Read Dagbani Galɛshianima 4 Bible Online

Galɛshianima 4 - Dagbani bible

Galɛshianima 4

¹N ni yɛli shɛm maa wuhiya ni bi’ so ŋun nyɛ falidira yi na nyɛ bia, hal o ni kul su binshɛɣukam maa zaa yoli, o bi gari dabili.

²Dama o ni na pɔri maa zuɣu ninvuɣ’ shɛba n-ni yuun’ o, ka maan’ o yɛla tir’ o hal ti paag’ o ba ni zali dabisi’ shɛli dali.

³Lala n-nyɛ ti gba, ti ni daa nyɛ bihi ka na bi zooi wuntia soli dolibu ni la, ti daa nyɛla bɛn be dunia ŋɔ yɛliniŋda dabitim ni.

⁴Amaa saha ni daa ti paai, Naawuni daa tim o Bia na n-chɛ ka paɣ’ dɔɣ’ o fukumsi zaligu sulinsi ni

⁵ni o zaŋ omaŋ’ pa talima n-tiligi bɛn be fukumsi zaligu maa sulinsi ni, ka zaŋ ti leei ŋun’ Naawuni bihi.

⁶Yi gba ni nyɛ Naawuni bihi maa zuɣu ka Naawuni tim o Bia maa Shia ka o kana ti be ti suhuri ni kuhiri yɛra, “M Ba! M Ba!”

⁷ Dinzuɣu Naawuni zuɣu a lan pala dabili, amaa a nyɛla Naawuni bia, ka a yi nyɛla Naawuni bia, dindina a nyɛla ŋun dir’ o bini.

⁸Saha shɛli ha yi ni daa na ʒi Naawuni la, yi daa bela dunia ŋɔ binshɛŋa din pa bin’ jɛmda dabitim ni.

⁹Amaa pumpɔŋɔ yi yipa baŋ Naawuni bee Naawuni yipa baŋ ya, ka di chaŋ wula ka yi yɛn lab’ dunia ŋɔ yɛliniŋda din gbarigi ka ka yaa ŋɔ dabitim ni yaha? Bɔ n-niŋ ka yi lan bɔri ni yi labi di sulinsi ni yaha?

¹⁰Yi puhiri dabisa mini goya ni saha ni yuma churi!

¹¹N ni tum shɛlikam zaŋ chaŋ yi polo ti kpalim yoli zuɣu chɛ ka n suhu kul zɔhirimi.

¹²M mabihi n suhiri ya, benya kaman mani, dama n gba bemi kaman yinima. Yi bi tum ma taali.

¹³Yi mi ni di daa nyɛla n daalaafee kalinsi zuɣu ka n daa be yi sani n-tuui yihi lahibal’ suŋ waazu tin ya;

¹⁴ka hal dɔro maa ni daa mali ma maa zaa yoli, di zuɣu daa bi chɛ ka yi zo ka chɛ ma, ka mi daa bi mali ma ansarisi n-ʒiɛm ma, amaa ka daa deei ma kaman Naawuni malaika bee kaman Yisa Masia maŋmaŋa.

¹⁵Bɔ n-lee chɛ ka yi bi lan mali suhupiɛlli kaman yi ni daa pun mali shɛm la? N din ya shɛhira ni di yi di daa naan nani, yi daa naan kpaɣi yimaŋmaŋ’ nina ti ma.

¹⁶Ka pumpɔŋɔ n yipa leela yi dima n ni yɛli ya yɛlimaŋli zuɣu?

¹⁷Ninvuɣ’ shɛb kpaŋdi bɛmaŋa ni bɛ wuhi ni bɛ baɣa be yi ni, amaa pa daliri suŋ zuɣu ka bɛ niŋdi lala. Bɛ bɔrimi ni bɛ woligi m mini ya din ni chɛ ka yi baɣa be bɛ ni.

¹⁸Ka ninvuɣ’ shɛb’ yi niŋdi din wuhiri ni bɛ baɣa be yi ni ka di nyɛla daliri suŋ zuɣu, din’ nyɛla zaɣ’ viɛlli sahakam, din’ dee yi pala n yi ti be yi sani kɔŋko zuɣu.

¹⁹M biyurisi bɛn nyɛ n ni lan wolisiri shɛb’ zuɣu ni Masia be yi ni ŋɔ,

²⁰n di bi zaɣisi ni m be yi sani pumpɔŋɔ n-taɣ’ zilinli zaŋ chaŋ yi polo, dama n suhu zɔhiri yi zuɣu.

²¹Yinim’ bɛn bɔri ni yi be fukumsi zaligu sulinsi ni ŋɔ, yi bi wum fukumsi zaligu maa ni yɛli shɛm? Yɛlimiya ma!

²² Dama di sabiya ni Ibrahimma daa dɔɣi bidibis’ ayi: Yino daa nyɛla dab’ paɣ’ bia, ka ŋun’ la mi nyɛ bilichin’ paɣ’ bia.

²³Bɛ daa dɔɣila dab’ paɣ’ bia maa kaman daadamnim’ ni dɔɣiri bia kam shɛm, ka daa dɔɣi bilichin’ paɣ’ bia maa mi alikauli lɔbu puuni.

²⁴Dimbɔŋɔ nyɛla ŋmahinli. Paɣiba ŋɔ nyɛla alikauli diba ayi: Yino yila Sinai Zoli zuɣu na n-dɔɣiri bihi bɛn nyɛ daba. Ŋuna n-nyɛ Haga.

²⁵Haga n-nyɛ Sinai Zoli din be Areebia tiŋgbɔŋ ni la ŋmahinli; o lan nyɛla Jɛrusalɛm din be pumpɔŋɔ ŋɔ ŋmahinli, dama o min’ o bihi bela dabitim ni.

²⁶Amaa alizanda ni Jɛrusalɛm la nyɛla bilichina. Ŋuna n-nyɛ ti ma.

²⁷ Dama di sabiya: “Paɣiŋoo ŋun bi dɔɣi, mali suhupiɛlli! Nyin’ ŋun ʒi bia dɔɣibu wolisibu biɛrim ŋɔ, yaam’ a noli n-tahi suhupiɛlli tahigu! Dama bɛ ni chɛ paɣ’ so bahi mali bihi pam n-gari ŋun mali yidana.”

²⁸M mabihi, pumpɔŋɔ ti ŋmanila Yisahaku; ti nyɛla Naawuni bihi o daalikauli lɔbu zuɣu.

²⁹ Ka di ni daa be shɛm di saha maa, bɛ ni daa dɔɣ’ so kaman daadamnim’ ni dɔɣiri bihi shɛm ni daa muɣisiri bɛ ni dɔɣ’ so Naawuni Shia yiko ni shɛm la, lala n-na kul nyɛ li pumpɔŋɔ.

³⁰Ka wula ka Naawuni Kundi lee yɛli? Di yɛliya, “Karim dab’ paɣa min’ o bia bahi, dama dab’ paɣ’ bia mini bilichin’ paɣ’ bia ku laɣim di fali.”

³¹Dinzuɣu m mabihi, ti pala dab’ paɣ’ maa bihi, amaa ti nyɛla bilichin’ paɣ’ la bihi.