Read Dagbani Filipainima 4 Bible Online

Filipainima 4 - Dagbani bible

Filipainima 4

¹Dinzuɣu m mabiyurisi bɛn nyɛ n suhu ni kul ye shɛb’ nyabu zuɣu la, yinima n-nyɛ bɛn chɛ ka m mali suhupiɛlli, ka nyuri bara yi zuɣu. M mabiyurisi, bamiya zani viɛnyɛliŋga ti Duuma ni!

²N kpamdi Yuɔdia mini Sintike jaande ni bɛ zaŋm’ bɛ noya naai taba ti Duuma zuɣu.

³Ka nyini ŋun nyɛ n tumtumdikpee ŋɔ, n suhir’ a ni a sɔŋmi paɣiba maa, dama m mini ba zaŋ tabili Klɛmɛnt ni n tumtumditaba bɛn yuya sabi nyɛvili litaafi ni la n-daa laɣim tumdi lahibal’ suŋ molo molibu tuma.

⁴Kul maliya suhupiɛlli ti Duuma zuɣu sahakam; n lan yɛri ya mi yaha, kul maliya suhupiɛlli!

⁵Maliya biɛrisuŋ zaŋ chaŋ sokam zaa sani. Ti Duuma labbuna miriya.

⁶Di chɛliya ka yi suhuri jiɣindi shɛli zuɣu, amaa yi suhigu zaa puuni, yɛlimiya Naawuni yi ni bɔri shɛli, ka kul balimmiya Naawuni ni wumpaɣibo din yiri yi suhuri ni na.

⁷Ka Naawuni suhudoo din yaɣi ninsal’ milinsi zuɣu la ni gbibi yi suhuri mini yi tɛha Yisa Masia ni.

⁸M mabihi, din bahindi nyaaŋa nyɛla ŋ-ŋɔ, chɛliya ka binshɛɣukam din viɛli ka simdi paɣibu n-kul be yi tɛha ni. Dina n-nyɛ: Binshɛŋa din nyɛ yɛlimaŋli mini binshɛŋa din tahiri sizuura lubu na ni binshɛŋa din tuhi ni binshɛŋa din be kasi ni binshɛŋa din mali jiri ni binshɛŋa din mali jilima!

⁹Doliya yi ni bɔhim shɛli mini yi ni deei shɛli n san’ la zaŋ tabili n yɛtɔɣa mini n tuma; ka Naawuni ŋun tiri ti suhudoo la ni be yi sani.

¹⁰M mali suhupiɛlli pam ti Duuma zuɣu, dama di ni yuui pam la nyaaŋa yi lan wuhi ni yi baɣa be n ni. M bi yɛlimi ni yi chɛ ma la lihibu, amaa yi yi bi nyala soli din ni doli niŋ li.

¹¹M bi yɛli dimbɔŋɔ ni di wuhi ni n kɔŋla shɛli, dama m bɔhim ni n chɛ ka n nini tiɣi n ni mali shɛli.

¹²M mi kɔŋsim biɛhigu, ka mi malibu gba biɛhigu. M pun bɔhim baŋ ashili ŋɔ: N ni be luɣ’ shɛlikam mini saha shɛlikam zaa puuni, n yi nya n-di bee n yi gbe kum, ka n yi mali pam bee n yi malila biɛla n nini tiɣiri li mi.

¹³N ni tooi niŋ shɛlikam zaa Masia ni tiri ma yaa la zuɣu.

¹⁴Amaa yi ni daa niŋ ma nirilim sɔŋ ma n wahala puuni la viɛli pam.

¹⁵ Yinim’ Filipainim’ mi ka biɛhiŋ kani ni lahibal’ suŋ molo molibu piligu ni saha, n ni daa yiɣisi Masidɔnia la, yi kɔŋko n-daa nyɛ cheechi shɛli niriba bɛn pahi n zuɣu baŋ deebu mini tibu yɛla.

¹⁶ Saha shɛli n ni daa ti be Tɛsalɔnaika la yi daa tim sɔŋsim na ti ti ma, ka daa lan niŋ lala di nyaaŋa zaŋ chana.

¹⁷Di bi wuhiri ni n yula pina deebu hali, amaa n lee bɔrimi ni yi nya laara pahi.

¹⁸ Yi ni ti ma shɛlikam la shɛhira gbaŋ m-bɔŋɔ, hal yi ni daa ti ma shɛli maa yaɣi n ni bɔri shɛm zuɣu gba. Ka Ɛpafurɔditus ni daa zaŋ yi pina la zaa na ti ti ma la zuɣu chɛ ka n yipa mali din simdi ma zaa pumpɔŋɔ. Yi pina maa ŋmanila tulaale zim sara maligu Naawuni sani, ka nyɛ o ni deeri shɛli ni din tiɣir’ o nini.

¹⁹N Duuma Naawuni ni tin ya din simdi ya zaa o bundaantali din be Yisa Masia ni la zaa puuni.

²⁰Ti Duuma Naawuni ŋun nyɛ ti Ba ŋɔ simdi paɣibu pumpɔŋɔ hal ni saha din ka bahigu! Ami!

²¹Puhimiya Naawuni ninvuɣ’ gahinda bɛn be Yisa Masia ni la zaa ti ma. Ti mabihi bɛn be n san’ la puhiri ya.

²²Yisa nyaandoliba zaa bɛn be kpe ŋɔ puhiri ya, di bahi bamdi bɛn be Naa Siiza yiŋ’ la.

²³Ti Duuma Yisa Masia daalibarika kpalimmi be yi ni!