Read Dagbani Kolɔsinima 2 Bible Online

Kolɔsinima 2 - Dagbani bible

Kolɔsinima 2

¹M bɔri ni n yɛli ya n ni mɔri mɔ’ shɛli yi mini Laodisianim’ ni ninvuɣ’ shɛb’ bɛn bi mi ma ni nini la zuɣu yɛla.

²N niŋdi lala ni di chɛ ka bɛ malila suhukpeeni ka laɣim zaŋ bɛmaŋ’ tabili taba yurilim puuni, ka lan mali yɛlimaŋli baŋsim din tahiri tahima zaa din ŋmani azichi na. Ka lala zuɣu chɛ ka bɛ baŋ Naawuni ashili din nyɛ Masia maŋmaŋ’ la.

³Ŋuna n-nyɛ yɛm mini baŋsim azichi zaa ni sɔɣi so ni.

⁴N yɛli ya dimbɔŋɔ mi ni yi di chɛ ka so zaŋ naŋgban’ malisim yɛtɔɣa yɔhim ya.

⁵Dama hal mmaŋmaŋ’ ni kul ka yi sani maa zaa yoli, n suhu din’ be yi sani, ka m mali suhupiɛlli yi biɛrisuŋ mini yi ʒiɛyimtali zaŋ chaŋ yi ni niŋ Masia yɛda shɛm la polo.

⁶Yi ni deei Yisa Masia n-leei yi Duuma la zuɣu, chɛliya ka yi min’ o laɣim be.

⁷Chɛliya ka yi nyaɣa kpe o ni m-ba n-zani kaman tia la. Ka me yimaŋ’ tam o zuɣu, ka ʒe viɛnyɛliŋga yi yɛda niŋbu puuni kaman bɛ ni daa pun wuhi ya shɛm la. Ka chɛliya ka wumpaɣibo pali yi suhuri hal nti puuri bahira.

⁸Di chɛliya ka so zaŋ ninsalinim’ yɛm mini yɛtɔɣ’ yoya din yi ninsalinim’ kaya yɛla ni na, ka pa Masia din’ la yɔhim ya n-zaŋ ya leei alizinnim’ bɛn su dunia ŋɔ yɛliniŋda fukumsi la daba.

⁹Dama Naawunitali biɛhigu zaa be Masia daadamtali niŋgbuŋ ni,

¹⁰ka yi gba deei nyɛvili maŋli o sani, yi mini Masia ni laɣim nyɛ zaɣ’ yin’ la zuɣu. Ŋuna n-nyɛ ŋun gari alizinnim’ bɛn nyɛ zuɣulaannim’ mini bɛn su fukumsi zaa.

¹¹Yi mini Masia ni laɣim nyɛ zaɣ’ yin’ la zuɣu ka yi daa guni gunibu shɛli din pa ninsal’ ni niŋ shɛli, amaa ka nyɛla Masia maŋmaŋ’ ni niŋ shɛli ka di nyɛ o ni yihi ya niŋgbuŋ din tumd’ alahichi ŋɔ alahichi maa yiko dabitim puuni la zuɣu.

¹² Bɛ ni daa baptaizi ya saha shɛl’ la, yi mini Masia ka bɛ daa laɣim sɔɣi maa, ka yi mini Masia laɣim n-neei kum ni yi ni daa niŋ Naawuni ŋun daa neei Masia kum ni yiko tuma yɛda la zuɣu.

¹³ Saha shɛli din gari la ha puuni, yi daa nyɛla kpiimba yi daalahichi tumbu mini yi ni pa bɛn doli gunibu kali sol’ la zuɣu. Amaa ka Naawuni neei yi mini Masia kum ni pumpɔŋɔ, ka chɛ ti daalahichi zaa paŋ ti.

¹⁴ Ka daa lan kpihim zaligu shɛli din mini di soya daa galindi ti ka kul nyari ti taali la n-daa zaŋ li kpahi tabili dapulli zuɣu n-yihi li zaa bahi.

¹⁵Ŋun’ Naawuni daa fa alizinnim’ bɛn nyɛ zuɣulaannim’ mini bɛn su fukumsi bidibbina, ka zaŋ ba wuhi palɔni o dari dibu chandi puuni ni o nyaŋ ba Masia dapulli la zuɣu.

¹⁶ Dinzuɣu miriya ka yi chɛ ka so zali ya zaligunima zaŋ chaŋ yi ni ni di shɛli bee n-nyu shɛli polo bee zaŋ chaŋ dabisi’ kasi shɛŋa mini gol’ palli chuɣu puhibu ni Vuhim Dabisili kaya dolibu polo.

¹⁷Dimbɔŋɔnim’ zaa nyɛla din ti yɛn kana la shilinshia, amaa din nyɛ yɛlimaŋli m-be Masia ni la yipa paana.

¹⁸Miriya ka yi chɛ ka ninvuɣ’ so labisi ya nyaaŋa o ni nyari ʒii shɛŋa zuɣu bee o ni kpaŋsiri ʒiri maŋsiɣisibu soli dolibu mini malaikanim’ jɛmbu yɛla zuɣu. Lala nir’ nyɛla ŋun duhir’ omaŋa o ninsalitali tɛha puuni ka di ka daliri,

¹⁹ ka bi lan tuɣi Masia ŋun nyɛ zuɣu la. Masia kɔbili ni ka niŋgbuŋ mi zaa nyari dihili ka kpɛri n-saɣisiri tab’ ni di tuɣa mini di jila ni, ka zoori kaman Naawuni ni bɔri ni di zoori shɛm.

²⁰Yi mini Masia ni laɣim kpi ka yi yi alizinnim’ bɛn nyɛ dunia ŋɔ yɛliniŋda dabitim ni la, di chaŋ wula ka yi lan be kaman dunia ŋɔ ni su ninvuɣ’ shɛba? Bɔzuɣu ka yi doli zaligunim’ din yɛli:

²¹“Miriya ka yi kpuɣi dimbɔŋɔ gbibi!” “Miriya ka yi di dimbɔŋɔ!” “Miriya ka yi shihi dimbɔŋɔ!”

²²Dimbɔŋɔnim’ zaa yila ninsalinim’ kaya mini bɛ wuhibu ni na, ka nir’ yi dol’ li di ni ti kpalim yoli.

²³Yɛlimaŋli, dimbɔŋɔnim’ ŋmanila yɛm tuma din kpaŋsiri jɛmbu muɣisigu puuni mini ʒiri maŋsiɣisibutali ni niŋgbuŋ nahimbu, amaa di zaa yoli, di bi kuri buchi zaŋ chaŋ maŋgbaabu niŋgbuŋ kɔre tuma tumbu puuni.