Read Dagbani 2 Kɔrintinima 13 Bible Online

2 Kɔrintinima 13 - Dagbani bible

2 Kɔrintinima 13

¹ Napɔŋ buta ka n kani yi sanna pahiri ŋɔ. So taali nyabu kam ni, di simdi ni niriba ayi bee ata n-di shɛhira.

²N daa kpahi ninvuɣ’ shɛb’ bɛn pun tum alahichi la mini bɛn zaa kpalim zuɣu ni, ka na kul kpahiri bɛ zuɣu ni n ni na ka bɛ sani ŋɔ. N kpahirila bɛ zuɣu ni kaman n ni daa pun niŋ shɛm n ni daa ka yi sanna pahi buyi la. Ka n yi ti lan kana yaha, n ku chɛ bɛ tibili darigibu,

³ka di nyɛla yi ni bɔri ni yi nya shihirili din wuhiri ni Masia yiko ni ka n tɔɣisirila zuɣu. Masia pala ninvuɣ’ gbariŋ zaŋ chaŋ o ni niŋdi ya shɛm polo, amaa o nyɛla ŋun wuhir’ o yiko yi sunsuuni.

⁴Bɛ daa kpah’ o tabili dapulli zuɣu la gbariginsim puuni, amaa ka o lan be Naawuni yiko zuɣu. Ti gba nyɛla ninvuɣ’ gbarima o ni, amaa zaŋ chaŋ ti ni niŋdi ya shɛm polo ti min’ o ni ti laɣim be Naawuni yiko zuɣu.

⁵Zahimmiya yimaŋa n-nya yi shiri doli yi yɛda niŋbu soli. Buɣisimiya yimaŋa! Yi bi mi ni Masia be yi ni? Di yi pa lala yi daa naɣ’ bi nyaŋla yimaŋ’ buɣisibu la.

⁶N yuya ni yi baŋ ni timaŋ’ buɣisibu pala din nyaŋ ti.

⁷Ka ti suhiri Naawuni ni yi di tum birigi, ka di pala din wuhiri ni tinim’ nyaŋla timaŋ’ buɣisibu, amaa di lee nyɛla din ni chɛ ka yi tum din tuhi hal di ni kul be kaman ti nyɛla bɛn bi nyaŋ timaŋ’ buɣisibu maa la.

⁸Dama ti ku tooi niŋ din ni chihi yɛlimaŋli; faashee din kul ni doli yɛlimaŋli maa ka ti ni niŋ.

⁹Yinim’ yi mali kpiɔŋ ka tinim’ gbarigi, ti mali suhupiɛlli di zuɣu; ka ti ni suhiri Naawuni shɛli zuɣu nyɛla ni yi nya kpaŋsibu.

¹⁰N sabiri dimbɔŋɔ tiri ya la n ni na bi ka yi sanna ŋɔ ni di chɛ ka n ti kana ka ku zaŋ fukumsi shɛli n Duuma ni zaŋ niŋ n nuu ni la n-darigi yi tibili, dama fukumsi shɛli n Duuma ni zaŋ niŋ n nuu ni la din yɛn mɛnya mi zali, ka pa ni din yɛn daai ya luhi.

¹¹To, m mabihi, n chɛbisiri ya mi ŋɔ. Kpaŋmiya yimaŋa m-be dɛde! Doliya n saɣisigu; maliya naŋgban’ yini; maliya suhudoo ka di chɛ ka Naawuni ŋun nyɛ yurilimlana mini suhudoolana ŋɔ be yi sani.

¹²Puhimiya tab’ puhiri suŋ. Naawuni ninvuɣ’ gahinda la zaa puhiri ya.

¹³Ti Duuma Yisa Masia daalibarika mini Naawuni yurilim ni Naawuni Shia Kasi dolintabitali kpalimmi be yi zaa ha ni! Ami!