Read Dagbani 2 Kɔrintinima 12 Bible Online

2 Kɔrintinima 12 - Dagbani bible

2 Kɔrintinima 12

¹N ni bahi nyu bara. Di naɣ’ kala buchi, amaa n na kul ni tɔɣisi ʒiinim’ mini kahigibunim’ shɛŋa ti Duuma ni daa zaŋ ti ma la yɛla.

²N daa mi do’ so ŋun be Masia ni yuun’ pinaanahi din gari ŋɔ puuni, ka Naawuni daa kpuɣ’ o du zuɣusaa m-mali ti paai alizanda puuni ha. O yi daa bela o niŋgbuŋ ni bee o yi daa ka o niŋgbuŋ ni, m bi mi; Naawuni m-mi.

³M mi ni Naawuni daa zaŋ doo maa du alizanda ni. O yi daa bela o niŋgbuŋ ni bee o yi daa ka o niŋgbuŋ ni, m bi mi; Naawuni m-mi.

⁴Ka o daa wum binshɛŋa yɛla nimaani, ka di nyɛ ninsal’ ni ku tooi zaŋ shɛli n-niŋ yɛtɔɣa ni, ka lan nyɛ ninsal’ ni ku tooi zaŋ shɛli tɔɣisi.

⁵Doo maa zuɣu ka n ni nyu bara, amaa n ku nyu bara maŋmaŋ’ zuɣu dina; n naɣ’ ni nyula bara mmaŋmaŋ’ chɔɣinsi zuɣu.

⁶Ka hal n yi nyu bara gba, m bi tum jɛrilim, dama n ni tɔɣisila yɛlimaŋli di puuni. Amaa n zaɣisila lala niŋbu ni di chɛ ka so ku duhi ma n-gar’ o ni nya ma ka n niŋ shɛm zuɣu bee o ni wum ka n niŋ shɛm zuɣu.

⁷Daliri din ni chɛ ka n ku duhi mmaŋa n-yaɣi n ni daa nya kahigibunim’ pam shɛŋa la zuɣu, ka go’ shɛli din be kaman Sintani tumo la kuhi ma n-kpalim be n niŋgbuŋ ni ni di muɣisi ma n-chɛ ka n ku duhi mmaŋ’ yaɣi.

⁸Siɣimsiɣim buta ka n daa suhi n Duuma di zuɣu ni o yihi li n ni.

⁹Amaa ka o daa yɛli ma, “N daalibarika saɣ’ a, dama n yaa niŋdi dɛde chɔɣinsi ni.” Ka n kul ni nyuri bara m-pahiri ni suhupiɛlli n chɔɣinsi zuɣu ka di chɛ ka Masia yiko tooi be n ni.

¹⁰Masia zuɣu m mali suhupiɛlli chɔɣinsi ni mini ʒiɛmbu ni ni kɔŋsim ni ni alaka nyabu ni ni wahala dibu puuni, dama n yi ti gbarigi, di saha ka n lan nyari yaa.

¹¹N tɔɣisi jɛrilim m barinyubo ni, amaa yinima m-muɣisi ma ka n niŋ lala. Di di simdi ni yinim’ paɣi ma, dama hal n yi kul pa shɛli, n lee pala ŋun pɔri tuum’ shɛba yi ni tibigiri la ni.

¹²N daa tum tuun’ maŋli shihira wuhibu tuma yi sani ni suɣilo dibu zaa. Dina n-nyɛ: shihira wuhibu mini alahiziba tumtumsa ni yiko tuma.

¹³Bɔ ka n niŋ ya ka di be di ko ni cheechi shɛŋa din kpalim la n-naɣ’ pahila n ni bi zaŋ n yɛla doli ya la? Chɛliya dimbɔŋɔ taali paŋ ma!

¹⁴Siɣimsiɣim buta m-bɔŋɔ ka m mali shili ni n ka yi sanna; ka m mi ku zaŋ n yɛla doli ya, dama m bi bɔri yi binshɛli, amaa yimaŋmaŋ’ ka m bɔra. Pa bihi n-dihiri bɛ laamba, amaa bihi laamba n-dihiri ba.

¹⁵M mali suhupiɛlli ni n zaŋ mmaŋa mini n ni mali shɛlikam saɣim yi zuɣu. N ni yuri ya pam la zuɣu, yinima ni yuri ma la biɛla?

¹⁶Di pa shɛli yi ni saɣi ni m bi zaŋ n yɛla doli ya, amaa ka lee yɛli ni n nyɛla yɛmbimbiɛrilana ŋun zaŋ yɔhiŋgu gbahi ya.

¹⁷N daa di yi zuɣu nyɔri n ni daa tim shɛb’ yi sanna la ni?

¹⁸N daa kpam Taitus jaande ni o ka yi sanna, ka daa lan chɛ ka ti mabi’ so pah’ o zuɣu na. Taitus daa di yi zuɣu nyɔri? Pa biɛhigu yini ka ti mali? Pa so’ yini ka ti doli?

¹⁹Yi kul tɛhirimi ni ti zabirila timaŋ’ zuɣu yi sani? M mabiyurisi, Naawuni sani, Masia zuɣu ka ti kul tɔɣisira, ka di zaa nyɛla yi kpaŋsibu zuɣu.

²⁰N zɔri ni di pa shɛli ka n ti ka yi sanna m bi nyan ya kaman n ni di bɔri ni yi be shɛm, ka yi mi ti bi nya ma kaman yi ni di bɔri ni m be shɛm. Di pa shɛli ka naŋgbankpeeni mini nyuli zabbu ni suhuyiɣisili ni zunyuŋ ni tiŋŋmaŋ ni nyaanzubo ni maŋduhibu ni duŋtaabo ti be yi sunsuuni.

²¹N zɔri ni di pa shɛli ka n ti lab’ yi sanna ka Naawuni ti siɣisi ma yi sani, ka n fabili bɛn daa tum alahichi ka na bi niŋ tuuba bɛ daɣiri tuma mini bɛ zina niŋbu ni bɛ kɔr’ biɛri tuun’ shɛŋa bɛ ni tumdila zuɣu.