Read Dagbani 1 Kɔrintinima 8 Bible Online

1 Kɔrintinima 8 - Dagbani bible

1 Kɔrintinima 8

¹Zaŋ chaŋ bɛ ni mali binshɛŋa maani buɣa polo, ti mi ni di nyɛla kaman shɛb’ ni yɛli shɛm la: “Ti zaa mali baŋsim.” Amaa baŋsim ŋɔ tatabo tahirila maŋduhibu na; yurilim n-naɣ’ nyɛ din kpaŋsiri nir’ suhu.

²So yi tɛhi ni o mi shɛli, o na bi mi di ni simdi ni o mi shɛli gba.

³So yi yuri Naawuni, ŋuna ka Naawuni mi.

⁴Dinzuɣu zaŋ chaŋ bɛ ni zaŋ binshɛŋa mali buɣa dibu polo, di bemi kaman ninvuɣ’ shɛb’ ni yɛli ni buɣili kam ʒiɛla binshɛɣu din ka dunia ŋɔ ni zaani la, ka Naawuni so mi lan kani pahila Naawuni yino ŋɔ ko.

⁵Hal bɛ ni booni binshɛŋa buɣa la yi bela zuɣusaa bee dunia ŋɔ ni, dama buɣa pam mini duumanim’ pam shiri beni,

⁶amaa tinim’ sani, Naawuni yino ko m-beni. Ŋuna n-nyɛ ti Ba Naawuni, ka binshɛɣukam yila o sanna, ka ti bela o zuɣu. Duuma yino ko mi m-beni. Ŋuna n-nyɛ ti Duuma Yisa Masia ŋun nyɛ binshɛɣukam nambu ni yi so tuma ni na la, ka ti gba bela o zuɣu.

⁷Amaa pa sokam zaa m-mali dimbɔŋɔ baŋsim, dama yɛdaniŋdib’ bɛn pun mili buɣa yi di bindirigu ŋɔ tatabo, bɛ tɛhirimi ni di nyɛla bɛ ni shiri zaŋ shɛli mali buɣili, ka bɛ suhuri ni tɛha ni ka kpiɔŋ zuɣu chɛ ka di nyɛ daɣiri bɛ sani.

⁸Naawuni mi bi deeri ti la bindirigu dibu zuɣu: Ti yi di, di bi pahiri ti shɛli; ti mi yi bi di, di bi filindi ti.

⁹Amaa lee miriya ka yi chɛ ka yi yolisim maa leei kuɣituurili ninvuɣ’ shɛb’ bɛn ka kpiɔŋ la sani.

¹⁰Dama ninvuɣ’ so ŋun suhu ni tɛha bi kpɛma yi nya nyin’ ŋun mali baŋsim ŋɔ ka a ʒi buɣili maligu shee diri bindirigu, di ku kpaŋsi dilan’ maa suhu ka o di bɛ ni zaŋ shɛli mali buɣa?

¹¹Ka a baŋsim maa zuɣu ni chɛ ka Masia ni daa kpi a mabi’ so ŋun ka kpiɔŋ zuɣu bahi yoli.

¹²Yi yi niŋ lala, yi tum alahichi yi mabihi sani ka gbarigi bɛ suhuri ni tɛha din ka kpiɔŋ la, ka lala niŋbu nyɛla alahichi tumbu Masia sani.

¹³Lala zuɣu bindir’ shɛli dibu yi nyɛla din ni luhi m mabia, dindina n kul ku ŋubi nimdi ka di zuɣu ti chɛ ka m mabia lu.