Read Dagbani 2 Kɔrintinima 9 Bible Online

2 Kɔrintinima 9 - Dagbani bible

2 Kɔrintinima 9

¹Di di dii bi simdi ni n lan sabi gbaŋ tin ya zaŋ chaŋ tɔto tɔhi ti Yisa nyaandoliba la yɛla polo;

²dama m mi yi ni pun yu ni yi niŋ shɛm yɛla. Ka n nyuri bara yi zuɣu Masidɔnianim’ sani, ka yɛri ni Akaianim’ gba pun malila shili yuuni la ha, ka yi ni yu ni yi niŋ shɛm kpaŋsi bɛ ni shɛb’ pam suhuri.

³Ka n timdi m mabihi ŋɔ na pumpɔŋɔ ni di chɛ ka n ni nyuri bara yi zuɣu shɛm la ku kpalim yoli, ka di chɛ ka yi mali shili kaman n ni yɛli ni yi pun mali shili shɛm la.

⁴Di yi pa lala Masidɔnianim’ shɛb’ yi nyɛla bɛn doli ma kana nti nya ka yi bi mali shili, ti ni di vi zaŋ chaŋ ti ni niŋ ya naani shɛm la polo, amaa di bahi bamdi yinima.

⁵Lala zuɣu ka n tɛhi ni di simdi ni n kpam m mabihi maa jaande ka bɛ daŋ n tooni na nti mali yi ni lo alikauli ni yi tɔhi tɔto shɛl’ la shili zali, ka di wuhi ni di pala muɣisigu zuɣu, amaa di nyɛla yi suhu yubu pini tibu zuɣu.

⁶Di nyɛla ŋ-ŋɔ: Ninvuɣ’ so ŋun biri biɛla ni ti kpuɣila atam biɛla, ka ninvuɣ’ so ŋun mi biri pam ni ti kpuɣ’ atam pam.

⁷Di simdi ni sokam ti kaman o ni lo shɛm o suhu ni, ka pa ni yolitim bee muɣisigu zuɣu, dama Naawuni yurila ŋun tiri pini ni suhupiɛlli.

⁸Ka Naawuni nyɛla ŋun ni tooi niŋ alibarika din galisi pam niŋ yi ni, ka di chɛ ka yi kul mali binshɛɣukam ka di saɣiri ya, ka chɛ ka yi tooi mali pam din ni zaŋ tum tuun’ suŋ kam.

⁹ Di bemi kaman di ni sab’ shɛm la: Ŋuna n-tiri nandaamba pina pam luɣilikam. O nirilim niŋbu kul ni be hal ni saha din ka bahigu.

¹⁰Naawuni ŋun zaŋdi bimbira tiri ŋun birita, ka chɛ ka o nyari bindirigu, ni tiri yi gba m-pahiri yi ni mali shɛli zuɣu, ka chɛ ka yi nirilim niŋbu zooi pahi.

¹¹Ka yi kul ni mali pam din ni chɛ ka yi tiri nirilim niŋbu pina, ka lala zuɣu chɛ ka Naawuni nya paɣibu ti ni niŋdi shɛm puuni;

¹²dama yi yurilim tuuni ŋɔ pala din tiri Yisa nyaandoliba din simdi ba kɔŋko, amaa di nyɛla din chɛ ka Naawuni nyari paɣibu pam di zuɣu.

¹³Ka yi yurilim tuuni maa tumbu zuɣu ni chɛ ka niriba paɣi Naawuni, dama di wuhiri yi ni deeri ŋun’ Naawuni noli shɛm Masia lahibal’ suŋ yɛda niŋbu ni mini yi ni tiri Yisa nyaandoliba zaŋ tabili sokam zaa pina la ni.

¹⁴Bɛ suhuri kul yɛla yi zuɣu, ka bɛ suhiri Naawuni tiri ya Naawuni daalibarika din galisi pam yi ni la zuɣu.

¹⁵Ti paɣiri Naawuni o pin’ shɛli yɛla ninsal’ maŋmaŋ’ yɛtɔɣa ni ku tooi kahigi wuhi ŋɔ zuɣu!