Read Dagbani Filipainima 3 Bible Online

Filipainima 3 - Dagbani bible

Filipainima 3

¹M mabihi, din bahindi nyaaŋa nyɛla ŋ-ŋɔ: Maliya suhupiɛlli ti Duuma ni. Di pala yɛl’ tibisili n sani ni n lab’ sabi n ni daa pun sab’ yɛl’ shɛŋa tin ya la n-lan tin ya, dama di nyɛla din ni gbibi ya.

²Miriya ninvuɣ’ shɛb’ bɛn ŋmani bahi ka nyɛ tuumbiɛtumdiba la, ka miriya ninvuɣ’ shɛb’ bɛn kpaŋsiri niŋgbuŋ ŋmaabu yɛla la.

³Tinima n-nyɛ bɛn deei gunibu maŋli, dama ti jɛmdila Naawuni o Shia Kasi zuɣu ka mali suhupiɛlli ti bebu ni Yisa Masia zuɣu. Ti ka tahima ninsalinim’ ni niŋdi shɛli bɛ niŋgbuna ni yɛla ni.

⁴N yi di bɔra, n naan tooi mali tahima bina lala tatabo ni. Ka so yi tɛhi ni o ni tooi mali tahima ninsalinim’ ni niŋdi shɛli bɛ niŋgbuna ni yɛla ni, m mali daliri ni n niŋ lala gar’ o.

⁵ Bɛ daa guni ma la daba anii dali. Bɛ dɔɣi ma la Izraɛl nira. N yila Bɛnjamin zuliya ni na ka nyɛ Hiburu alali. Ka zaŋ chaŋ Yɛhudianim’ zaligunim’ mi dolibu polo n daa nyɛla Farisii;

⁶ ka di dolibu zuɣu chɛ ka n daa niŋ cheechi alaka. Ka ninsal’ ni ni doli Yɛhudianim’ zaligunim’ ka tooi mali wuntia biɛhigu shɛli di zuɣu la puuni, n daa ka taali.

⁷Amaa binshɛɣukam zaa n ni daa lihi ni di mali nyɔri la, n yipa lihi li ka di nyɛla yoli n sani Masia zuɣu.

⁸Yɛlimaŋli, di pala dimbɔŋɔnim’ kɔŋko, n shiri lihi binshɛɣukam zaa la yoli binshɛli din mali buchi pam la zuɣu; dina n-nyɛ n Duuma Yisa Masia baŋbu. O zuɣu ka n chɛ binshɛɣukam zaa bahi; n lihi di zaa ha la saɣiri ni di chɛ ka m mali Masia

⁹ka m min’ o laɣim nyɛ zaɣ’ yini. M bi lan mali mmaŋmaŋ’ wuntia, hal m bi lan mali wuntia din yi zaligunim’ dolibu ni na gba. Wunti’ shɛli n ni yipa mali pumpɔŋɔ ŋɔ nyɛla din yi Masia yɛda niŋbu ni na. Di nyɛla wuntia din yi Naawuni sanna yɛda niŋbu zuɣu.

¹⁰N ni bɔri shɛli zaa nyɛla ni m baŋ Masia, ka baŋ o kum ni neebu yiko yɛla, ka pah’ o zuɣu di wahala, ka be kaman ŋuna o kum puuni,

¹¹ka mali tahima ni mmaŋmaŋ’ gba ni ti neei kum ni.

¹²Di bi wuhiri ni m pun nya dimbɔŋɔnima bee ni n nyɛla ŋun be tibi, amaa n na kul kpaŋdila mmaŋ’ chani tooni ni n nya Masia ni gbaai ma kpɛhi nuu ni ni n nya shɛl’ la.

¹³M mabihi, m bi tɛhi ni m pun nya li, amaa n ni niŋdi bin’ yini shɛli nyɛla n tamdila binshɛɣukam din be n nyaaŋa yɛla, ka kul kpaŋdi mmaŋa ni m paala din be n tooni.

¹⁴Dinzuɣu ka n kul zɔri kpari booli polo ni di chɛ ka n nya Naawuni ni boli ti boligu shɛli din be Yisa Masia ni la.

¹⁵Di simdi ni tinim’ bɛn zaa bi niriba malila tɛhi’ yini ŋɔ tatabo, ka yi ni shɛb’ yi mali tɛhi’ kɔŋkɔba, Naawuni ni kahigi di yɛla wuhi ya.

¹⁶Din beni nyɛla, chɛliya ka ti kul chani tooni doli so’ shɛŋa ti ni pun doli hal ni pɔŋɔ la.

¹⁷ M mabihi, chɛliya ka yi biɛhigu kul be kaman m biɛhigu. Ti pun wuhi ya biɛrisuŋ soli, dinzuɣu kpahimmiya nya ninvuɣ’ shɛb’ bɛn dol’ li.

¹⁸M pun yɛli ya dimbɔŋɔ yɛla siɣimsiɣim paai shɛm, ka pumpɔŋɔ n ni lan labi yɛli ya di yɛla ni nintam. Niriba pam beni ka bɛ biɛhigu zaŋ ba leela Masia dapulli zuɣu kum la dimnima.

¹⁹Bɛ ni ti bahi yoli, dama bɛ ni zaŋ shɛli leei bɛ bin’ jɛmdili nyɛla be niŋgbuŋ kɔre; bɛ nyuri bara la di ni simdi ni vi mali ba shɛli zuɣu, ka bɛ baɣa kul bela dunia ŋɔ binyara ni kɔŋko.

²⁰Amaa tinim’ nyɛla alizanda tiŋbihi, ka ti suhuri kul yɛla tiligir’ so ŋun nyɛ ti Duuma Yisa Masia m-be alizanda ni la labbuna zuɣu.

²¹O ni ti taɣi ti niŋgbuna din poori ŋɔ n-chɛ ka di be kaman omaŋmaŋ’ niŋgbuŋ din bi poori la. O yiko din chɛ ka o tooi su binshɛɣukam zaa la puuni ka o yɛn niŋ dimbɔŋɔ.