Read Dagbani Rom 10 Bible Online

Rom 10 - Dagbani bible

Rom 10

¹M mabihi, n suhu zaa yuya ni mmaŋmaŋ’ zuliya tiligi, ka n kul suhiri Naawuni tiri ba di zuɣu.

²N di ba shɛhira ni bɛ suhuri ye Naawuni zuɣu, amaa ka bɛ Naawuni bɔbu milinsi maa lee bi doli soli.

³Bɛ ni ʒi taali ni yibu Naawuni sani soli ka dolila bɛmaŋmaŋ’ ni bɔri so’ shɛli ni bɛ yi taali ni Naawuni san’ la zuɣu ka bɛ daa bi zaŋ bɛmaŋ’ kpɛhi taali ni yibu Naawuni sani sol’ la dolibu ni.

⁴Dama Masia n-chɛ ka Naawuni fukumsi zaligu maa ʒiɛmani zan’ tariga ni di chɛ ka ŋunkam niŋ yɛda yi taali ni Naawuni sani.

⁵ Anabi Musa daa sab’ taali ni yibu Naawuni sani soli din yi Naawuni fukumsi zaligu dolibu ni na yɛla n-wuhi ni ŋunkam doli Naawuni fukumsi zaligu ni wuhi shɛm zaa ni nya nyɛvili di zuɣu.

⁶ Amaa zaŋ chaŋ taali ni yibu Naawuni sani din yi yɛda niŋbu ni na polo di sabiya: Di bɔhi a suhi ni, “Ŋuni n-lee ni du alizanda ni?” (Di gbinni nyɛla, “Nti zaŋ Masia siɣina”).

⁷Bee m-bɔhi, “Ŋuni n-lee ni siɣi tiŋgban’ ni? (Di gbinni nyɛla, “Nti neei Masia kum ni na”).

⁸Di ni sab’ shɛm m-bɔŋɔ: Naawuni yɛligu mir’ a; hal di be a nol’ ni min’ a suhu ni. (Dina n-nyɛ, “Yɛda niŋbu yɛtɔɣ’ shɛli waazu ti ni yihiri la”).

⁹Ka a yi yaag’ a noli yɛli ni Yisa nyɛla a Duuma, ka niŋ yɛda a suhu ni ni Naawuni daa neeg’ o kum ni, a ni tiligi.

¹⁰Dama nir’ niŋdila yɛda o suhu ni, ka yi taali ni Naawuni sani; ka yaag’ o noli kahigi wuhi palɔni, ka tiligi.

¹¹ Naawuni Kundi yɛliya, “Ŋunkam niŋ o yɛda ku di vi.”

¹²Yɛhudianim’ bi be bɛ ko ka chɛ bɛn pa Yɛhudianima; kulla Duuma yino n-nyɛ bɛ zaa Duuma, ka o niŋdi alibarika din galisi n-niŋdi bɛnkam kuhiri boon’ o ni.

¹³ Di bemi kaman di ni sab’ shɛm la, “Ŋunkam kuhi boli ti Duuma yuli ni tiligi.”

¹⁴Ka wula ka niriba lee ni tooi kuhi boli bɛ ni bi niŋ so yɛda? Bee wula ka bɛ lee ni tooi niŋ bɛ ni na bi wum so yɛla yɛda? Bee wula ka bɛ lee ni tooi wum ka pa ni waazuyihira m-beni?

¹⁵ Ka wula ka niriba lee ni tooi yihi waazu, ka pa ni bɛ tim ba mi? Di nyɛla kaman di ni sab’ shɛm la: “Bɛn mali lahibal’ suŋ waazu na ni bɛ ti yihi ŋɔ paabuna tiri suhupiɛlli.”

¹⁶ Amaa bɛ zaa bi deei lahibal’ suŋ maa. Anabi Aizaia bɔhiya, “Ti Duuma, ŋuni n-lee niŋ o ni wum shɛli ti sani maa yɛda?”

¹⁷Dinzuɣu yɛda niŋbu yirila bɛ ni wum shɛl’ ni na, ka bɛ ni wum shɛli maa mi yirila Masia yɛla waazu yihibu ni na.

¹⁸ M bɔhirila bɔhigu ŋɔ: “Bɛ daa bi wum?” Bɛ daa wumya ni yɛlimaŋli; dama di sabiya: “Bɛ kukoya damli gili dunia ŋɔ zaa; ka bɛ yɛtɔɣa paai dunia ŋɔ tarisi zaa.”

¹⁹ N ni lan bɔhi bɔhigu ŋɔ pahi: “Izraɛlnim’ daa bi baŋ?” Anabi Musa n-nyɛ ŋun tuui garigi. O daa yɛli ni Naawuni yɛliya: “N ni chɛ ka yi zab’ zuliya shɛb’ bɛn pa zuliya maŋli nyuli; ka chɛ ka yi suhuri yiɣisi bahi zuliya shɛb’ bɛn nyɛ jɛra zuɣu.”

²⁰ Ka Anabi Aizaia daa niŋ suhukpeeni gari lala yɛli ni Naawuni yɛliya: “Ninvuɣ’ shɛb’ bɛn daa bi yuuni bɔri ma la nya ma; n zaŋ mmaŋ’ wuhi ninvuɣ’ shɛb’ bɛn daa bi bɔhi n yɛla.”

²¹ Amaa zaŋ chaŋ Izraɛlnim’ polo, Naawuni yɛliya: “Biɛɣ’ asiba zaŋ hal ni yuŋ ka n kul teegi n nuhi n-gahiri booni tipawumlinim’ bɛn nyɛ duntaariba ŋɔ.”