Read Dagbani Rom 8 Bible Online

Rom 8 - Dagbani bible

Rom 8

¹Dinzuɣu ninvuɣ’ shɛb’ bɛn be Yisa Masia ni la yi taali ni.

²Dama Naawuni Shia Kasi zaligu din tahi nyɛvili din be Yisa Masia ni na nti ti ti la yihi ma alahichi mini kum zaligu taali ni.

³Naawuni tum fukumsi zaligu ni daa bi tooi tum shɛli daadam ninsalitali biɛhigu chɔɣinsi la zuɣu. O daa zaŋ daadam ninsalitali niŋgbuŋ din tumd’ alahichi ŋɔ tatabo ti omaŋmaŋ’ Bia n-tim o na ni ŋun’ Naawuni ti nya alahichi din be daadamnim’ ninsalitali biɛhigu ni la taali.

⁴Dimbɔŋɔ daa niŋmi ni di chɛ ka Naawuni fukumsi zaligu ni wuhi shɛm niŋ pali ti bebu puuni; dama ti nyɛla bɛn bi lan doli ti ninsalitali biɛhigu yubu, amaa ka naɣ’ dolila Naawuni Shia Kasi ni wuhiri ti shɛm.

⁵Dama ninvuɣ’ shɛb’ bɛn doli bɛ ninsalitali biɛhigu yubu zaŋ bɛ tɛha niŋla bɛ ninsalitali biɛhigu yubu maa yɛla ni, amaa ninvuɣ’ shɛb’ bɛn doli Naawuni Shia Kasi yubu zaŋ bɛ tɛha niŋla Naawuni Shia Kasi yɛla ni.

⁶Nir’ yi zaŋ o tɛha niŋ o ninsalitali biɛhigu yɛla ni, di bahigu ti nyɛla kum, amaa nir’ yi zaŋ o tɛha niŋ Naawuni Shia Kasi yɛla ni, di bahigu ti nyɛla nyɛvili mini suhudoo.

⁷Ninvuɣ’ so ŋun zaŋ o tɛha niŋ o ninsalitali biɛhigu yɛla ni nyɛla Naawuni dima, dama o bi doli Naawuni fukumsi zaligu, hal ka shiri ku tooi dol’ li.

⁸Ninvuɣ’ shɛb’ bɛn doli bɛ niŋgbuŋ biɛhigu ninsalitali yubu ku tooi tiɣi Naawuni nini.

⁹Amaa yinim’ bi doli yi ninsalitali biɛhigu ni wuhiri ya shɛm, ka Naawuni Shia Kasi yi shiri be yi ni, yi ni dolila Naawuni Shia Kasi yubu. Ka ninvuɣ’ so ŋun ka Masia Shia, o pala Masia ni su so.

¹⁰Amaa Masia yi be yi ni, hal yi niŋgbuna yi ni kpi alahichi zuɣu gba, yi shihi lee ni ne yi ni yi taali ni Naawuni san’ la zuɣu.

¹¹ Ka Naawuni ŋun daa neei Yisa kum ni la Shia yi be yi ni, ŋun’ Naawuni ŋun daa neei Yisa kum ni maa ni zaŋ nyɛvili niŋ yi gba niŋgbuna din kpiri ŋɔ ni, o Shia ŋun be yi ni la zuɣu.

¹²Dinzuɣu m mabihi, ti pala ti ninsalitali biɛhigu la sandiriba ni ti doli ti ninsalitali biɛhigu maa yubu ni wuhiri ti shɛm;

¹³dama yi yi doli yi ninsalitali biɛhigu yi ni kpi, amaa yi yi chɛ ka Naawuni Shia Kasi ku yi ninsalitali biɛhigu maa tuma yi ni, yi ni be.

¹⁴Bɛnkam doli Naawuni Shia Kasi ni wuhiri ba so’ shɛli, bɛna n-nyɛ Naawuni bihi.

¹⁵ Ka Naawuni ni zaŋ o Shi’ so tin ya maa pala ŋun ni zaŋ ya leei daba n-lan kpɛhiri ya dabiɛm yaha, amaa Naawuni Shia maa lee chɛ ka yi leerila Naawuni bihi. Ka ti kuhiri yɛra, “M Ba! M Ba!”

¹⁶Di nyɛla Naawuni Shia Kasi maŋmaŋa n-diri ti shɛhira ti suhuri ni ni ti nyɛla Naawuni bihi.

¹⁷ Ka ti yi nyɛla Naawuni bihi, dindina ti nyɛla o bindiriba. Ti nyɛla bɛn mini Masia laɣim nyɛ Naawuni bindiriba, tinim’ dee min’ o yi laɣim di wahala ni di chɛ ka ti min’ o ti laɣim nya jilima.

¹⁸N zahimya ni ti ni diri wahala shɛli pumpɔŋɔ ŋɔ bi saɣi shɛli ni ti zaŋ li buɣisi jilima shɛli Naawuni ni ti yɛn ti ti la.

¹⁹Binnamda zaa kul guhirimi ka bɛ suhuri kul ye saha shɛli Naawuni ni ti yɛn yih’ o bihi palɔni la zuɣu;

²⁰ dama binnamda zaa leela binchɔɣima, ka di pala binnamda maa yubu zuɣu. Naawuni ni yu ni di niŋ shɛm m-bala, amaa ka o lee ti binnamda maa tahima

²¹ni binnamda maa maŋmaŋ’ ti yi poobu dabitim ni kpe Naawuni ni zaŋ yolisim shɛli din mali jilima n-ti o bihi la ni.

²²Ti mi ni binnamda zaa kul ŋuhirimi ka wolisiri biɛrim zuɣu hal ni pɔŋɔ;

²³ ka di pala binnamda maa kɔŋko, amaa zaŋ tabili tinim’ bɛn daŋ deei Naawuni Shia Kasi ŋɔ gba kul ŋuhirimi ti suhuri ni n-guhiri saha shɛli Naawuni ni ti yɛn zaŋ ti zal’ o bihi zaani, ka fa ti niŋgbuna zaa bahi la.

²⁴Tahima ŋɔ puuni ka ti daa tiligi; amaa pa nir’ nini ni nya shɛli n-nyɛ tahima, dama ŋuni n-lee ni niŋ tahima o nini ni nya shɛli zuɣu?

²⁵Amaa ti yi niŋ tahima ti nini ni na bi nya shɛli zuɣu, dindina ti ni di suɣilo guhiri li.

²⁶Lala ka Naawuni Shia Kasi sɔŋdi ti ti chɔɣinsi ni, dama ti ʒi di ni simdi ni ti suhiri Naawuni shɛm, amaa Naawuni Shia Kasi maŋmaŋa n-deeri suhiri Naawuni ni ŋuhibu din ka yɛtɔɣa tiri ti.

²⁷Ka Naawuni ŋun vihiri ninsalinim’ suhuri mi din be o Shia Kasi tɛha ni, dama Naawuni Shia Kasi n-deeri suhiri tiri Naawuni ninvuɣ’ gahinda kaman Naawuni yubu ni nyɛ shɛm.

²⁸Ti mi ni zaŋ chaŋ ninvuɣ’ shɛb’ bɛn yuri Naawuni ka nyɛ o ni daŋ pii shɛb’ o nia lɔbu ni la sani, ŋun’ Naawuni chɛ ka binshɛɣukam niŋdila bɛ zaɣ’ viɛlli nyabu zuɣu.

²⁹Dama Naawuni ni zali shɛb’ maa, bɛna ka o zali ni bɛ be kaman o Bia la, ka di chɛ ka o Bia maa leei bikpɛma o mabihi pam ni.

³⁰Ka Naawuni ni zali shɛb’ maa, bɛna ka o boli; ka o ni boli shɛb’ maa, bɛna ka o chɛ ka bɛ yi taali ni ŋun’ Naawuni sani; ka o ni chɛ ka shɛb’ yi taali ni ŋun’ Naawuni sani maa, bɛna ka o chɛ ka bɛ nya o jilima.

³¹Dindina wula ka ti lee ni yɛli zaŋ chaŋ dimbɔŋɔ polo? Naawuni yi ʒe ti nyaaŋa, ŋuni n-lee nyɛ ŋun ni tooi zaŋ o nyɔɣu yo ti?

³²Naawuni ŋun daa bi zaɣisi ni omaŋmaŋ’ Bia kpi, amaa ka daa zaŋ o ti ti zaa ŋɔ, o ku zaŋ binshɛɣukam din kpalim zaa gba pah’ o zuɣu ti ti?

³³Ŋuni n-lee ni tooi fiɣisi Naawuni ninvuɣ’ gahinda? Naawuni n-nyɛ ŋun wuhi ni bɛ ka taali.

³⁴Ka ŋuni n-lee ni tooi nya bɛ taali? Yisa Masia n-nyɛ ŋun daa kpi; ka din gari lala nyɛla, ŋuna n-daa neei kum ni, ka ʒi Naawuni nudirigu polo n-suhiri Naawuni tiri ti.

³⁵Ŋuni n-lee ni tooi yihi ti Masia yurilim ni? Muɣisigu bee wahala bee alaka bee fifali bee gbinfini bee barina bee takɔbi ni tooi yihi ti di ni?

³⁶ Di bemi kaman di ni sab’ shɛm la: “Naawuni zuɣu ka ti be kum barina ni asiba hal nti paai yuŋ; bɛ lihi ti mi kaman piɛ’ shɛb’ bɛ ni kɔrita.”

³⁷Amaa di zaa yoli, ti di nasara yaɣi Masia ŋun yuri ti la zuɣu.

³⁸Dama m mi ka biɛhiŋ kani ni kum bee nyɛvili bee malaikanim’ bee alizinnim’ bɛn nyɛ zuɣulaannim’ mini bɛn su fukumsi bee binyara din be pumpɔŋɔ bee binyara din ti yɛn kana bee yikombiɛri

³⁹bee binyara din be zuɣusaa bee binyara din be tiŋgbani puuni bee binshɛŋa din be binnamda puuni zaa shɛli ku tooi yihi ti Naawuni yurilim din be ti Duuma Yisa Masia ni la ni.