Read Dagbani Kolɔsinima 3 Bible Online

Kolɔsinima 3 - Dagbani bible

Kolɔsinima 3

¹ Dinzuɣu yi mini Masia ni laɣim neei kum ni la zuɣu, bomiyala binshɛŋa din be alizanda ni Masia ni ʒi Naawuni nudirigu polo luɣ’ shɛl’ la.

²Chɛliya ka yi suhuri kul yɛla binshɛŋa din be nimaani zuɣu, ka pa ni binshɛŋa din be dunia ŋɔ ni zuɣu.

³Dama yi kpimi ka yi nyɛviya pahi Masia zuɣu n-sɔɣi Naawuni ni.

⁴Masia ŋun nyɛ ti nyɛvili la yi ti yi palo, yi gba ni yi palo m-pah’ o zuɣu nya jilima.

⁵Dinzuɣu di niŋ kamaata ni yi ku dunia ŋɔ ni kɔr’ biɛri din be yi ni la. Dina n-nyɛ: Zina niŋbu mini daɣiri tuma ni niŋgbuŋ kɔre ni tɛhi’ biɛri ni binyara ni kɔre kpɛbu la. Binyara ni kɔre kpɛbu ŋmanila buɣijɛmbo.

⁶Dimbɔŋɔnim’ zuɣu ka Naawuni suhuyiɣisili kul paari ninvuɣ’ shɛb’ bɛn bi deeri ŋun’ Naawuni noli.

⁷Ka yi gba daa tumdila lala yi ni daa siɣi ʒe di puuni saha shɛl’ la.

⁸Amaa pumpɔŋɔ yihimiya dimbɔŋɔnim’ zaa yi tɛr’ ni bahi. Dina n-nyɛ: Sujee mini suhuyiɣisili ni biɛr’ biɛɣu. Ka di chɛliya ka turi mini yɛtɔɣ’ yoya yiri yi noya ni na.

⁹ Yi mi di ŋmariya tab’ ʒiri, dama yi pun yihi biɛr’ kurili la mini di miligu yɛla bahi,

¹⁰ ka yipa zaŋla biɛr’ palli kpɛhi yi ni, Dina n-nyɛ: Biɛr’ pal’ shɛli Naawuni ŋun nyɛ di namda la ni zaŋd’ omaŋmaŋ’ ŋmahinli n-kul lɛbigiri li zaɣ’ palli ni di chɛ ka yi baŋ ŋun’ Naawuni la.

¹¹Dimbɔŋɔ puuni di ku tooi nani ni Yɛhudianim’ be bɛ ko ka chɛ bɛn pa Yɛhudianima bee ka bɛn doli gunibu kali soli be bɛ ko ka chɛ bɛn bi doli gunibu kali soli bee ka ninvuɣ’ yoya mini ninvuɣ’ yarisi ni daba mi be bɛ ko ka chɛ bilichinnima, amaa Masia n-nyɛ ŋun gari bɛ zaa ka be bɛ zaa ni.

¹² Yi nyɛla Naawuni ninvuɣ’ gahindi’ shɛb’ o ni yu ka pii leeg’ omaŋmaŋ’ niriba. Dinzuɣu di niŋ kamaata ni yi zaŋ nambɔzɔbo mini nirilim niŋbu ni maŋsiɣisibutali ni tarimtali ni suɣilɔdibo kpɛhi yi tɛr’ ni,

¹³ ka sɔŋmiya taba. Yi ni so yi mali yɛli shɛli ni o kpee, yin’ chɛliya tab’ taali paŋ taba; di niŋ kamaata ni yi chɛri yi tab’ taali paŋdi ba kaman ti Duuma ni daa chɛ m-paŋ yi gba shɛm la.

¹⁴Ka din gari shɛlikam zaa nyɛla, zaŋmiya yurilim din lɔri binshɛɣukam laɣindi taba ka di leeri zaɣ’ yin’ la pahi dimbɔŋɔnim’ zaa zuɣu.

¹⁵Chɛliya ka Masia ni zaŋ suhudo’ shɛli tin ya la su yi suhuri, dama suhudoo maa zuɣu ka Naawuni daa boli ya n-laɣim ya niŋgbun yin’ la ni. Ka paɣimiya Naawuni.

¹⁶ Chɛliya ka Masia yɛligu ba jila yi suhuri ni pam. Wuhimiya taba ka kpammiya tab’ jaande yɛm zaa puuni, ka zaŋmiya adiini yila mini Naawuni paɣibu yila ni Yila litaafi ni yila n-yiini paɣiri Naawuni yi suhuri ni.

¹⁷Dinzuɣu yi ni niŋdi shɛlikam zaa puuni, di yi nyɛ yɛtɔɣa ni bee tuma ni, yin’ niŋmiya di zaa ti Duuma Yisa yuli ni, ka paɣimiya ti Ba Naawuni o zuɣu.

¹⁸ Yidaampaɣiba, zaŋmiya yimaŋ’ ti yi yidaannima kaman di ni simdi shɛm ti Duuma sani.

¹⁹ Yidaannima, yumiya yi paɣiba, ka di yihiriya ba hal’ biɛɣu.

²⁰ Bihi, deemiya yi banim’ mini yi manim’ noya binshɛɣukam zaa ni, dama dina n-tiɣiri ti Duuma nini.

²¹ Ka yinim’ bihi banim’ mi di yihiriya yi bihi hal’ biɛɣu hal ka bɛ ti yihi tahima.

²² Daba, deemiya yi dunia ŋɔ ni duumanim’ noya binshɛɣukam zaa puuni, ka di niŋdiya shɛli bɛ nini yi beni zuɣu ni bɛ nini tiɣi ya, amaa niŋmiya lala ni suhu yini Naawuni zɔbu zuɣu.

²³Ka yi ni tumdi binshɛɣukam zaa tiri ba puuni, tummiya li ni yi suhuri zaa kaman ti Duuma ka yi tumdi li tiri la, ka pa ni ninsalinim’ ka yi tumdi li tira.

²⁴Ka minya ni yi ni ti deei di laara ti Duuma sani, dama yi Duuma ŋun nyɛ Masia la zuɣu ka yi tumdi lala maa.

²⁵ Ŋun tumdi din bi tuhi ni ti deela o ni tum din bi tuhi shɛli maa laara; dama Naawuni bi yaai so yuri ka chɛ so.