Read Dagbani Rom 13 Bible Online

Rom 13 - Dagbani bible

Rom 13

¹Di simdi ni sokam doli nam fukumsinim’ yɛligu; dama nam fukumsi nir’ kani ka pa ni Naawuni n-zal’ o, ka nam fukumsi din beni nyɛla Naawuni ni zali shɛli.

²Dinzuɣu ŋunkam zaɣisi nam fukumsinim’ yɛligu dolibu zaɣisila Naawuni ni zali shɛli, ka ninvuɣ’ shɛb’ bɛn niŋdi lala ni bo tibidarigibo ti bɛmaŋa.

³Ninvuɣ’ shɛb’ bɛn tumdi tuun’ suma bi zɔri nam fukumsinim’ dabiɛm, amaa bɛn tumdi tuun’ biɛri n-zɔri ba dabiɛm. A bɔri ni a ku zɔri ŋun be nam fukumsi ni dabiɛm? Dindina tummi din viɛla, ka a ni nya paɣibu o sani,

⁴dama o nyɛla Naawuni ni zali so a sɔŋsim zuɣu. Amaa a yi tum birigi, nyin’ zom’ dabiɛm, dama o bi sula fukumsi maa yoli; o nyɛla Naawuni ni zali so ni o zaŋ ŋun’ Naawuni suhuyiɣisili darigi bɛn tum birigi tibili.

⁵Dinzuɣu di niŋ kamaata ni nir’ doli ŋun be nam fukumsi ni yɛligu, ka di pa ni o yi Naawuni suhuyiɣisili tibidarigibo ni kɔŋko zuɣu, amaa o suhu ni tɛha gba dɔnibu zuɣu.

⁶Daliri ŋɔ zuɣu ka yi yɔri lampoo gba zuɣu, dama nam fukumsinim’ nyɛla Naawuni tumtumdiba bɛn tuma nyɛ ni bɛ niŋ lala.

⁷ Niŋmiya bɛ ni zali ya ni yi niŋ shɛlikam: Ŋun simdi ni a yo lampoo zuɣu o sani, nyin’ yom’ o; ka ŋun deerila farigu, nyin’ tim’ o; ka ŋun simdi ni a lu o sizuura, nyin’ lum’ o sizuura; ka ŋun mi simdi ni a ti o jilima, nyin’ tim’ o jilima.

⁸Di chɛliya ka sam’ shɛli doli ya n-naɣ’ pahila tab’ yubu samli, dama ŋunkam yur’ o ʒiʒiinikpee nyɛla ŋun pali Naawuni fukumsi zaligu ni wuhi shɛm.

⁹ Naawuni fukumsi zaligunim’ maa m-bɔŋɔ: “Miri ka a niŋ zina. Miri ka a ku ninsala. Miri ka a zu. Miri ka a chɛ ka a kɔre kpe a kpee bin’ ni.” Dimbɔŋɔnim’ mini zaligu shɛŋa din kpalim zaa bela yɛtɔɣ’ yini ŋɔ puuni. Dina n-nyɛ: “Yum’ a ʒiʒiinikpee kaman amaŋmaŋ’ la.”

¹⁰Yurilim bi chɛ ka nir’ tumd’ o ʒiʒiinikpee zaɣ’ biɛɣu, dinzuɣu yurilim nyɛla din paani Naawuni fukumsi zaligu ni wuhi shɛm.

¹¹Din pahi dimbɔŋɔ zuɣu, yi mi ni pumpɔŋɔ nyɛla nimmoo saha ka di simdi ni yi neei gom ni, dama pumpɔŋɔ ka tiliginsim miri ti n-gari ti ni daa tuui niŋ yɛda saha shɛl’ la.

¹²Di kpalim biɛla ka yuŋ gari, ka di ku yuui ka biɛɣu neei. Chɛliya ka ti chɛ zibisim tuma, ka zaŋ bidibbina n-tuhi tɔbu neesim ni.

¹³Ka chɛliya ka ti chɛ ka ti biɛhigu be dɛde kaman bɛn be neesim ni, ka pa ni bɛn tumdi yoliyoli bee n-nyuri dam kuuna. Ti miri ka ti tum niŋgbuŋ kɔre tuma mini zina balibu kam. Ti mi miri ka ti bɔri zabili bee n-zabiri nyuli.

¹⁴Amaa ti doliyala ti Duuma Yisa Masia biɛrisuŋ la soli, ka di bo so’ shɛli ti ni ni doli n-tum niŋgbuŋ kɔre tuma.