam la zuɣu ka bɛ daa mɔhiri vuri maa.

²Ka Yisa tuumba pinaayi la daa boli Yisa nyaandol’ bɔbili maa na ti yɛli ba, “Di bi simdi ni tinim’ chɛ Naawuni yɛligu tɔɣisibu ka kpalim bindira taribu ni.

³Dinzuɣu ti mabihi, piimiya yi ni niriba ayopɔin shɛb’ Shia Kasi ni pali, ka bɛ mali shɛhira suma ka lan mali yɛm pam, ka ti chɛ ka bɛ su tuma ŋɔ fukumsi;

⁴amaa tinim’ ni zaŋ ti dahima zaa n-niŋla Naawuni suhibu min’ o yɛligu tɔɣisibu tuma ni.”

⁵Ka tuumba maa ni daa yɛli shɛm maa tiɣi salo maa zaa nini, ka bɛ daa pii Stiivin ŋun mali yɛda pam ka Shia Kasi pal’ o la mini Filip ni Prokɔrus ni Nikano ni Timɔn ni Parimɛnas ni Nikolaus ŋun daa nyɛ Antiɔk nira ka daa chɛ o chɛfiritali soli ka doli Yɛhudianim’ daadiini sol’ la

⁶n-zaŋ ba zali tuumba maa tooni, ka bɛ zaŋ bɛ nuhi pa bɛ zuɣu suhi Naawuni ti ba.

⁷Ka Naawuni yɛligu daa maan chaŋ tooni, ka nyaandoliba maa kalinli daa zooi pahi Jɛrusalɛm puuni hal ka maligumaaniba pam gba daa niŋ Yisa yɛda.

⁸Ka Naawuni daalibarika min’ o yiko daa pali Stiivin ka o tumd’ alahiziba tumtumsa ka wuhiri shihira pam niriba maa ni.

⁹Yɛhudianim’ daa mal’ adiini jɛmbu du’ shɛli bɛ ni daa booni Bilichinnim’[3] jɛmbu duu. Di ni niriba bɛn daa nyɛ Yɛhudianima n-yi Sairiini mini Alikizandria ni bɛn daa yi Kilikia ni Ɛsha na n-daa laɣim ŋmɛri Stiivin naŋgbankpeeni;

¹⁰amaa bɛ daa bi tooi tɔɣisi luh’ o, dama o daa tɔɣisirimi ni yɛm mini Naawuni Shia Kasi yiko.

¹¹Dina n-daa chɛ ka bɛ bo niriba ashilɔni n-yɛli ba ni bɛ yɛlim’ ni bɛ wum ka Stiivin turi Anabi Musa ka mɔri Naawuni.

¹²Lala ka bɛ daa niŋ yiɣisi niriba mini bɛ kpamba ni Naawuni zaligubaŋdiba suhuri, ka bɛ daa kabina nti gbaai Stiivin tahi jintɔriba sani,

¹³ka zaŋ ʒiri shɛhiranim’ maa na ka bɛ ti yɛli, “Doo ŋɔ kul galindila Naawuni jɛmbu duu luɣ’ shɛli din be kasi shee la mini Anabi Musa zaligu;

¹⁴dama ti wum ka o yɛli ni Yisa Nazarɛt nir’ la ni wurim Naawuni jɛmbu duu maa, ka taɣi ka’ shɛŋa Anabi Musa ni daa zali ni ti dol’ la.”

¹⁵Ka bɛn daa ʒi nimaani maa zaa mirigi bɛ nina kpa o, ka nya o ninni ka di ŋmanila malaika ninni.