Read Dagbani Ɛfɛsusnima 6 Bible Online

Ɛfɛsusnima 6 - Dagbani bible

Ɛfɛsusnima 6

¹ Bihi, deemiya yi banim’ mini yi manim’ noya ti Duuma zuɣu, dama dina n-tuhi.

²Naawuni fukumsi zaligunim’ ni din tuui mal’ alikauli di ni yɛliya: Tim’ a ba min’ a ma jilima.

³ Dina n-ni chɛ ka yi mal’ alaafee ka lan yuui dunia ŋɔ ni.

⁴ Ka yinim’ bihi banima, di yihiri ya yi bihi hal’ biɛɣu hal ka di ti chɛ ka bɛ suhuri miligi, amaa zaŋmiyala saɣisigu din nyɛ ti Duuma dini wumsiri ba.

⁵Daba, deemiya yi dunia ŋɔ ni duumanim’ noya ni dabeenzɔbo mini ni sɔhibu, ka niŋmiya lala ni nimmoo kaman yi niŋdi li tirila Masia la.

⁶Di niŋdiya li la saha shɛli bɛ nini ni beni zuɣu ni di chɛ ka bɛ nini tiɣi ya, amaa niŋmiyala din tiɣiri Naawuni nini ni yi suhuri zaa, yi ni nyɛ Masia daba la zuɣu.

⁷Tummiya yi dabitali tuma ni suhupiɛlli ka di be kaman yi tumdi li tirila ti Duuma la, ka pa ni ninsalinima;

⁸ ka minya ni ninsal’ ni tum tuun’ suŋ shɛlikam, o ni ti deei di laara ti Duuma sani, o yi nyɛla dabili bee bilichina.

⁹ Duumanima, yi gba niŋmiya yi daba lala, ka chɛ ba dabiɛm kpɛhibu, dama yi mi ni yi mini ba zaa Duuma be alizanda ni, ka o mi bi yaai so yuri ka chɛ so.

¹⁰Din bahindi nyaaŋa nyɛla ŋ-ŋɔ: Maliya yaa ti Duuma min’ o kpiɔŋ ni o yiko ni.

¹¹Yɛmiya Naawuni gbaɣino mini di nɛma zaa, ka di chɛ ka yi tooi nyaŋ Sintani yɛŋkiŋkabina soya zaa.

¹²Dama pa ti mini ninsalinima n-tuhiri taba, amaa ti mini alizinnim’ bɛn be sagbana tiŋli ŋɔ na mini bɛn nyɛ zuɣulaannima ni bɛn su fukumsi mini dunia ŋɔ yikolaannim’ bɛn be zibisim ʒiɛmani ŋɔ ni la n-tuhiri taba.

¹³Dinzuɣu yɛmiya Naawuni gbaɣino mini di nɛma zaa, ka di chɛ ka yi tooi ba n-zani dabisi’ biɛɣu dali, ka yi yi niŋ dimbɔŋɔnim’ zaa, yi shiri ni ba n-zani.

¹⁴ Dinzuɣu malimiya shili zani. Zaŋmiya yɛlimaŋli leei shɛlɔriti lo yi shɛhi ni, ka zaŋ wuntitali leei yi nyɔtaɣirisi;

¹⁵ ka zaŋ suhudoo lahibal’ suŋ molo molibu leei namdanim’ piri.

¹⁶Ka din gari di zaa nyɛla, zaŋmiya yɛda niŋbu leei bintaɣirisi din ni chɛ ka yi tooi tiligi Sintani piɛma din noya ni mali buɣim la nyɔɣibu.

¹⁷ Zaŋmiya tiliginsim kaman tɔbutuhir’ zuɣupila la pili, ka zaŋ Naawuni yɛligu din nyɛ Shia Kasi takɔb’ la gbibi.

¹⁸Niŋmiya dimbɔŋɔnim’ zaa wunsuhigu puuni n-yɛri Naawuni ni o sɔŋmi ya. Kul suhimiya Naawuni sahakam kaman Naawuni Shia Kasi ni wuhiri ya shɛm. Daliri ŋɔ zuɣu kul lihimiya viɛnyɛliŋga ka di tiriya gbini, ka kul suhimiya Naawuni sahakam tiri Naawuni ninvuɣ’ gahinda zaa.

¹⁹Suhimiya Naawuni tiri n gba, ka Naawuni ti ma n ni yɛn tɔɣisi yɛtɔɣ’ shɛŋa ka n tooi tɔɣisiri li ni suhukpeeni n-kahigiri lahibal’ suŋ la ashili gbinni ni nyɛ shɛm wuhiri niriba.

²⁰Lahibal’ suŋ ŋɔ zuɣu ka n nyɛ Masia tumo ŋun ʒe o zaani, ka bɛ lo ma zoligɔnim’ di zuɣu ŋɔ. Kul suhimiya Naawuni tiri ma ka n tooi mali suhukpeeni n-kul tɔɣisiri lahibal’ suŋ maa yɛla kaman di ni simdi ni n tɔɣisiri li shɛm.

²¹ Tikikus ŋun nyɛ ti mabiyurigu ŋun ʒe yim ti Duuma ni la ni ti yɛli ya n yɛla ni nyɛ shɛm zaa, ka di chɛ ka yi tooi baŋ n ni be shɛm.

²² Di zuɣu ka n timd’ o yi sanna ni o ti yɛli ya ti zaa ni be shɛm, ka di kpaŋsi yi suhuri.

²³Ti Ba Naawuni mini ti Duuma Yisa Masia chɛ ka suhudoo mini yurilim ni yɛda be ti mabihi la zaa ni.

²⁴Naawuni daalibarika kpalimmi be bɛnkam zaa yuri ti Duuma Yisa Masia yurilim shɛli din ku naai la ni!