Read Dagbani 1 Kɔrintinima 3 Bible Online

1 Kɔrintinima 3 - Dagbani bible

1 Kɔrintinima 3

¹M mabihi, n daa naan ku tooi tɔɣisi ya kaman ninvuɣ’ shɛb’ bɛn mi Naawuni Shia Kasi yɛla, amaa n daa tɔɣisiri ya mi kaman ninvuɣ’ shɛb’ bɛn dolila daadam biɛhigu bee kaman bɛn na nyɛ biliɛri Masia dolibu ni.

² Bihim ka n daa mali dihiri ya, pa saɣim; dama yi daa naan na kul ku tooi di li; hal ka na kul tooi di li pumpɔŋɔ gba,

³dama yi na kul dolila daadam biɛhigu. Nyuli zabbu mini naŋgbankpeeni ŋmɛbu yi be yi sunsuuni, pa daadam biɛhigu ka yi doli ka niŋdi kaman dunianim’ ni niŋdi shɛm?

⁴ Dama yi ni so yi yɛli, “Man’ dolila Pool”; ka so mi yɛli, “N dolila Apolɔs”; di yi nyɛ lala, yi gba bi bemi kaman dunianima?

⁵Ŋuni n-lee nyɛ Apolɔs? Bee ŋuni n-lee nyɛ Pool? Ti kul nyɛla Naawuni tumtumdiba bɛn sɔŋ ya ka yi niŋ yɛda kaman ti Duuma ni zali ti ni ti niŋ shɛm.

⁶ N nyɛla ŋun daa birita, ka Apolɔs mi nyɛ ŋun daa mihiri li kom, amaa Naawuni n-nyɛ ŋun chɛ ka di zoora.

⁷Dinzuɣu pa ŋun biriti bee ŋun mihiri kom maa n-nyɛ shɛli, amaa Naawuni ŋun chɛ ka di zoori maa n-nyɛ shɛli.

⁸Ŋun biriti mini ŋun mihiri kom zaa nyɛla yim, ka bɛ zaa ni ti deei bɛ tuma ni nyɛ shɛm laara.

⁹Dama ti nyɛla bɛn mini Naawuni laɣim tumda, ka yi mi nyɛ Naawuni puu. Yi lan nyɛla Naawuni duu.

¹⁰Ka Naawuni ni zali ma ni n tum shɛm o daalibarika ni zuɣu ka n niŋ tammɛr’ yɛndana ŋun zali duu gbinni tanzaa, ka so mɛri tamdi di zuɣu. Ka ŋunkam gba yɛn me n-tam di zuɣu, ŋun’ mɛm’ viɛnyɛliŋga.

¹¹Dama so ku tooi lan zali tanza’ shɛli pahila din pun zali maa, dina n-nyɛ Yisa Masia.

¹²Dinzuɣu so yi yɛn me n-tam di zuɣu, o yi zaŋla salima bee anzinfa bee kuɣ’ viɛla bee dari bee mɔri bee kaɣa me,

¹³o tuma ni ti yi palɔni. Di dabisili ni ti kahigi li wuhi, dama buɣim nti yɛn kahigi li wuhi, ka buɣim maa ni ti buɣisi sokam tuma n-kahigi di ni nyɛ shɛli wuhi.

¹⁴So tuma yi ti kpalim be o ni zaŋ shɛli me n-tam duu gbinni tanzaa maa zuɣu, o ni deei di laara.

¹⁵Ka buɣim yi ti di so mi tuma zaa, o ni kɔŋ di laara, ka ŋun’ maŋmaŋ’ lee ni tiligi, amaa ka di naɣ’ ni bemi kaman ŋun zo n-yi buɣim ni tiligi.

¹⁶ Yi bi mi ni yi nyɛla Naawuni jɛmbu duu, ka Naawuni Shia Kasi be yi ni?

¹⁷Yinima n-nyɛ Naawuni jɛmbu duu, ka Naawuni jɛmbu duu bela kasi. Ka so yi saɣim Naawuni jɛmbu duu maa, Naawuni ni saɣim dilan’ gba.

¹⁸So di yɔhim omaŋa! So yi be yi ni n-tɛhi ni o nyɛla ʒiɛmani ŋɔ ni yɛndana, ŋun’ leemi jɛrigu din ni chɛ ka o leei yɛndana.

¹⁹ Dunia ŋɔ yɛm nyɛla jɛrilim Naawuni sani, dama di sabiya: “Naawuni gbahiri yɛnnim’ la bɛ yɛŋkiŋkabina puuni.”

²⁰ Di lan sabi yaha: “Ti Duuma mi ka yɛnnim’ tɛha nyɛla yoli.”

²¹Dinzuɣu di chɛliya ka so zaŋ salinim’ ni ni tooi niŋ shɛli nyuri bara, dama binshɛɣukam nyɛla yi dini.

²²Di yi nyɛla Pool bee Apolɔs bee Pita bee dunia ŋɔ bee nyɛvili bee kum bee ʒiɛmani ŋɔ bee dahin’ shɛli ha yɛla, di zaa ha nyɛla yi dini;

²³ka yi gba nyɛ Masia dini, ka Masia mi nyɛ Naawuni dini.