Read Dagbani Galɛshianima 3 Bible Online

Galɛshianima 3 - Dagbani bible

Galɛshianima 3

¹Yinim’ Galɛshianim’ bɛn tum jɛrilim ŋɔ, timalaan’ ŋuni n-lee birim ya? Yisa Masia dapulli zuɣu kum yɛla daa kahigi wuhi palɔni yimaŋmaŋ’ ninni.

²Chɛliya ka m bɔhi ya bin’ yini ŋɔ kɔŋko yɛla: Naawuni fukumsi zaligu dolibu zuɣu ka yi daa deei Naawuni Shia Kasi bee lahibal’ suŋ yɛla wumbu mini di yɛda niŋbu zuɣu ka yi daa deei Naawuni Shia Kasi maa?

³Yi yɛm bi yaɣi lala? Yinim’ bɛn daa piligi Naawuni Shia Kasi yiko ni ŋɔ, yi yɛn zaŋla yimaŋmaŋ’ yiko naai?

⁴Yi ni nya kpahimbu shɛŋa pam la zaa kpalimla yoli? Di yi shiri nyɛla yoli, m bɔri ni m baŋ.

⁵Naawuni ŋun zaŋ o Shia Kasi tin ya ka tumd’ alahiziba tuma yi san’ la, Naawuni fukumsi zaligu dolibu zuɣu bee lahibal’ suŋ yɛla wumbu mini yɛda niŋbu zuɣu ka o niŋdi lala maa?

⁶ Di sab’ Naawuni Kundi ni yɛli ni ti yab’ Ibrahimma daa niŋ Naawuni yɛda, ka Naawuni zaŋ o zali wuntia zaani o yɛda niŋbu maa zuɣu.

⁷ Dinzuɣu baŋmiya ni ninvuɣ’ shɛb’ bɛn niŋ yɛda n-nyɛ Ibrahimma yaansi.

⁸ Naawuni Kundi daa pun daŋ tiri wuhi ni Naawuni ni ti chɛ ka bɛn pa Yɛhudianim’ yi taali ni ŋun’ Naawuni sani bɛ yɛda niŋbu zuɣu, ka daa daŋ yihi lahibal’ suŋ ŋɔ waazu ti Ibrahimma yɛli: “A zuɣu ka zuliya kam zaa ni ti nya alibarika.”

⁹Dinzuɣu ninvuɣ’ shɛb’ bɛn niŋ yɛda pahila ti yab’ Ibrahimma ŋun daa niŋ yɛda maa zuɣu nya alibarika.

¹⁰ Noli ni di ninvuɣ’ shɛb’ bɛn zaa zaŋ bɛmaŋ’ dalim Naawuni fukumsi zaligu dolibu, dama di sabiya: “Noli ni di ŋunkam bi deei binshɛɣukam zaa din sabi Naawuni fukumsi zaligu ni n-dol’ li.”

¹¹ Pumpɔŋɔ di kahigi wuhi ni so ku tooi yi taali ni Naawuni sani fukumsi zaligu dolibu zuɣu, dama di sabiya: “Ŋun yi taali ni Naawuni sani kul ni bela yɛda niŋbu zuɣu.”

¹² Naawuni fukumsi zaligu bi dalimla yɛda niŋbu, dama di sabiya: “Ŋunkam dol’ li ni be di zuɣu.”

¹³ Amaa Masia daa zaŋ omaŋ’ pa talima n-fa ti fukumsi zaligu noli din daa doli ti la ni bahi, o ni daa zani ti zaani n-chɛ ka noli di o ti zuɣu la puuni, dama di sabiya: “Noli di bɛ ni zaŋ sokam yili tia.”

¹⁴Di daa niŋla lala ni di chɛ ka bɛn pa Yɛhudianim’ nya Ibrahimma ni daa nya alibarika shɛl’ la Yisa Masia zuɣu, ka ti zaa tooi deei Naawuni Shia Kasi so o ni daa lo ti alikauli la yɛda niŋbu zuɣu.

¹⁵M mabihi, m bɔri ni n zaŋla ninsala yɛla buɣisi yɛlli ŋɔ: Ninsalinim’ yi laɣim lo alikauli ka zani di nyaaŋa, so ku tooi saɣim li bee m-pahi shɛli di zuɣu.

¹⁶ Naawuni daa lola Ibrahimma min’ o yaaŋa alikaulinima. Naawuni daa bi yɛli Ibrahimma, “N lo a min’ a yaansi alikaulinima,” ka di wuhiri ni bɛ ninvuɣ’ bɔbili. Amaa o daa yɛl’ o mi, “N lo a min’ a yaaŋa alikaulinima,” ka di wuhirila ninvuɣ’ yino ŋun nyɛ Masia la.

¹⁷ N ni yɛli shɛm maa gbinni m-bɔŋɔ: Yuun’ kɔbisinahi ni pihita din daa doli dimbɔŋɔ nyaaŋa saha ka Naawuni daa zaŋ o fukumsi zaligu ti o niriba; amaa Naawuni fukumsi zaligu maa ku tooi saɣim alikauli shɛli Naawuni ni daa pun lo ka zani di nyaaŋ’ la n-chɛ ka ŋun’ Naawuni daalikauli maa kpalim yoli.

¹⁸ Dama Naawuni ni tiri shɛli yi yila Naawuni fukumsi zaligu dolibu ni na, dindina di lan pala alikauli lɔbu zuɣu; amaa Naawuni daa zaŋ li tila ti yab’ Ibrahimma alikauli lɔbu zuɣu.

¹⁹Bɔzuɣu ka Naawuni daa zali fukumsi zaligu maa? Di daa nyɛla o ni zaŋ shɛli pahi ni di wuhiri biriginsim ni nyɛ shɛli, ka beni hal ka o ni daa lo Ibrahimma yaan’ so alikauli la ti kana. Malaikanima n-daa zaŋ Naawuni fukumsi zaligu maa ti sandaantimdi so ŋun daa ʒe Naawuni min’ o niriba sunsuuni la.

²⁰Amaa Naawuni nyɛla yino, ka o mi bi bɔri sandaantimda ŋun’ Naawuni yino maa zuɣu.

²¹Dimbɔŋɔ wuhiya ni Naawuni fukumsi zaligu chihila Naawuni daalikaulinima? Naawuni di wuhi gba! Dama Naawuni yi daa zali fukumsi zaligu shɛli ni di tooi tahi nyɛvili na, dindina taali ni yibu Naawuni sani naan shiri yi fukumsi zaligu maa dolibu ni na.

²²Amaa Naawuni Kundi wuhiya ni sokam zaa bela alahichi sulinsi ni ni di chɛ ka Naawuni ni daa zaŋ shɛli lo alikauli Yisa Masia yɛda niŋbu puuni la tooi paai bɛn niŋ yɛda.

²³Yɛda niŋbu soli ni daa na bi kana, ti daa bela Naawuni fukumsi zaligu sulinsi ni ni di gbibi ti hal ti paai yɛda niŋbu soli maa palo yibu saha.

²⁴Dinzuɣu Naawuni fukumsi zaligu maa daa nyɛla ti gula hal ka Masia ti kana ni di chɛ ka ti yi taali ni Naawuni sani yɛda niŋbu zuɣu.

²⁵Amaa yɛda niŋbu soli maa ni yipa kana pumpɔŋɔ zuɣu, ti bi lan be gula maa sulinsi ni yaha.

²⁶Yisa Masia puuni yi zaa nyɛla Naawuni bihi yɛda niŋbu zuɣu.

²⁷Bɛ ni daa baptaizi yinim’ shɛb’ Yisa Masia ni la zaŋla Masia biɛhigu kaman binyɛrigu la ye.

²⁸Yɛhudianim’ mini bɛn pa Yɛhudianim’ ni daba mini bilichinnima ni dɔbba mini paɣiba zaa bi be kɔŋkɔba; yi zaa nyɛla zaɣ’ yini Yisa Masia ni.

²⁹Ka yi yi nyɛla Masia ni su shɛba, dindina yi nyɛla Ibrahimma yaansi bɛn ni di o fali kaman Naawuni daalikauli la ni wuhi shɛm.