Read Dagbani 2 Kɔrintinima 2 Bible Online

2 Kɔrintinima 2 - Dagbani bible

2 Kɔrintinima 2

¹N daa lo mmaŋmaŋ’ suhu ni ni n ni yɛn kana ti kaai ya kaari shɛl’ la ku nyɛla din ni tin ya suhusaɣiŋgu.

²Dama n yi saɣim yi suhuri, banima n-nyɛ bɛn ni chɛ ka n nya suhupiɛlli, ka pa ni n ni saɣim yinima ninvuɣ’ shɛb’ suhuri maa?

³N daa sabi gbaŋ la n-tin ya mi ni di chɛ ka n yi di daa ka yi sanna di ni chɛ ka n ku nya suhusaɣiŋgu n ni di daa naan nya suhupiɛlli yinim’ shɛb’ sani maa, dama n daa dihi yi zaa ha tabili, ka biɛhiŋ kani ni n suhupiɛlli daa naan nyɛla yi zaa ha suhupiɛlli.

⁴Suhusaɣiŋgu mini suhugarigu ni nintam pam puuni ka n daa sabi gbaŋ maa tin ya, ka di daa pala n lomi ni n tin ya suhusaɣiŋgu, amaa n daa bɔrimi ni di chɛ ka yi baŋ n yurilim ni galisi shɛm zaŋ chaŋ yi sani.

⁵So yi daa tum din tiri suhusaɣiŋgu, pa mani ka o ti suhusaɣiŋgu, ka m mi bi bɔri ni n tibigi li, dama nir’ yi lihi di puuni, di nyɛla yi zaa ka o ti suhusaɣiŋgu maa.

⁶Ka yi ni pam ni daa naai noli n-darig’ o tibili shɛm la saɣ’ lala.

⁷Ka di simdi ni yi yipa ŋmaligi chɛ m-paŋ o ka kpaŋs’ o suhu, dama di yi pa lala suhugarigu pam zuɣu ni chɛ ka o lu.

⁸Dinzuɣu n suhiri ya ni yi lan wuhimiy’ o yi yurilim ni nyɛ shɛm zaŋ chaŋ o sani.

⁹Dimbɔŋɔ zuɣu ka n daa sabi gbaŋ la tin ya ni m buɣisi ya nya yi deeri noli binshɛɣukam ni.

¹⁰Yi ni chɛ so taali paŋ o, n gba chɛ m-paŋ dilana. N yi pun chɛ taal’ shɛli paŋ so, ka di yi shiri nyɛ yɛlimaŋli ni n chɛ taal’ shɛli paŋ so, yi zuɣu ka n chɛ li paŋ o zaŋ chaŋ Masia sani

¹¹ni di taɣi Sintani bahi ka o ku nyaŋ ti, dama ti bi be ʒilinsi ni zaŋ chaŋ o yikombiɛri tuma la polo.

¹² N ni daa paai Troas ni n ti yihi Masia lahibal’ suŋ waazu, n Duuma daa mali soli ti ma,

¹³amaa n suhu daa bi doya n ni daa bi nya ti mabia Taitus nimaani la zuɣu. Dina n-daa chɛ ka n chɛbisi bɛn be nimaani ka chaŋ Masidɔnia.

¹⁴Ti paɣiri Naawuni! Ŋuna n-chɛ ka ti doli Masia o nasara dibu dari dibu chandi ni m-be kaman o ni ŋme tɔbu gbahi dab’ shɛba, ka chɛ ka ti moli Masia yɛla ka di be kaman tulaale nyom la gili luɣilikam.

¹⁵Dama ti ŋmanila tulaale zim shɛli Masia ni zaŋ ti Naawuni ka di nyom gili ninvuɣ’ shɛb’ bɛn tiligi la mini bɛn bɔrigi sani:

¹⁶Zaŋ chaŋ bɛn bɔrigi maa sani, di nyɛla nyom din tahiri kum na; amaa zaŋ chaŋ bɛn tiligi la sani, di nyɛla nyom din tahiri nyɛvili na. Ŋuni n-lee ni tooi su tuuni ŋɔ tatabo fukumsi?

¹⁷Dama ti bi be kaman ninvuɣ’ shɛb’ bɛn mali Naawuni yɛligu n-niŋdi kaman neen’ shɛŋa bɛ ni kɔhiri alaha, amaa ti nyɛla yɛlimaŋlinima ka nyɛ Naawuni ni pii shɛb’ tim, ka zaŋ chaŋ Naawuni sani, ti nyɛla bɛn tɔɣisiri Masia yɛla.