Read Dagbani Ɛfɛsusnima 1 Bible Online

Ɛfɛsusnima 1 - Dagbani bible

Ɛfɛsusnima 1

¹ Man’ Pool ŋun nyɛ Yisa Masia tumo Naawuni yubu puuni la n-sabiri gbaŋ ŋɔ tiri Naawuni ninvuɣ’ gahinda bɛn be Ɛfɛsus ka nyɛ bɛn ʒe yim Yisa Masia san’ la.

²Ti Ba Naawuni mini ti Duuma Yisa Masia niŋm’ alibarika niŋ yi ni, ka tin ya suhudoo!

³Paɣimiya Naawuni ŋun nyɛ ti Duuma Yisa Masia Ba ŋun niŋ alibarika kam din nyɛ alizanda ni alibarika niŋ ti ni Masia zuɣu ŋɔ!

⁴Dunia ni daa na bi nam saha shɛl’ la, ka Naawuni daa pun pii ti leeg’ o niriba Masia zuɣu ni di chɛ ka ti be kasi ka ka galimi ŋun’ Naawuni sani. Naawuni yurilim zuɣu

⁵ka o daa pun lo ni o ni zaŋ ti tah’ omaŋmaŋ’ sani n-chɛ ka ti leeg’ o bihi Yisa Masia zuɣu; o ni daa lo shɛm min’ o yubu ni daa nyɛ shɛm m-bala.

⁶Chɛliya ka ti paɣi Naawuni o ni niŋ anfaan’ shɛli din mali jilima niŋ ti ni yoli o Biyurigu zuɣu la.

⁷ Yisa ʒim zuɣu ka ti nya yolisim. Dina n-nyɛ alahichi chɛ m-paŋ, ka di mi nyɛla o daanfaan’ shɛli din galisi

⁸ka o niŋ li pam niŋ ti ni la zuɣu. Naawuni yɛm min’ o ni nyari din be tooni zaa la zuɣu,

⁹ka o daa niŋ omaŋmaŋ’ ni pun lo shɛm, ka kahigi ashili nia shɛli o ni pun lo ni o pal’ li Masia zuɣu la wuhi ti.

¹⁰Naawuni ni lo nia shɛli ni di saha ti paai ka o pal’ li la nyɛla ni o ti laɣim binnamda zaa luɣ’ yini: Binnamda bɛn be alizanda ni mini bɛn be dunia ŋɔ ni, ka Masia ti nyɛ bɛ zuɣulana.

¹¹Naawuni nia lɔbu min’ o ni zali shɛm puuni ka binshɛɣukam zaa niŋda; ka ŋun’ Naawuni pii ti leeg’ omaŋmaŋ’ niriba ti mini Masia ni laɣim nyɛ zaɣ’ yini kaman ŋun’ Naawuni ni daa pun lo ka zal’ li shɛm omaŋmaŋ’ yubu puuni piligu ni ha la zuɣu.

¹²Dinzuɣu chɛliya ka tinim’ bɛn daa tuui mali tahima Masia ni la chɛ ka ti biɛhigu nyɛ din tibigiri Naawuni ka tir’ o jilima.

¹³Lala n-daa nyɛ li yi gba sani: Yi ni daa wum yɛlimaŋli lahibal’ suŋ din tahi tiliginsim na ti tin ya la, yi daa niŋ Masia yɛda ka Naawuni daa zaŋ o dalinli din wuhi ni o sun ya n-tabili ya o ni daa zaŋ o ni pun lɔn ya Shia Kasi so alikauli tin ya la puuni.

¹⁴Naawuni Shia Kasi n-nyɛ Naawuni ni daa lo o niriba alikauli ni bɛ ti yɛn nya shɛl’ la shihirili, hal ka tinim’ bɛn nyɛ omaŋmaŋ’ niriba nya yolisim maŋli, ka di chɛ ka ti tibigiri Naawuni ka tir’ o jilima.

¹⁵Daliri ŋɔ zuɣu saha shɛli n ni daa wum yi ni niŋ ti Duuma yɛda mini yi ni yuri Yisa nyaandoliba zaa shɛm yɛla, di chɛ ka

¹⁶n kul paɣirila Naawuni yi zuɣu sahakam, ka kul teeri yi yɛla n wunsuhigu puuni.

¹⁷N suhiri Naawuni ŋun nyɛ ti Duuma Yisa Masia Naawuni ka nyɛ o Ba ŋun nyɛ jilimalan’ ŋɔ ni o tin ya o Shia Kasi ŋun ni chɛ ka yi nya yɛm, ka kahigi Naawuni ni nyɛ so wuhi ya ka yi baŋ o.

¹⁸N suhir’ o ni o neei yi tɛha ka yi nya o neesim, ka di chɛ ka yi baŋ o ni boli ya tahima shɛli zuɣu min’ o ni lo o niriba alahiziba alibarika shɛŋa alikaulinim’ la

¹⁹m-pahi o yiko shɛli din tumdi tuma tinim’ bɛn niŋ yɛda ŋɔ ni ni galisi shɛm la. Yiko shɛli din be ti ni ŋɔ mini Naawuni ni daa zaŋ yiko shɛli

²⁰ din galisi neei Masia kum ni n-zaŋ o ʒili o nudirigu polo alizanda ni la nyɛla yim.

²¹Nimaani ka Masia be ka su binshɛɣukam zaa zaŋ tabili alizinnim’ bɛn nyɛ zuɣulaannim’ mini bɛn su fukumsi ni yikolaannim’ ni bɛn nyɛ duumanima, ka o yuli tibisi gari yuli kam ʒiɛmani ŋɔ ni mini ʒiɛman’ shɛli din kanna ni.

²² Naawuni pun zaŋ binshɛɣukam zaa sɔŋ Masia naba ni, ka zaŋ o leei cheechi zuɣu ni o su cheechi binshɛɣukam zaa fukumsi.

²³ Lala zuɣu cheechi nyɛla Masia ŋun nyɛ cheechi zuɣu maa niŋgbuŋ; ka ŋun’ Masia nyɛ binshɛɣukam ni pali so ni, ka o mi nyɛ ŋun pali binshɛɣukam ni mini luɣ’ shɛlikam zaa hal ti puuri bahira.