Read Dagbani Galɛshianima 1 Bible Online

Galɛshianima 1 - Dagbani bible

Galɛshianima 1

¹Man’ Pool ŋun nyɛ Yisa Masia tumo mini m mabihi bɛn be n san’ la zaa n-sabiri gbaŋ ŋɔ n-tiri cheechinim’ din be Galɛshia tiŋgbɔŋ ni. Ka n tumɔtali maa mi bi yila ninsalinim’ sanna bee n-yi daadam kɔbili ni na, amaa di nyɛla din yi Yisa Masia mini ti Ba Naawuni ŋun daa neei ŋun’ Yisa kum ni la sanna. M mini m mabihi bɛn be n san’ la zaa puhiri ya.

³Ti Ba Naawuni mini ti Duuma Yisa Masia niŋm’ alibarika niŋ yi ni, ka tin ya suhudoo!

⁴Ŋuna ti Duuma Yisa Masia n-daa zaŋ omaŋ’ pa talima ti daalahichi zuɣu ni o fa ti ʒiɛmaan’ biɛɣu ŋɔ ni bahi kaman ti Ba Naawuni yubu ni nyɛ shɛm.

⁵Paɣimiya Naawuni hal ni saha din ka bahigu! Ami!

⁶Yi ni ŋmaligi yomyom ka chɛ Naawuni ŋun boli ya Masia daalibarika puuni, ka lan ŋmaligi n-doli lahibal’ sun shɛli din be di ko ka chɛ Masia lahibal’ suŋ la yɛla gari ma pam.

⁷Di pala lahibal’ sun shɛli n-shiri lan beni pahi, amaa ninvuɣ’ shɛb’ beni chirindi ya yi tɛha ni, ka bɔri ni bɛ taɣi Masia lahibal’ suŋ maa.

⁸Amaa di yi nyɛla tinima bee malaika so ŋun yi alizanda ni na yi yihi lahibal’ sun shɛli waazu din be di ko ka chɛ ti ni daa pun yihi shɛli waazu tin ya la, mbusim be dilan’ zuɣu!

⁹Ti ni daa pun yɛli shɛm la, lala ka n na kul yɛri ya yaha: So yi yihiri lahibal’ sun shɛli waazu din be di ko ka chɛ yi ni daa pun deei shɛl’ la, mbusim be dilan’ zuɣu!

¹⁰N lee bɔrila paɣibu ninsalinim’ sani bee Naawuni sani? Bee n kpaŋdi mmaŋ’ ni n tiɣila ninsalinim’ nini? N yi na kul tiɣiri ninsalinim’ nini, dindina n ku tooi nyɛ Masia dabili.

¹¹M mabihi, m bɔri ni yi baŋ ni lahibal’ sun shɛli waazu n ni daa yihi la pala din yi daadam tɛha ni na.

¹²Dama n daa bi dee’ li la ninsal’ sani; pa so mi n-daa zaŋ li wuhi ma, amaa di yila Yisa Masia ŋun daa kahigi li wuhi ma la sanna.

¹³ Yi pun wum n ni daa mali biɛhigu shɛli saha shɛli n ni daa doli Yɛhudianim’ adiini sol’ la yɛla. N daa niŋ Naawuni cheechi alaka pam, ka kpaŋdi mmaŋa ni n saɣim li,

¹⁴ ka daa gari n salalaantab’ tooni Yɛhudianim’ adiini soli dolibu ni; ka di nyɛla n suhu ni daa kul ye n yaannim’ kaya dolibu zuɣu la zuɣu.

¹⁵Amaa Naawuni daa pii ma zali hal ka bɛ na bi dɔɣi ma, ka boli ma o daalibarika zuɣu.

¹⁶ Di ni daa tiɣ’ o nini ni o kahig’ o Bia wuhi ma ka di chɛ ka n yih’ o yɛla waazu ti bɛn pa Yɛhudianim’ la, n daa bi niŋ so saawara.

¹⁷M mi daa bi chaŋ Jɛrusalɛm ni n ti nya Masia tuun’ shɛb’ bɛn daa be n tooni la, amaa ka daa naɣ’ chaŋla Areebia. Di nyaaŋa ka n daa ti yi nimaani n-lan lab’ Damaskus.

¹⁸ Yuma ata nyaaŋa ka n daa ti chaŋ Jɛrusalɛm ni n ti kaai Pita. Biɛɣ’ pinaanu ka n daa niŋ o sani,

¹⁹amaa n daa bi nya Yisa Masia tuumba maa ni so naɣila ti Duuma tizo Jeemsi.

²⁰Naawuni zuɣu, m bi ŋmarila ʒiri n ni sabiri shɛli tiri ya ŋɔ puuni!

²¹Dimbɔŋɔ nyaaŋa ka n daa chaŋ Siria mini Kilikia tiŋgbana ni.

²²Di saha maa Masia cheechinim’ din be Judia tiŋgbɔŋ ni nim’ daa na ʒi ma ni bɛ nini.

²³Bɛ daa naɣ’ kul wummi ka ninvuɣ’ shɛb’ yɛra, “Ŋun daa niŋdi ti alaka la yipa yihirila o ni daa kpaŋd’ omaŋ’ ni o saɣim adiini so’ shɛl’ la waazu pumpɔŋɔ.”

²⁴Ka bɛ daa tibigi Naawuni n zuɣu.