Read Dagbani 1 Kɔrintinima 11 Bible Online

1 Kɔrintinima 11 - Dagbani bible

1 Kɔrintinima 11

¹ M biɛhigu ni be kaman Masia biɛhigu la zuɣu, chɛliya ka yi gba biɛhigu be kaman m biɛhigu.

²M paɣiri ya, dama yi teeri n yɛla binshɛɣukam zaa puuni, ka doli kal’ shɛŋa n ni zaŋ wuhi ya la.

³Amaa m bɔri ni yi baŋ ni doo kam zuɣulana nyɛla Masia; ka paɣ’ zuɣulana nyɛ o yidana; ka Masia mi zuɣulana nyɛ Naawuni.

⁴Doo kam ŋun suhiri Naawuni bee n-tɔɣisir’ anabitali yɛtɔɣa, ka zaŋ bini pil’ o zuɣu ʒiɛmdila o zuɣu;

⁵amaa paɣ’ kam ŋun suhiri Naawuni bee n-tɔɣisir’ anabitali yɛtɔɣa, ka bi zaŋ bini pil’ o zuɣu ʒiɛmdila o zuɣu, ka di bemi kaman o pin’ la o zuɣu maa la.

⁶Paɣ’ yi zaɣisi ni o zaŋ bini pil’ o zuɣu, dindina di simdi ni o chɛ o zabiri m-bahi; amaa di yi nyɛ vi ni paɣ’ chɛ o zabiri bee m-pini, ŋun’ bom’ bini m-pil’ o zuɣu.

⁷ Di bi simdi ni doo zaŋ bini pil’ o zuɣu, dama o nyɛla Naawuni kɔtomsi min’ o jilima, ka paɣ’ mi nyɛ doo jilima.

⁸Dama pa paɣ’ ni ka doo yina, amaa doo ni ka paɣ’ ŋun’ yina.

⁹ Pa doo ka Naawuni daa nam ti paɣa, amaa paɣ’ ka Naawuni daa nam ti doo.

¹⁰Lala zuɣu ka di simdi ni paɣ’ zaŋ bini pil’ o zuɣu malaikanim’ zuɣu, ka di wuhi ni so su o fukumsi.

¹¹Amaa ti Duuma sani, paɣ’ ku tooi be omaŋmaŋ’ zuɣu ka chɛ doo, ka doo gba ku tooi be omaŋmaŋ’ zuɣu ka chɛ paɣa;

¹²dama kaman Naawuni ni daa yihi paɣa doo ni na shɛm, lala zuɣu ka paɣ’ gba dɔɣiri doo pumpɔŋɔ. Amaa binshɛɣukam zaa nyɛla Naawuni ni nam shɛli.

¹³Yimaŋmaŋ’ buɣisimiya yɛlli ŋɔ: Di simdi ni paɣ’ suhuri Naawuni ka bi zaŋ bini pil’ o zuɣu?

¹⁴Ninsalinim’ biɛhigu soli wuhiri ya ni doo yi mali zab’ wɔɣila di nyɛla vi,

¹⁵amaa paɣ’ ŋun’ yi mali zab’ wɔɣila, di pahir’ o la jilima. Dama Naawuni ti o zabiri maa la o zuɣu pilibu zuɣu.

¹⁶Amaa so yi bɔri ni o ŋme dimbɔŋɔ naŋgbankpeeni, ti ka kal’ shɛŋa pahi di zuɣu, ka Naawuni cheechinim’ gba lan ka kal’ shɛŋa pahi di zuɣu.

¹⁷M bi paɣiri ya n ni yɛn wuhi ya wuhibu shɛli ŋɔ puuni, dama yi yi laɣim di bi sɔŋdi ya, amaa di naɣ’ saɣindi ya mi.

¹⁸Tuuli, n daa wumya ni yi yi mali cheechi laɣiŋgu, woligibu be yi sunsuuni, ka n tɛhiri ni di shiri nyɛla yɛlimaŋli.

¹⁹Biɛhiŋ kani, di nyɛla talahi ni woligibu kpe yi sunsuuni n-chɛ ka di kahigi wuhi bɛn nyɛ yɛlimaŋlinim’ ni nyɛ shɛb’ yi ni.

²⁰Yi yi ti laɣim taba, di pala ti Duuma bindirigu dibu zuɣu ka yi laɣim;

²¹dama yi dibu ni, sokam kpaɣirimi dira, ka kum mali shɛba ka shɛb’ mi nyu m-buɣi.

²²Di chaŋ wula? Yi ka yinsi din ni di ka nyu nimaani bee yi ʒiɛmla Naawuni cheechi ka dihiri bɛn ka shɛl’ la gba vi? Ka wula ka n lee yɛn yɛli ya? N ni paɣi ya dimbɔŋɔ zuɣu? Aai! N ku paɣi ya!

²³N ni daa deei shɛli n Duuma san’ la, dina ka m mali wuhiri ya ŋɔ: Dahin shɛli yuŋ bɛ ni daa yi ti Duuma nyaaŋa la, ka o daa kpuɣi bɔrɔbɔro

²⁴n-niŋ alibarika niŋ di ni, ka ŋmahiŋmahi li ka yɛli, “N niŋgbun shɛli n ni zaŋ pa talima yi zuɣu m-bala. Niŋmiya dimbɔŋɔ teemi n yɛla.”

²⁵ Bindirigu maa dibu nyaaŋa ka o daa zaŋ wain pipia ka yɛli, “Dimbɔŋɔ nyɛla Naawuni daalikauli palli n ʒim ni. Kul nyumiya li waawaayili teemi n yɛla.”

²⁶Dinzuɣu yi yi kul ŋubiri bɔrɔbɔro ŋɔ ka nyuri pipia ŋɔ ni binnyurigu ŋɔ, yi wuhirila ti Duuma kum yɛla hal ni o ti labina.

²⁷Ka ŋunkam ŋubiri bɔrɔbɔro ŋɔ ka nyuri ti Duuma pipia ŋɔ ni binnyurigu ŋɔ ka bi doli so’ shɛli din tiri Naawuni jilima di ni, o ni mali taali zaŋ chaŋ ti Duuma niŋgbuŋ min’ o ʒim polo.

²⁸Dinzuɣu chɛliya ka sokam zahim omaŋ’ pɔi ka naanyi ŋub’ bɔrɔbɔro ŋɔ ka nyu pipia ŋɔ ni binnyurigu ŋɔ.

²⁹Dama ŋunkam zaa ŋubiri li ka nyuri li ka bi zahim baŋ ti Duuma niŋgbuŋ yɛla gbinni, o ŋubiri li ka nyuri li bɔrila tibidarigibo tir’ omaŋa.

³⁰Dimbɔŋɔ zuɣu ka yi ni shɛb’ pam gbarigi ka ka alaafee, ka shɛb’ mi kpi.

³¹Ti yi zahim timaŋa ni yɛlimaŋli, dindina ti ku lan nya saria karibu.

³²Amaa ti Duuma yi kariti ti saria, o darigirila ti tibili ni ti di pahi dunianim’ zuɣu bahi yoli.

³³Dinzuɣu m mabihi, yi yi ti laɣim ni yi di ti Duuma Bindirigu maa, yin’ guhimiya taba.

³⁴Kum yi mali so, ŋun’ dim’ yiŋ’ pɔi ka di chɛ ka yi ku nya tibidarigibo yi laɣiŋgu ni. Zaŋ chaŋ yɛl’ shɛŋa din kpalim polo, n yi ti kana, n ni wuhi ya di gba yɛla.