Read Dagbani Tuma 8 Bible Online

Tuma 8 - Dagbani bible

Tuma 8

¹Sool gba nuu daa be Stiivin kubu maa ni. Ka wuntizɔriba daa zaŋ Stiivin ti sɔɣi, ka kum o kuli pam. Dindali maa zaŋ chana ka bɛ daa gbaai Yisa nyaandoliba bɛn daa be Jɛrusalɛm la alaka niŋbu; ka bɛ zaa daa wurim chaŋ ti kpe Judia mini Samaria tiŋgbana ni, kulla Yisa tuumba la kɔŋko n-daa naɣ’ kpalim.

³ Sool n-daa nyɛ ninvuɣ’ so ŋun niŋdi Yisa nyaandoliba maa alaka maa; o daa dolila yiya n-gbahiri dɔbba mini paɣiba bɛn daa nyɛ Yisa nyaandoliba nti kpɛhiri duu.

⁴Ka bɛn daa wurim maa daa chani gindi luɣilikam n-yihiri Yisa lahibal’ suŋ waazu.

⁵Ka Filip daa chaŋ Samaria nti yihiri waazu yɛri ba ni Yisa n-nyɛ Masia.

⁶Samarianim’ maa ni daa wum Filip yɛligu ka nya o ni wuhiri shihir’ shɛŋa maa zuɣu ka bɛ daa deeg’ o yɛligu maa ni suhu yini.

⁷Alizin’ biɛri daa kuhirimi ka zɔri ka chɛri bɛ ni ʒi ninvuɣ’ shɛb’ zuɣu, ka bɛn bɔɣiri mini bɛ gbaya daa kpi ni gbariti pam daa nya alaafee.

⁸Ka tiŋ’ maa ni nim’ suhuri daa paligi pam.

⁹Do’ so daa beni ka o yuli booni Saimɔn, o daa warila bukpahigu ka wuhir’ omaŋa ni o nyɛla wɔɣirili, ka o yɛla daa mali Samarianim’ alahiziba pam.

¹⁰Ka tiŋ’ maa ni nanim’ mini tarimba zaa daa kul kpalim lihirila ŋuna ka yɛra, “Yiko shɛli ti ni booni Naawuni yiko tital’ la be doo ŋɔ ni.”

¹¹Ka bɛ daa zaŋ bɛ zaɣa zaa niŋ o ni, dama o daa pun chɛ ka o bukpahitali maa tabibi tuma niŋ ba alahiziba pam ka di wɔɣa.

¹²Amaa bɛ ni daa ti wum ka Filip yihi Naawuni nam mini Yisa Masia yuli waazu maa ka bɛ dɔbba mini paɣiba daa niŋ yɛda ka deei kom baptaizibu.

¹³Hal Saimɔn maŋmaŋ’ gba daa niŋ yɛda ka deei kom baptaizibu; di nyaaŋa ka o daa zaŋ omaŋ’ tabili Filip n-nyari shihira mini alahiziba tuun’ shɛŋa din daa niŋdi maa, ka di gar’ o pam.

¹⁴Ka Yisa tuumba bɛn daa be Jɛrusalɛm la daa wum ni Samarianim’ deei Naawuni yɛligu, ka daa tim Pita mini Jɔn bɛ sani.

¹⁵Ka bɛ daa paai nti suhi Naawuni ti ba ni bɛ deei Naawuni Shia Kasi,

¹⁶dama bɛ daa pun deei kom baptaizibu ti Duuma Yisa yuli ni, amaa ka na lee bi deei Naawuni Shia Kasi.

¹⁷Di saha ka Pita mini Jɔn daa zaŋ bɛ nuhi pa bɛ zuɣu ka bɛ deei Naawuni Shia Kasi.

¹⁸Saimɔn ni daa nya ka tuumba maa zaŋ bɛ nuhi pa bɛ zuɣu ka bɛ deei Naawuni Shia Kasi maa zuɣu ka o daa bɔ liɣiri ni o ti ba

¹⁹ka yɛra, “Timiya ma yiko ŋɔ, ka n gba zaŋdi n nuhi pari niriba zuɣu ka bɛ deeri Naawuni Shia Kasi.”

²⁰Amaa ka Pita daa garigi yɛl’ o, “A min’ a liɣiri maa zaa bahim’ yoli! Dama a tɛhiya ni a ni tooi zaŋ liɣiri da Naawuni pini.

²¹A bi kpini shɛli yɛla ŋɔ ni, a mi nuu ka di ni, dama a suhu bi ʒe yim ni Naawuni.”

²²Ka daa lan yɛl’ o, “Dinzuɣu niŋm’ tuuba a biɛribiɛtali ŋɔ zuɣu ka suhi Naawuni; di pa shɛli o ni chɛ a tɛhi’ biɛri din nyɛ alahichi maa paŋ a.

²³Dama n nya ka a mali putɔɣu, ka be alahichi bandi ni.”

²⁴Ka Saimɔn kuhi yɛli, “Suhim’ ti Duuma ti ma, ka yɛla ŋɔ zaa miligi n zuɣu.”

²⁵Pita mini Jɔn ni daa niŋ shɛhira ka tɔɣisi ti Duuma yɛligu naai maa ka bɛ daa doli Samaria tiŋkpansi pam chani yihiri Yisa lahibal’ suŋ waazu n-labiri kuni Jɛrusalɛm.

²⁶Ka ti Duuma malaika daa ti yɛli Filip, “Yiɣisima n-dol’ a nudirigu polo mɔɣu ni pal’ shɛli din yiri Jɛrusalɛm kuni Gaza la.”

²⁷Ka o daa yiɣisi chaŋ. Ka Itiɔpia namɔɣili so ŋun daa su Kandɛse ŋun daa nyɛ Itiɔpia napaɣ’ la azichi fukumsi daa chaŋ Jɛrusalɛm ti jɛm Naawuni,

²⁸ka ʒi o chɛchɛbuŋ’ lɔɣu ni n-labiri kuni ka karindi Anabi Aizaia litaafi.

²⁹Ka Naawuni Shia Kasi daa yɛli Filip, “Guumi paai chɛchɛbuŋ ŋɔ lana.”

³⁰Ka Filip daa guui paag’ o sani nti wum ka o karindila Anabi Aizaia litaafi. Ka Filip bɔh’ o, “A baŋ a ni karindi litaafi shɛli maa gbinni?”

³¹Ka o garigi yɛl’ o, “Wula ka n lee ni tooi baŋ di gbinni, ka pa ni so n-dolisi ma?” Ka daa yɛli Filip ni o kpɛm’ o chɛchɛbuŋ’ lɔɣu maa ni na ti ʒin’ o sani.

³²O ni daa karindi litaafi shɛli maa daa sabi yɛlila ŋ-ŋɔ: “Bɛ daa zaŋ o mi tahi kaman bɛ ni tahiri piɛɣu o kɔrigibu shee shɛm la bee kaman bɛ ni chɛri piɛbil’ so kɔbiri, ka o bi yaar’ o nol’ la.

³³ Bɛ daa mɔŋ o yɛlimaŋli o muɣisigu maa ni. Ka ŋuni n-lee ni tooi yɛli o zuliya yɛla? Dama bɛ daa di o nyɛvili dunia ŋɔ ni.”

³⁴Ka namɔɣili maa daa bɔhi Filip, “Ŋun’ yɛla ka Anabi maa lee yɛri maa, omaŋmaŋ’ yɛla bee so yɛla?”

³⁵Di saha ka Filip daa zaŋ litaafi maa ni luɣ’ shɛli o ni karim maa n-gbaag’ o Yisa lahibal’ suŋ waazu yihibu.

³⁶Bɛ ni daa chani maa ka bɛ mali ti paai ko’ shɛli, ka namɔɣili maa yɛl’ o, “Nyam’ kom ŋɔ! Bɔ n-lee ni chɛ ka n ku deei kom baptaizibu?” [

³⁷Ka Filip yɛl’ o, “A yi niŋ yɛda ni a suhu zaa, a ni tooi deei.” Ka namɔɣili maa yɛli, “N niŋ yɛda ni Yisa Masia nyɛla Naawuni Bia.”]

³⁸Ka o daa chɛ ka chɛchɛbuŋ’ maa zani; ka o mini Filip zaa yi n-chaŋ ti siɣi kom maa ni, ka Filip baptaiz’ o.

³⁹Bɛ ni daa yi kom maa ni na maa ka ti Duuma Shia Kasi daa kpuɣi Filip chaŋ, ka namɔɣili maa bi lan nya o, ka mi daa ŋmaligi chaŋ o chandi ni suhupiɛlli.

⁴⁰Ka bɛ daa ti nya Filip la Azɔtus, ka o doli nimaani tinsi n-yihiri Yisa lahibal’ suŋ waazu hal ti paai Siizaria.