Read Dagbani Filipainima 2 Bible Online

Filipainima 2 - Dagbani bible

Filipainima 2

¹Yi nyari suhukpaŋsibo yi ni be Masia ni la zuɣu? Yi nyari suhumaabo o yurilim zuɣu? Yi mini Naawuni Shia Kasi mali simdi ni taba? Yi niŋdi tab’ nirilim ka zɔri tab’ nambɔɣu?

²N kpamdi ya jaande ni yi mali tɛhi’ yini mini yurilim yini, ka mali suhu yini tɛhi’ yini puuni, ka di chɛ ka n suhu paligi zaa.

³Di niŋya binshɛli nyuli zabbu tɛha puuni bee m-bɔri ni yi doli alaha soli nyu bara; amaa siɣisimiya yimaŋa yi tab’ sani ka miriya ka yi tɛhiri ni yi so yi taba.

⁴Chɛliya ka yi baɣa be yi taba yɛla ni kaman di ni be yimaŋmaŋ’ yɛla ni shɛm.

⁵Chɛliya ka yi tɛha be kaman tɛhi’ shɛli din be Masia ni la:

⁶O kul malila Naawuni biɛhigu sahakam, amaa o daa bi tɛhi ni di simdi ni o duh’ omaŋa n-wuhi ni o mini Naawuni saɣiya.

⁷Omaŋmaŋ’ yubu puuni ka o daa chɛ di zaa, ka zaŋ omaŋa leei dabili. Ka daa leei daadam m-mali daadam niŋgbuŋ biɛhigu.

⁸Ka daa siɣis’ omaŋ’ doli nɔdeebo soli ti paai kum, hal kum din nyɛ dapulli zuɣu kum gba.

⁹Dinzuɣu ka Naawuni daa duh’ o pam zaŋ o ʒili jilima ʒiishee, ka ti o yuli din tibisi gari yuli kam.

¹⁰Ka Naawuni ni ti Yisa jilima yu’ shɛli maa zuɣu la ni chɛ ka sokam bɛn be alizanda ni mini bɛn be dunia ŋɔ ni ni bɛn be tiŋgbani puuni ha[1] ni ti gbani o tooni.

¹¹ Ka sokam zaa ti yaag’ o noli yɛli ni Yisa Masia nyɛla Duuma, ka di chɛ ka o Ba Naawuni nya jilima.

¹²Dinzuɣu m mabiyurisi, n ni daa be yi sani ka yi deeri n noli shɛm la, hal n ni ka yi sani pumpɔŋɔ ŋɔ, di niŋ kamaata ni yi na kul deeri n noli lala. Kul tummiya ni dabiɛm zɔbu mini ni sɔhibu nti nya yi tiliginsim tuma naabu,

¹³dama Naawuni n-nyɛ ŋun kul tumdi lala yi ni ni o chɛ ka yi saɣ’ o yubu, ka tin ya yiko ka yi tooi tum o ni yu shɛm.

¹⁴Niŋmiya binshɛɣukam ka kparima ni ŋumbu bee naŋgbankpeeni ŋmɛbu kani,

¹⁵ ka di chɛ ka yi ku mali taali, ka naɣ’ ni bela kasi, ka nyɛ Naawuni bihi bɛn be tibi m-be ʒiɛmaan’ biɛɣunim’ mini ʒiɛman’ golimanim’ sunsuuni ŋɔ. Di simdi ni yi be bɛ sunsuuni dunia ŋɔ ni n-ne kaman saŋmarisi ni ne shɛm la,

¹⁶yi ni zaŋdi nyɛvili yɛligu tiri ba la puuni. Dina n-ni chɛ ka n-ti mali daliri din ni nyu bara Masia labbuna dabisili la dali, ka di wuhi ni n kpaŋmaŋtali mini n tuma bi kpalim yoli.

¹⁷Hal Naawuni yi chɛ ka n nyɛvili pahi yi yɛda niŋbu sara zuɣu n-leei sara maligu ŋun’ Naawuni sani, di ni niŋ ma suhupiɛlli, ka yi zaa gba pahi n zuɣu mali suhupiɛlli.

¹⁸Lala zuɣu ka di simdi ni yi gba mali suhupiɛlli, ka di chɛ ka n gba pahi yi zuɣu mali suhupiɛlli.

¹⁹M mali tahima ti Duuma Yisa sani ni di ku yuui ka n tim Timoti yi sanna, ka di chɛ ka m baŋ yi yɛla ni nyɛ shɛm, ka di kpaŋsi n suhu.

²⁰O kɔŋko n-nyɛ ŋun pahi n zuɣu ka ti tɛhiri yi yɛla, ka o baɣa shiri be yi yɛla ni.

²¹Bɛn kpalim la bɛn’ zaa yinoyino baɣa kul bela bɛmaŋmaŋ’ yɛla ni, ka pa ni Yisa Masia yɛla ni.

²²Ka yimaŋmaŋ’ gba mi Timoti ni pun kpaŋd’ omaŋ’ shɛm m min’ o ni laɣim kaman ba min’ o bia n-tumdi lahibal’ suŋ tuma la yɛla.

²³Dinzuɣu n yi baŋ din yɛn niŋ ma kpe ŋɔ ni nyɛ shɛli, n ni lo nia tim o yi sanna.

²⁴Ka m mali tahima ti Duuma sani ni di ku yuui ka mmaŋmaŋ’ gba tooi ka yi sanna.

²⁵N tɛhiya ni di simdi ni n chɛ ka ti mabia Ɛpafurɔditus ŋun nyɛ n tumtumdikpee mini n tɔbbikpee, ka lan nyɛ yi tumo ŋun sɔŋ ma la lab’ kuli yi sanna.

²⁶O suhu kul yɛla yi zaa nyabu zuɣu, ka o suhu bi doya, dama yi daa wum ni o biɛra.

²⁷Yɛlimaŋli, o daa shiri biɛra, hal ti yɛn kpimi gba; amaa ka Naawuni daa zo o nambɔɣu, ka di pala o kɔŋko ka o daa zo nambɔɣu maa, amaa zaŋ tabili man’ gba ni di chɛ ka n ku mali nandahima n-lan pahi.

²⁸Dinzuɣu n suhu kul yɛmi ni n chɛ ka o lab’ kuli yi sanna, ka yi ti nya o ka yi suhuri paligi yaha, ka man’ gba nandahima vuui.

²⁹Dinzuɣu deemiy’ o ni suhupiɛlli ti Duuma zuɣu. Timiya niriba lala tatabo jilima,

³⁰dama o zaŋ o nyɛvili pa talima Masia tuma zuɣu hal ti kpi. O daa niŋ lala ni o ti ma la sɔŋsim shɛli yi ni daa naan ku tooi ti ma.