Read Dagbani Ɛfɛsusnima 4 Bible Online

Ɛfɛsusnima 4 - Dagbani bible

Ɛfɛsusnima 4

¹Man’ ŋun nyɛ dansarika n ni tumdi n Duuma tuma la zuɣu kpamdi ya jaande ni yi mali biɛhigu din doli Naawuni ni daa zali ya biɛhigu so’ shɛl’ o ni daa boli ya boligu shɛl’ la puuni.

² Siɣisimiya yimaŋ’ be baalim, ka mali suɣilo sahakam. Dimiya suɣilo zaŋ chaŋ yi tab’ polo yurilim puuni.

³Suhudoo din lɔn ya tabili tab’ la zuɣu, chɛliya ka yi suhuri ye naŋgban’ yini malibu shɛli Naawuni Shia Kasi ni tiri ti la zuɣu.

⁴Niŋgbun yini mini Shi’ yino m-beni kaman tahima yini din nyɛ Naawuni ni boli ya shɛli zuɣu ni beni shɛm la.

⁵Duuma yino mini ti ni niŋ yɛda yin’ shɛl’ la ni baptaizibu yini m-beni.

⁶Naawuni yino ŋun nyɛ ti zaa Ba, ka nyɛ ti zaa Duuma ŋun be ti zaa ni ka tumdi ti zaa ni la m-beni.

⁷Ti zaa yinoyino deerila pin’ gahinda kaman Masia ni buɣisiri li shɛm tiri ti.

⁸ Di bemi kaman di ni yɛli shɛm Naawuni Kundi ni la: “O ni daa du zuɣusaa ha la, o daa zaŋ bɛn nyɛ daba la pam mali chaŋ, ka daa zaŋ pina ti ninsalinima.”

⁹Di ni yɛli ni o daa du zuɣusaa ha la gbinni lee nyɛ wula? Di gbinni nyɛla ni o daa tuui siɣimi na hal n-gari siɣi tiŋgbani puuni ha.

¹⁰Dinzuɣu ŋun daa siɣina maa n-nyɛ ŋun daa lan lab’ du zuɣusaa n-gari chaŋ ha ni o ti pali luɣ’ shɛlikam zaa.

¹¹Ŋuna n-nyɛ ŋun daa zaŋ pina ti ninsalinim’ la. O pii shɛb’ leela tuumba, ka pii shɛb’ leeg’ anabinima, ka pii shɛb’ leei Masia lahibal’ suŋ molomooniba, ka pii shɛb’ leei pastanima, ka pii shɛb’ mi leei karimbanima.

¹²O daa niŋ dimbɔŋɔ ni o malila Yisa nyaandoliba zaa shili ka bɛ tum Naawuni tuma n-chɛ ka ŋun’ Masia niŋgbuŋ la zooi

¹³hal ka ti ti paai ti ni niŋ yɛda yin’ shɛl’ la mini ti Naawuni Bia baŋbu la m-bi niriba ka ti biɛhigu buɣisibu saɣisi Masia biɛhigu zaa la.

¹⁴Di saha maa ti ti ku lan be kaman bihi, ka ninvuɣ’ yɔhindiba bɛn zaŋ yɛŋkiŋkabina soli birigi niriba la ni zaŋ yɔhiŋgu wuhibu din be kaman pɔhim la n-chɛ ka di ʒiɛri ti laani ginda.

¹⁵Amaa lee tɔɣisimiyala taba yɛlimaŋli yurilim puuni, ka zooi Masia ŋun nyɛ zuɣu la ni binshɛɣukam puuni.

¹⁶ O kɔbili ni ka niŋgbuŋ maa yaɣili kam zoori kpɛri tab’ ni, ka niŋgbuŋ maa zaa kpe n-saɣisi tab’ ni di tuɣili kam shee. Ka niŋgbuŋ maa yaɣili kam yi tumdi di tuma viɛnyɛliŋga kaman di ni simdi ni di tumdi shɛm, niŋgbuŋ maa zaa zoorimi yurilim puuni.

¹⁷N zanila n Duuma zaani ni n yɛli dimbɔŋɔ kpahi yi zuɣu ni, di lan maliya bɛn baɣa ka Naawuni ni ka bɛ tɛha nyɛ tɛhi’ yoya la biɛhigu.

¹⁸Bɛ tɛha din ni chɛ ka bɛ baŋ nyɛla din be zibisim ni; ka bɛ nuu ka Naawuni ni ti nyɛvil’ shɛl’ la ni, dama bɛ nyɛla bɛn be ʒilinsi ni ka nyɛ suhutunanima.

¹⁹Bɛ leela ninvuɣ’ diɣilima bɛn bi zɔri vi. Bɛ tumdila kɔr’ biɛri tuma, ka bɛ suhuri kul yɛla daɣiri tuma balibu kam tumbu zuɣu.

²⁰Pa lala ka yi daa bɔhim Masia yɛla.

²¹Biɛhiŋ kani, yi pun bɔhim o yɛla, ka yi ni nyɛ o nyaandoliba la zuɣu, bɛ daa pun wuhiya yɛlimaŋ’ shɛli din be Yisa ni maa.

²² Yihimiya yi biɛr’ kurili din chɛ ka yi be kaman yi ni daa pun be shɛm la bahi, dama yi biɛr’ kurili maa daa pun saɣim la kɔr’ biɛ’ shɛŋa din daa yɔhim ya la puuni.

²³Di niŋ kamaata ni yi suhuri mini yi tɛha leela zaɣ’ pala zaa.

²⁴ Di simdi ni yi zaŋ biɛhigu pal’ shɛli Naawuni ni daa nam ka di ŋmani ŋun’ Naawuni maŋmaŋ’ biɛhigu ka nyɛ din tuhi ka be kasi n-ye kaman binyɛrigu la.

²⁵ Dinzuɣu di lan ŋmariya tab’ ʒiri! Sokam yɛlim’ o mabia yɛlimaŋli, dama ti zaa nyɛla niŋgbun yini yaɣ’ shɛŋa.

²⁶ A yi je suli, nyin’ miri ka a chɛ ka a sujee maa ti kpɛh’ a alahichi ni, ka a mi miri ka a je suli hal ka wuntaŋ’ ti lu.

²⁷Di ti Sintani soli hal biɛla!

²⁸Ninvuɣ’ so ŋun daa yi fari niriba, ŋun’ chɛli fabu maa ka tummila omaŋmaŋ’ nuu zuɣu tuma n-dihir’ omaŋa hal ka ni tooi sɔŋdi nandaamba.

²⁹Di chɛliya ka yɛtɔɣ’ yoya yiri yi noya ni na naɣila din kpaŋsiri niriba suhuri, ka di ni niŋ bɛnkam zaa wum li anfaani.

³⁰Di saɣimya Naawuni Shia Kasi suhu, dama ŋuna n-nyɛ Naawuni ni zaŋ so dalim ya n-wuhi ni dahin’ shɛli kanna ka o ni ti fan ya bahi zaa.

³¹Yihimiya putɔɣu mini suhuyiɣisili ni sujee ni zabili ni nyaanzubo ni biɛr’ biɛɣu zaa yi bebu ni.

³² Ka niŋmiya tab’ nirilim, ka mali nambɔzɔbo biɛhigu, ka chɛri yi tab’ taali paŋdi ba kaman Naawuni ni daa chɛ m-paŋ yi gba Masia zuɣu shɛm la.