Read Dagbani Rom 14 Bible Online

Rom 14 - Dagbani bible

Rom 14

¹Deemiya ninvuɣ’ so ŋun yɛda bi kpɛm’ Naawuni dolibu ni, amaa ka di niŋy’ o naŋgbankpeeni o ni chihiri shɛli zuɣu.

²Ninvuɣ’ so beni n-diri binshɛɣukam, ka ninvuɣ’ so ŋun yɛda bi kpɛm’ mi kul dirila bindir’ gahinda.

³Ka ŋun diri binshɛɣukam miri ka o ʒiɛm ŋun gbaar’ omaŋa ni di dibu, ka ŋun gbaar’ omaŋ’ maa mi miri ka o ti ŋun diri shɛlikam zalige; dama Naawuni deei dilana gba.

⁴Ka ŋuni n-lee nyɛ a ka a tiri ninvuɣ’ so dabili zalige? O zanibu bee o lubu nyɛla o duuma yɛla. Ka o shiri ni zani, dama ti Duuma Naawuni ni tooi chɛ ka o zani.

⁵Ninvuɣ’ so beni n-tɛhi ni dabisi’ shɛli so di kpee, ka so mi beni n-tɛhi ni dabisa zaa nyɛla yim. Chɛliya ka sokam doli o ni tɛhi shɛm omaŋmaŋ’ suhu ni.

⁶ Ŋun gbib’ dabisi’ shɛli, o gbib’ li mi n-tiri ti Duuma jilima. Ka ŋun diri binshɛɣukam, o diri li mi n-tiri ti Duuma jilima, o ni paɣiri Naawuni di zuɣu la zuɣu; ka ŋun gbaar’ omaŋa ni binshɛɣukam dibu, o niŋdi lala n-tirila ti Duuma jilima ka paɣiri Naawuni di zuɣu.

⁷Ti ni so bi be omaŋmaŋ’ zuɣu, ka ti ni so mi bi kpiri omaŋmaŋ’ zuɣu.

⁸Ti yi be, ti Duuma zuɣu ka ti be; ka ti yi kpi, ti Duuma zuɣu ka ti kpi; dinzuɣu ti yi bemi bee ti yi kpimi, ti Duuma n-su ti.

⁹Dama daliri din chɛ ka Masia daa kpi ka lan neei kum ni nyɛla ni di chɛ ka o leei bɛn kpi mini bɛn ne Duuma.

¹⁰ Ka bɔzuɣu ka a tir’ a kpee zalige bee bɔzuɣu ka a ʒiɛmd’ a kpee? Dama ti zaa ni ti zani Naawuni tooni ka o kari ti saria

¹¹ kaman di ni sab’ shɛm la: Ti Duuma yɛliya, “N ni be ŋɔ zuɣu, sokam ni ti gbani n tooni, ka sokam ti yaag’ o noli m-paɣi man’ Naawuni.”

¹²Dinzuɣu ti zaa ni ti kahigi ti tuma ni nyɛ shɛm wuhi Naawuni.

¹³Dinzuɣu di chɛliya ka ti lan tiri ti tab’ zalige, yi mi di chɛliya ka ti tum din ni gu ti kpee soli bee n-chɛ ka o tuui lu.

¹⁴N Duuma Yisa zuɣu, m mi ka biɛhiŋ kani ni binshɛɣ’ kani m-mali daɣiri dimaŋmaŋ’ puuni, amaa so yi tɛhi ni binshɛli mali daɣiri, o sani di shiri mali daɣiri.

¹⁵Ka a ni diri binshɛli zuɣu yi chɛ ka a kpee suhu miligi, dindina a bi doli yurilim soli. Di chɛ ka a ni diri binshɛli zuɣu chɛ ka Yisa Masia ni kpi a kpe’ so zuɣu bahi yoli.

¹⁶Dinzuɣu di chɛ ka din nyɛ zaɣ’ suŋ a sani leei niriba ni galindi shɛli.

¹⁷Dama Naawuni nam pala bindira mini binnyura yɛla, amaa di nyɛla wuntia mini suhudoo ni suhupiɛlli yɛla Naawuni Shia Kasi zuɣu.

¹⁸Ka Naawuni nini ni tiɣi ŋun jɛmdi Masia lala, ka ninsalinim’ gba ni di o shɛhira suŋ.

¹⁹Dinzuɣu chɛliya ka ti doli din ni chɛ ka naŋgban’ yini be ti sunsuuni mini din ni kpaŋsi tab’ suhuri.

²⁰Di zaŋya bindira dibu yɛla saɣim Naawuni tuma. Binshɛli kani n-chihiri dibu, amaa di nyɛla taali ni so chɛ ka o ni diri binshɛli zuɣu chɛ ka o tab’ lu.

²¹Di bi tuhi ni nir’ ŋubi nimdi bee n-nyu dam bee n-niŋ binshɛli din ni chɛ ka o kpee tuui lu.

²²Chɛ ka a ni niŋ yɛda shɛm a suhu ni be a mini Naawuni sunsuuni. Ninvuɣ’ so ŋun tɛha bi chihir’ o suhu o ni niŋdi shɛli zuɣu mali suhupiɛlli.

²³Amaa ŋunkam mali biɛhiŋ zaŋ chaŋ o ni diri shɛli polo ka diri li mali taali o ni niŋdi shɛli maa ni bi yi yɛda niŋbu ni na zuɣu, dama binshɛɣukam din bi yi yɛda niŋbu ni na nyɛla alahichi.