Read Dagbani 1 Kɔrintinima 16 Bible Online

1 Kɔrintinima 16 - Dagbani bible

1 Kɔrintinima 16

¹ Pumpɔŋɔ zaŋ chaŋ tɔto tɔhi ti Yisa nyaandoliba la polo, m bɔri ni yi gba niŋ li kaman n ni daa wuhi cheechinim’ din be Galɛshia tiŋgbɔŋ ni shɛm la.

²Bakɔi piligu dabisili dali kam, sokam zaa yihim’ kaman Naawuni ni lɔrig’ o shɛm tariga na ti zali, ka di chɛ ka n ti kana ka laɣ’ tɔhibu yɛla ku lan beni yaha.

³Ka n yi ti kana, ka yi pii yi ni ninvuɣ’ shɛba n-sab’ gbana ti ba, n ni chɛ ka bɛ zaŋ yi pini maa tahi Jɛrusalɛm.

⁴Ka di yi ti simdi ni n gba chaŋ, n ni pahi bɛ zuɣu ka ti chaŋ.

⁵ N lɔri nia ni n chaŋ Masidɔnia tiŋgbɔŋ ni, ka n yi ti chaŋ nimaani, di nyaaŋa n ni gari ka yi sanna.

⁶Di pa shɛli n ni ti kpalim yi sani hal ka kikaa ti gari, di nyaaŋa ka yi ti sɔŋ ma ka n chaŋ luɣ’ shɛli n ni ti yɛn chaŋ.

⁷M bi bɔri ni n ti nyan ya la biɛla ka gari; ti Duuma yi saɣi n niŋdi tahima ni n ni ti yuui yi sani.

⁸ Amaa n ni kpalim be Ɛfɛsus hal ti paai Pɛntikɔst dali;

⁹ dama tuma so’ titali ka n nya kpe, ka sɔguriba pam mi lee beni.

¹⁰ Timoti yi ti ka yi sanna, yin’ deemiy’ o ni suhupiɛlli, dama o tumdila ti Duuma tuma kaman n ni tumdi shɛm.

¹¹So miri ka o ʒiɛm o, ka chɛliya ka o ti yi yi sani ni suhudoo lab’ n sanna, dama n kul lihirila o mini ti mabihi la soli.

¹²Zaŋ chaŋ ti mabia Apolɔs polo, m balim o pam ni o pahi ti mabihi la zuɣu ka yi sanna, ka o bi yu ni o ka yi sanna pumpɔŋɔ; amaa o yi ti nya dahima o ni bahi kana.

¹³Yirigimiya yimaŋ’ zuɣu, ka ʒiɛnya dɛde yi yɛda niŋbu puuni. Benya kaman dɔbba! Maliya yaa!

¹⁴Niŋmiya shɛlikam zaa ni yurilim!

¹⁵ Yi mi ni Stɛfanas yiŋnima n-nyɛ bɛn daa tuui niŋ Yisa yɛda Akaia tiŋgbɔŋ ni, ka daa zaŋ bɛmaŋ’ niŋ Yisa nyaandoliba sɔŋbu tuma ni. M mabihi, n suhiri ya

¹⁶ni yi doli niriba ŋɔ tatabo niŋsim maa mini ŋunkam pahi bɛ zuɣu tumdi bɛ ni tumdi shɛm maa naba.

¹⁷Stɛfanas mini Fɔtunatus ni Akaikus ni daa ka n sanna la niŋ ma suhupiɛlli pam, dama bɛ daa zani yi zaani n-niŋ ma yi ni naan niŋ ma shɛm.

¹⁸Bɛ daa kpaŋsi n suhu kaman bɛ ni daa kpaŋsi yi gba suhuri shɛm; ka bɛn niŋdi lala maa simdi paɣibu.

¹⁹ Cheechi shɛŋa din be Ɛsha tiŋgbɔŋ ni nim’ puhiri ya. Akuila mini Prisila ni cheechi din laɣindi bɛ yiŋ’ puuni la puhiri ya pam ti Duuma ni.

²⁰Ti mabihi la zaa puhiri ya. Puhimiya taba puhiri suŋ.

²¹Man’ Pool ŋun zaŋ mmaŋmaŋ’ nuu sab’ puhigu yɛtɔɣa ŋɔ gba puhiri ya.

²²Mbusim be ninvuɣ’ so ŋun bi yuri ti Duuma Yisa zuɣu. Maranaata! Ti Duuma, kamina!

²³Ti Duuma Yisa daalibarika kpalimmi be yi ni!

²⁴N yurilim zaŋ chaŋ yi zaa ha polo kul zoorimi pahira Yisa Masia zuɣu. Ami!