Read Dagbani Galɛshianima 2 Bible Online

Galɛshianima 2 - Dagbani bible

Galɛshianima 2

¹ Yuun’ pinaanahi nyaaŋa ka m mini Baanabas daa yɛn chaŋ Jɛrusalɛm, ka n daa zaŋ Taitus m-pahi ka ti chaŋ.

²Naawuni n-daa kahigi wuhi ma ni n chaŋ. Ka n daa ti kahigi n ni yihiri lahibal’ suŋ waazu tiri bɛn pa Yɛhudianim’ shɛm yɛla n-yɛli cheechi zuɣulaannim’ la ashilɔni, dama n daa bi bɔri ni n ni daa pun tum shɛm mini n ni na kul tumdi shɛm kpalim yoli.

³Amaa hal Taitus ŋun daa be n san’ la ni daa kul nyɛ Giriiki maa zaa yoli, bɛ daa bi muɣis’ o ni o guni.

⁴Di yɛla daa naɣ’ ti yila ninvuɣ’ shɛb’ bɛn pa ti mabi’ maŋa la sanna. Bɛ daa kamina nti kpe ti ni ni bɛ puɣisi baŋ ti ni mali yolisim shɛli Yisa Masia ni din ni chɛ ka bɛ kpɛhi ti dabitim ni.

⁵Ka ti daa bi wum ti ba hal baabiɛla ni di chɛ ka ti ba yɛlimaŋli din be lahibal’ suŋ maa ni zali tin ya.

⁶ Ka niriba ni daa lihi bɛ ni shɛb’ zuɣulaannim’ la bi pahiri ma shɛli, man’ dee baɣa ka bɛ ni daa nyɛ shɛb’ ni, dama Naawuni bi gaŋdi so; ka n na kul yɛrimi ni niriba ni lihi shɛb’ zuɣulaannim’ maa bi pahiri ma shɛli.

⁷Amaa bɛ daa lee baŋya ni Naawuni zaŋ lahibal’ suŋ waazu yihibu fukumsi niŋ n nuu ni ni n yihi ti bɛn pa Yɛhudianim’ kaman o ni zaŋ lahibal’ suŋ waazu fukumsi niŋ Pita nuu ni ni o yihi li ti Yɛhudianim’ shɛm.

⁸Dama Naawuni ni zaŋ Pita tum tuun’ kara Yɛhudianim’ sani shɛm, lala ka o zaŋ man’ gba tum tuun’ kara bɛn pa Yɛhudianim’ sani.

⁹Jeemsi mini Pita ni Jɔn bɛn daa nyɛ zuɣulan’ shɛba niriba ni lihi kaman cheechi daantalisi la ni daa baŋ Naawuni ni zaŋ alibarika tuun’ shɛli niŋ n nuu ni maa, ka bɛ daa ti m mini Baanabas nuhi n-deei ti leei bɛ tumtumditaba, ka yɛl’ ti ni ti cham’ bɛn pa Yɛhudianim’ sani, ka bɛ mi chaŋ Yɛhudianim’ sani.

¹⁰Bɛ daa naɣ’ yɛl’ ti mi ni bɛ bɔri ni ti teeri nandaamba bɛn be bɛ ni yɛla, ka n gba suhu ni daa pun ye shɛli niŋbu zuɣu n-daa bala.

¹¹Pita ni daa ti ka Antiɔk na, n daa galim o o ninni, dama o ni daa niŋ shɛm nyɛla din simdi galimbu.

¹²Ninvuɣ’ shɛb’ Jeemsi ni daa tim la ni daa na bi paana, Pita mini bɛn pa Yɛhudianim’ daa laɣindimi timdi dira, amaa ka bɛ daa ti paana, ka o yaag’ omaŋa bɛ ni n-woligi ka chɛ ba, dama o daa zɔrila bɛn kpaŋsiri gunibu yɛla.

¹³Ka Yɛhudianim’ bɛn kpalim la daa pah’ o zuɣu n-dol’ o bilikɔnsi soli maa hal ka Baanabas gba daa birigi pahi bɛ zuɣu n-doli bɛ bilikɔnsi soli maa.

¹⁴N ni daa nya ka bɛ bi doli lahibal’ suŋ yɛlimaŋli soli dɛde maa zuɣu ka n daa yɛli Pita bɛ zaa ninni, “Nyin’ ŋun nyɛ Yɛhudia nira ka niŋdi kaman ŋun pa Yɛhudia nira, ka bi be kaman Yɛhudia nira n-nyɛ a ŋɔ, di chaŋ wula ka a bɔri ni a muɣisi bɛn pa Yɛhudianim’ ka bɛ be kaman Yɛhudianim’ la?”

¹⁵Bɛ dɔɣ’ ti la Yɛhudianima, ka ti pala bɛn pa Yɛhudianim’ bɛn nyɛ alahichinim’ ŋɔ,

¹⁶ amaa ti mi ni Naawuni bi chɛ ka so yiri taali ni o sani fukumsi zaligu dolibu zuɣu, amaa Yisa Masia yɛda niŋbu zuɣu ka nir’ yiri taali ni ŋun’ Naawuni sani. Hal ti gba niŋla Yisa Masia yɛda ni ti tooi yi taali ni Naawuni sani Masia yɛda niŋbu zuɣu, ka pa ni fukumsi zaligu dolibu zuɣu, dama so ku tooi yi taali ni Naawuni sani fukumsi zaligu maa dolibu zuɣu.

¹⁷Ka ti yi kpaŋdi timaŋa ni ti doli Masia n-yi taali ni Naawuni sani, amaa ka nya ka ti nyɛla alahichinima kaman bɛn pa Yɛhudianim’ la, di wuhiri ni Masia nyɛla ŋun ʒe alahichi tumbu nyaaŋa? Naawuni di wuhi gba!

¹⁸Dama n yi lan labi m-me n ni daa pun wurim shɛl’ la, dindina n leela ŋun tum din chihi Naawuni fukumsi zaligu ni wuhi shɛm.

¹⁹Naawuni fukumsi zaligu n-chɛ ka n kpi zaŋ chaŋ di dolibu polo ni di chɛ ka n tooi be Naawuni zuɣu.

²⁰M mini Masia kpimi o dapulli zuɣu, ka di pala mani n-lan be maa, amaa di nyɛla Masia ŋun be n ni la m-be maa; ka n ni mali biɛhigu shɛli pumpɔŋɔ ŋɔ, m mal’ li la Naawuni Bia ŋun daa yuri ma ka kpi n zuɣu maa yɛda niŋbu zuɣu.

²¹M bi daai Naawuni daalibarika baɣili, dama taali ni yibu Naawuni sani yi yila Naawuni fukumsi zaligu dolibu ni na, dindina Masia kum la ka daliri.