Read Dagbani 1 Kɔrintinima 4 Bible Online

1 Kɔrintinima 4 - Dagbani bible

1 Kɔrintinima 4

¹Di simdi ni yi lihi ti kaman Masia tumtumdiba bɛn nyɛ Naawuni ni zaŋ o daashili yɛlimaŋa fukumsi niŋ shɛb’ nuu ni.

²Ka din beni nyɛla, di niŋ kamaata ni bɛ ni zaŋ fukumsi niŋ ninvuɣ’ so nuu ni nyɛla ŋun ni ʒe o duuma yim.

³Yi yi kariti ma saria bee dunianim’ yi kariti ma saria m baɣa kani; hal n gba kariti mmaŋ’ saria.

⁴Mmaŋmaŋ’ suhu ni tɛha bi wuhi ma ni m mali galimi, amaa dimbɔŋɔ bi wuhiri ni m bebu tuhiya zaa. N Duuma n-nyɛ ŋun kariti ma saria.

⁵Dinzuɣu di kariya so saria ka saha na bi paai bee ka ti Duuma na bi labina. Ŋuna n-ni ti chɛ ka binshɛɣukam din be zibisim ni yi palo, ka ni ti vii daadamnim’ suhuri ni ashiya wuhi palɔni. Di saha maa ka sokam ni ti nya paɣibu din simd’ o Naawuni sani.

⁶M mabihi, yi zuɣu ka n zaŋ dimbɔŋɔnim’ ŋmahindi m mini Apolɔs yɛla ni di chɛ ka yi doli di ni sabi yɛli shɛm, “Miriya ka yi yaɣi Naawuni ni zali shɛm zuɣu.” Di mi bi simdi ni yi ni so duhi karimba yino ka ʒiɛm karimba ŋun’ la.

⁷Ŋuni n-lee nyɛ a ka a ni so a taba? Bɔ ka a lee mali ka di pala pini ka Naawuni zaŋ li ti a? Ka a yi daa dee’ li mi o sani, di chaŋ wula ka a nyuri bara kaman pa pini ka Naawuni daa zaŋ li ti a la?

⁸Yi pun mali din simdi ya zaa! Yi pun niŋ bundaannima! Yi di nam ka chɛ ti! N di bi zaɣisi ka yi shiri nyɛla nanima, ka ti di pahi yi zuɣu n-di yi nam maa!

⁹Dama n tɛhiya ni Naawuni zaŋ tinim’ tuumba ŋɔ zalila zaashe’ shɛli din bahindi nyaaŋa ni, ka ti be kaman bɛ ni bahi noli ni bɛ kum’ ninvuɣ’ shɛb’ palɔni, ka leei malaikanim’ mini ninsalinim’ ni lihiri shɛb’ ninliha dunia ŋɔ zaa ni.

¹⁰Ti nyɛla jɛra Masia zuɣu, amaa ka yinima nyɛ yɛnnim’ Masia puuni. Ti nyɛla ninvuɣ’ gbarima, amaa ka yinima nyɛ kpiɔŋlaannima. Yi nyɛla bɛ ni tiri ninvuɣ’ shɛb’ jilima, amaa ka tinim’ nyɛ bɛ ni ʒiɛmdi ninvuɣ’ shɛba.

¹¹Zaŋna hal ni zuŋɔ, kum mini kɔnyuri n-kul mali ti, ka ti chani gbinfini, ka nyari buri, ka ka biɛhigu shee,

¹² ka tumdi timaŋmaŋ’ nuu zuɣu tuma n-dihiri timaŋa. Niriba yi turi ti, ti niŋdila alibarika niŋdi bɛ ni; ka bɛ yi niŋ ti alaka, ti zaŋdila suɣilo dee’ li;

¹³ka bɛ yi yɛli ti zilima, ti zaŋdila zilim’ balli yɛtɔɣa labisi ba. Ti kul bemi kaman dunia ŋɔ bin’ chɔɣima la, hal ti ŋmanila saɣiri dunia ŋɔ ni.

¹⁴M bi sabiri dimbɔŋɔ ni n dihi ya la vi, amaa n sab’ li mi ni n saɣisi ya yi ni nyɛ m biyurisi la zuɣu.

¹⁵Ka yi yi mali karimbanim’ paai tuhi’ pia Masia dolibu ni, amaa ba yino ka yi lee mali; dama n leei yi ba Yisa Masia dolibu ni la n lahibal’ suŋ waazu yihibu zuɣu.

¹⁶ Ka n kpamdi ya jaande ni yi chɛ ka yi biɛhigu be kaman m biɛhigu.

¹⁷Lala zuɣu ka n timdi m biyurigu Timoti ŋun ʒe yim ti Duuma dolibu ni la yi sanna ni o ti teei ya n ni doli so’ shɛŋa Masia dolibu ni, ka wuhiri li shɛm luɣ’ shɛlikam cheechinim’ ni la.

¹⁸Yi ni shɛb’ kpɛla yimaŋ’ duhibu ni, dama yi tɛhimi ni n ku lan ka yi sanna.

¹⁹Amaa ti Duuma yi saɣi, di ku yuui ka n ka yi sanna; ka n yi ti kana, n ni baŋ bɛn duhiri bɛmaŋ’ maa ni mali shɛli, ka di pala bɛ ni yɛli shɛm kɔŋko, amaa bɛ yiko gba ni nyɛ shɛm.

²⁰Dama Naawuni nam yɛla pala yɛtɔɣa kɔŋko, amaa di nyɛla yiko yɛla.

²¹Yɛla ayi ŋɔ ni dini ka yi lee bɔra: Yi bɔri ni n ʒila fiɛbiga ka yi sanna bee yi bɔri ni n ʒila yurilim mini tarimtali kana?