Read Dagbani Ɛfɛsusnima 5 Bible Online

Ɛfɛsusnima 5 - Dagbani bible

Ɛfɛsusnima 5

¹Dinzuɣu yi ni nyɛ Naawuni biyurisi la zuɣu, di simdi ni yi chɛ ka yi bebu be kaman o bebu.

² Di niŋ kamaata ni yi mali yurilim yi bebu ni kaman Masia ni daa yu ti ka zaŋ omaŋ’ pa talima ti zuɣu, ka di tiɣi Naawuni nini kaman sara shɛli din nyom viɛl’ ŋun’ Naawuni san’ la.

³Di chɛliya ka zina niŋbu mini daɣiri tuma zaa be yi ni bee n-chɛ ka yi kɔre kpɛri binyara ni, dama di bi simdi ni dimbɔŋɔnim’ be Yisa nyaandoliba biɛhigu ni hal baabiɛla.

⁴Ka chanya yɛtɔɣ’ yoya mini yɛtɔɣ’ chɔɣima tɔɣisibu ni asahi kpɛma niŋbu. Di zaa ŋɔ shɛli bi simdi niŋbu, amaa din simdi niŋbu nyɛla wumpaɣibo.

⁵Baŋmiya ni ŋun nyɛ ŋun niŋdi zina bee ŋun tumdi daɣiri tuma bee ŋun kɔre kpɛri binyara ni ti ku nya shɛli Masia mini Naawuni nam ni, dama binyara ni kɔre kpɛbu ŋmanila buɣijɛmbo.

⁶Di chɛliya ka so zaŋ yɛtɔɣ’ yoya yɔhim ya, dama dimbɔŋɔnim’ zuɣu ka Naawuni suhu kul yiɣisiri bahiri bɛn bi deer’ o noli zuɣu.

⁷Dinzuɣu di chɛliya ka yi mini niriba lala tatabo be.

⁸Yi gba maŋmaŋ’ daa bela zibisim ni, amaa ti Duuma ni, yi yipa leela bɛn be neesim ni pumpɔŋɔ. Dinzuɣu benya kaman neesim ni niriba,

⁹dama binshɛɣukam din nyɛ zaɣ’ suŋ mini din tuhi ka nyɛ yɛlimaŋli yirila neesim ni na.

¹⁰Kpaŋmiya yimaŋ’ bɔhim baŋ din tiɣiri ti Duuma nini.

¹¹Di chɛliya ka yi nuu be zibisim tuun’ yoya ni, amaa lee yihimiya tuun’ yoya maa la palɔni.

¹²Di nyɛla vi ni nir’ tɔɣisi niriba ni niŋdi binshɛŋa ashilɔni yɛla.

¹³Binshɛɣukam neesim ni yihi palɔni, di biɛhigu maŋli gba yirimi do palɔni; dama binshɛɣukam din yi n-do palɔni gba leela neesim.

¹⁴Di bemi kaman di ni sabi luɣ’ shɛli polo shɛm la: “Nyin’ gɔgbihira, yiɣisima n-neei kum ni! Ka Masia ti a neesim.”

¹⁵Dinzuɣu kpahimmiya yi ni be shɛm viɛnyɛliŋga, ka di benya kaman bɛn be ʒilinsi ni, amaa ka lee bemi kaman yɛnnima.

¹⁶ Zaŋmiya yi ni mali dahima shɛli n-tummi di ni simdi ni yi tum shɛm ni nimmoo, dama ʒiɛmani ŋɔ nyɛla ʒiɛmaan’ biɛɣu.

¹⁷Dinzuɣu di nyɛnya jɛra, amaa bomiya baŋ ti Duuma yubu ni nyɛ shɛm.

¹⁸Di nyuriya dam kuuna, dama di nyubu puuni ka ninvuɣ’ yotali yirina, amaa lee chɛliya ka Naawuni Shia Kasi pali yi suhuri ni.

¹⁹Zaŋmiya adiini yila mini Naawuni paɣibu yila ni Yila litaafi ni yila kpaŋsiri taba, ka yilimiya yila paɣimi ti Duuma ni yi suhuri zaa.

²⁰ Kul paɣimiya ti Ba Naawuni binshɛɣukam zaa puuni sahakam ti Duuma Yisa Masia yuli zuɣu.

²¹Zaŋmiya yimaŋ’ ti taba yi ni luri Masia sizuura la zuɣu.

²² Yidaampaɣiba, zaŋmiya yimaŋ’ ti yi yidaannima ka di be kaman yi zaŋ yimaŋ’ tila ti Duuma la.

²³Yidana n-su o paɣ’ fukumsi kaman Masia ni su cheechi fukumsi shɛm la; Masia maŋmaŋ’ mi n-lan nyɛ cheechi din nyɛ o niŋgbuŋ la tiligira.

²⁴Cheechi maa ni zaŋ dimaŋ’ ti Masia shɛm la, lala ka di simdi ni yidaampaɣiba gba zaŋ bɛmaŋ’ ti bɛ yidaannim’ binshɛɣukam zaa ni.

²⁵ Yidaannima, yumiya yi paɣiba kaman Masia ni yuri cheechi maa ka zaŋ omaŋ’ pa talima di zuɣu shɛm la.

²⁶O daa niŋ lala la o ni daa zaŋ Naawuni yɛligu kaman kom paɣ’ li m-mal’ li ka di be kasi la puuni

²⁷ni di chɛ ka cheechi maa viɛla, ka ka liɣisibu bee gurimbu, ka ni bela kasi ka ka galimi, ka o zaŋ li ti omaŋa.

²⁸Lala ka di simdi ni yidaannim’ gba yuri bɛ paɣiba kaman bɛ ni yuri bɛmaŋmaŋ’ niŋgbuŋ shɛm la. Ŋun yur’ o paɣa yurila omaŋa.

²⁹So na ʒi n-zaɣis’ omaŋmaŋ’ niŋgbuŋ, amaa o dihiri li mi ka maani li kaman Masia ni niŋdi cheechi shɛm la,

³⁰dama ti nyɛla o niŋgbuŋ yaɣa.

³¹ Di bemi kaman di ni sab’ shɛm la: “Daliri ŋɔ zuɣu ka doo ŋmaligir’ o ba min’ o ma sani n-zaŋd’ omaŋ’ tabind’ o paɣa ka bɛ niriba ayi maa be kaman ninvuɣ’ yino.”

³²Yɛlimaŋ’ kpani kahigi wuhi dimbɔŋɔ puuni, ka man’ sani n nyaya ka di wuhirila Masia mini cheechi yɛla.

³³Amaa di wuhiri yi gba yɛla: Di simdi ni yidan’ kam yur’ o paɣa kaman omaŋmaŋ’ la; ka di simdi ni yidaampaɣ’ kam gba lur’ o yidan’ sizuura.