Read Dagbani Rom 4 Bible Online

Rom 4 - Dagbani bible

Rom 4

¹Wula ka ti lee ni yɛli ti yab’ Ibrahimma so zuliya ni ti ni yila na yɛla?

²Dama ti yab’ Ibrahimma yi daa yi taali ni Naawuni sani la o tuma zuɣu, o daa naan mal’ li kuuna, amaa ka pa ni Naawuni sani.

³ Wula ka Naawuni Kundi lee yɛli? Di yɛliya, “Ibrahimma daa niŋ Naawuni yɛda, ka Naawuni daa lih’ o niŋsim maa ka di nyɛla wuntia.”

⁴Ninvuɣ’ so ŋun tumdi tuma yɔri pala pini, amaa di nyɛla o tuma yɔri.

⁵Ninvuɣ’ so ŋun mi bi tumdi tuma, amaa ka niŋ ŋun chɛ ka alahichilana yiri taali ni Naawuni sani yɛda, Naawuni zaŋd’ o gba zaani wuntia zaani o yɛda niŋbu maa zuɣu.

⁶Lala ka Naa Dauda gba wuhi alibarika shɛli din be ninvuɣ’ so ni Naawuni ni lihi wuntizɔra, ka di pala o tuma zuɣu. O ni yɛli shɛm m-bɔŋɔ:

⁷“Naawuni ni chɛ ninvuɣ’ shɛb’ tuumbiɛri taali paŋ ba min’ o ni kpihim shɛb’ daalahichi mal’ alibarika.

⁸ Ti Duuma ni chɛ ninvuɣ’ so daalahichi taali paŋ o ka bi lan maani di laasabu mal’ alibarika.”

⁹Naawuni daa niŋ alibarika ŋɔ niŋla bɛn guni kɔŋko ni bee o daa niŋ li niŋ bɛn bi guni gba ni? Ti pun yɛli ni Naawuni daa zaŋ ti yab’ Ibrahimma zali wuntia zaani la o yɛda niŋbu zuɣu.

¹⁰Bɔ saha ka o daa zaŋ o zali wuntia zaani maa? Ti yab’ Ibrahimma ni daa na bi guni saha shɛl’ la bee o gunibu la nyaaŋa ka Naawuni daa zaŋ o zali di ni maa? Di nyɛla o ni daa na bi guni saha shɛl’ la, ka pa ni o ni daa gun’ la nyaaŋa.

¹¹ O gunibu maa daa nyɛla Naawuni ni daa zaŋ o zali wuntia zaani o yɛda niŋbu maa zuɣu ka o na bi guni la shihirili bee di dalinli. Di daliri daa nyɛla ni di chɛ ka ti yab’ Ibrahimma leei bɛn bi guni, amaa ka niŋ yɛda la yaba, ka Naawuni zaŋ bɛ gba zali wuntia zaani bɛ yɛda niŋbu zuɣu.

¹²O lan nyɛla bɛn guni gba yaba, ka di pala bɛ ni guni maa kɔŋko zuɣu, amaa ka di lee nyɛla bɛ gba ni niŋ yɛda kaman ti yab’ Ibrahimma ni daa na bi guni ka niŋ yɛda shɛm la zuɣu.

¹³ Naawuni daa lo ti yab’ Ibrahimma min’ o zuliya alikauli ni bɛ ni ti su dunia ŋɔ. Di daa pala o ni doli Naawuni fukumsi zaligu zuɣu ka Naawuni daa lo o alikauli maa, amaa o ni daa niŋ yɛda ka Naawuni zaŋ o zali wuntia zaani la zuɣu.

¹⁴ Ka di yi nyɛla Naawuni fukumsi zaligu dolibu zuɣu ka niriba diri Naawuni daalikauli maa nyɔri, dindina ninsal’ yɛda niŋbu ka buchi, ka Naawuni daalikauli maa gba ka buchi.

¹⁵Naawuni fukumsi zaligu tahirila Naawuni suhuyiɣisili na, dama zaligu yi kani di chihibu gba ku beni.

¹⁶ Alikauli maa lɔbu yila yɛda niŋbu ni na ni di chɛ ka alikauli maa tam Naawuni daalibarika zuɣu n-leei ti yab’ Ibrahimma yaansi zaa dini; ka di pala bɛn doli Naawuni fukumsi zaligu kɔŋko dini, amaa di nyɛla bɛn niŋ yɛda kaman ti yab’ Ibrahimma ni daa niŋ yɛda shɛm la gba dini, dama Ibrahimma n-nyɛ ti zaa ha yaba.

¹⁷ Di bemi kaman di ni sab’ shɛm la ni Naawuni yɛliya, “N ni zaŋ a leei zuliya pam yaba.” Dinzuɣu alikauli maa nyɛla din kul ʒiɛya ti yab’ Ibrahimma ni daa niŋ Naawuni so yɛda maa sani. Ŋuna n-nyɛ ŋun neeri kpiimba kum ni, ka chɛ ka binshɛŋa din kani be.

¹⁸ Ti yab’ Ibrahimma daa niŋ yɛda ka mali tahima saha shɛli di ni daa to ni o niŋ tahima ni o ni leei zuliya pam yaba kaman Naawuni ni daa lo o alikauli yɛli, “A zuliya ni ti galisi pam la.”

¹⁹ Ti yab’ Ibrahimma daa nyɛla yuun’ kɔbiga nira, ka di zuɣu chɛ ka o niŋgbuŋ gbarigi zaa, ka o paɣa Zara daa nyɛ paɣiŋoo, amaa di zaa yoli, o daa bi chɛ ka o yɛda gbarigi di zuɣu.

²⁰O daa bi biɛhim Naawuni daalikauli hal baabiɛla. O ni daa kul tibigiri Naawuni maa puuni ka o yɛda daa kul niŋdi kpiɔŋ pahira,

²¹dama o daa niŋ yɛda ka biɛhiŋ kani ni Naawuni ni tooi niŋ o ni daa lo o alikauli ni o ni niŋ shɛl’ la.

²²Dina n-chɛ ka o daa zaŋ ti yab’ Ibrahimma zali wuntia zaani o yɛda niŋbu zuɣu.

²³Di ni yɛli ni o daa zaŋ o zali wuntia zaani o yɛda niŋbu zuɣu la daa bi sabi zalila ti yab’ Ibrahimma kɔŋko zuɣu,

²⁴amaa di daa sabila ti gba zuɣu. Naawuni ni zaŋ tinim’ bɛn niŋ ŋun’ Naawuni ŋun daa neei ti Duuma Yisa kum ni yɛda ŋɔ gba zali wuntia zaani ti yɛda niŋbu zuɣu.

²⁵ Ŋun’ Yisa n-daa kpi ti daalahichi zuɣu ka lan neei kum ni ni di chɛ ka ti yi taali ni Naawuni sani.