Read Dagbani 1 Kɔrintinima 2 Bible Online

1 Kɔrintinima 2 - Dagbani bible

1 Kɔrintinima 2

¹M mabihi, n ni daa ka yi sanna la, pa yɛtɔɣ’ shɛŋa din to ni baŋbu bee yɛm yɛtɔɣa din yi bɔhimbu pam puuni na ka n daa zaŋ Naawuni daashili yɛlimaŋli yɛla la kahigiri wuhiri ya.

²N daa loya ni n yi ka yi sanna, n ku zaŋ yɛli shɛli yɛla wuhi ya n-naɣ’ pahila Masia min’ o dapulli zuɣu kpahibu la yɛla.

³ N daa bela yi sani ni chɔɣinsi mini dabeenzɔbo ni ni sɔhibu.

⁴Ka n yɛtɔɣa mini n waazu yihibu daa pala yɛm yɛtɔɣ’ shɛŋa din yi ninsalinim’ baŋsim ni na, amaa di daa yila Naawuni Shia Kasi tuma min’ o yiko ni na

⁵ni di chɛ ka yi yɛda ku me n-tamla ninsalinim’ yɛm zuɣu, amaa ka ni me n-tamla Naawuni yiko zuɣu.

⁶N naɣ’ mali yɛm yɛtɔɣa tɔɣisirila ninvuɣ’ shɛb’ bɛn ba n-zani, amaa di pala ʒiɛmani ŋɔ yɛm bee ʒiɛmani ŋɔ zuɣulaannim’ bɛn ni ti vuui ŋɔ yɛm.

⁷Yɛm shɛli yɛla n ni mali tɔɣisiri maa nyɛla Naawuni daashili yɛmsɔɣirili shɛli o ni daa zali ti jilima nyabu zuɣu hal ka na bi nam dunia ŋɔ la.

⁸Ʒiɛmani ŋɔ zuɣulaannim’ ni so daa ʒi yɛm ŋɔ yɛla, dama bɛ yi di daa mi li, bɛ daa naan ku kpahi ti Duuma ŋun nyɛ jilimalan’ la tabili dapulli zuɣu.

⁹ Di bemi kaman di ni sab’ shɛm la: So nini na bi nya, ka so mi tibili na bi wum bee so ti baŋ binshɛŋa Naawuni ni mali zali ninvuɣ’ shɛb’ bɛn yur’ o la.

¹⁰Amaa Naawuni chɛ ka o Shia Kasi kahigi li wuhi tinima; dama Naawuni Shia Kasi n-nyɛ ŋun vihiri binshɛɣukam hal zaŋ tabili Naawuni yɛla din gbinni zilima.

¹¹Ka ŋuni n-lee ni tooi baŋ din be daadam suhu ni ka pa ni daadam maŋmaŋ’ shia din be o ni maa zuɣu? Lala ka so gba ku tooi baŋ din be Naawuni suhu ni ka pa ni Naawuni Shia Kasi zuɣu.

¹²Pa dunia ŋɔ shia ka ti deei, amaa Shi’ so ŋun yi Naawuni sanna ka ti deei ni ti tooi baŋ pin’ shɛŋa Naawuni ni zaŋ ti ti.

¹³Pa ninsal’ yɛm yɛtɔɣa ka ti mali wuhiri yɛla ŋɔ maa, amaa di nyɛla yɛtɔɣ’ shɛŋa Naawuni Shia Kasi ni zaŋ wuhi ti, ka ti mi mal’ li kahigiri Naawuni Shia yɛla wuhiri bɛn mali Naawuni Shia.

¹⁴Ninvuɣ’ so ŋun ka Naawuni Shia Kasi ku tooi deei Naawuni Shia Kasi pina; di nyɛla jɛrilim o sani hal ka o ku tooi baŋ di yɛla, dama di nyɛla Naawuni Shia Kasi ni wuhiri yɛl’ shɛŋa.

¹⁵Ka ninvuɣ’ so ŋun mali Naawuni Shia Kasi vihiri binshɛɣukam zaa baŋdi di gbinni, amaa ka so ku tooi vihi baŋ ŋun’ yɛla gbinni.

¹⁶ Di bemi kaman di ni sab’ shɛm la: “Ŋuni n-lee ni tooi baŋ Naawuni tɛha? Ka ŋuni n-lee ni tooi wuh’ o shɛli?” Amaa tinim’ nyɛla bɛn mali Masia tɛha.