Read Dagbani 1 Tɛsalɔnikanima 3 Bible Online

1 Tɛsalɔnikanima 3 - Dagbani bible

1 Tɛsalɔnikanima 3

¹ Dinzuɣu ti ni daa nya ka ti ku tooi lan guhi pahi zuɣu ka ti daa saɣi ni ti kɔŋko kpalim be Atɛnsi,

²ka tim ti mabia Timoti yi sanna. O nyɛla Naawuni tumtumdi’ so ti min’ o ni laɣindi tumdi Masia lahibal’ suŋ waazu yihibu tuma la. Ti daa tim o mi na ni o ti kpaŋsi ya yi yɛda niŋbu puuni, ka kpam ya jaande,

³ka di chɛ ka yi ni so ku labi nyaaŋa alakanim’ ŋɔ nyabu zuɣu. Yimaŋmaŋ’ mi ni di nyɛla Naawuni yubu ni ti nya alakanim’ ŋɔ tatabo.

⁴Ti ni daa na be yi san’ la, ti daa pun yɛli ya ni ti ni nya alaka, ka yi zaa mi ni lala n-shiri niŋ.

⁵Dinzuɣu n ni daa nya ka n ku tooi lan guhi pahi zuɣu ka n daa tim Timoti yi sanna ni di chɛ ka m baŋ yi yɛda niŋbu yɛla ni nyɛ shɛm. Dama n suhu daa kul zɔhirimi ni di pa shɛli ka Sintani ti zahim ya ka ti tuma la zaa kpalim yoli.

⁶ Ka Timoti ni daa yi yi sani labina, o daa yɛli ti yi yɛda niŋbu mini yi yurilim yɛla ni nyɛ shɛm. O yɛli ti ni yi kul tɛhirila ti yɛla ka bɔri ni yi nya ti kaman ti gba suhuri ni ye yi nyabu zuɣu shɛm.

⁷Dinzuɣu ti mabihi, ti nahiŋgu mini ti wahala dibu puuni, ti nya suhukpaŋsibo yi zuɣu. Yi yɛda niŋbu nyɛla din kpaŋsiri ti,

⁸dama yi yi ba n-zani yi biɛhigu ni ti Duuma zuɣu, di ni chɛ ka ti leei bɛn be.

⁹Ti ni tooi paɣi Naawuni yi zuɣu pumpɔŋɔ. Ti paɣir’ o ti ni mali suhupiɛl’ shɛli yi zuɣu ŋun’ ti Duuma Naawuni san’ la zuɣu

¹⁰Wuntaŋ’ ni mini yuŋ zaa, ti kul suhir’ o ni o chɛ ka ti mini ya lan nya taba, ka ti tooi zaŋ din pooi ya yi yɛda niŋbu ni la sɔŋ ya.

¹¹Ti suhiri Naawuni ŋun nyɛ ti Ba la maŋmaŋ’ mini ti Duuma Yisa ni bɛ mali soli ti ti ka ti kana ti kaai ya.

¹²Ti lan suhiri ti Duuma ni o chɛ ka yi yurilim zaŋ chaŋ yi tab’ mini sokam zaa sani zooi pahi kaman ti gba yurilim ni galisi zaŋ chaŋ yi sani shɛm la.

¹³Dimbɔŋɔ puuni o ni chɛ ka yi suhuri ba n-zani ka yi be tibi, ka be kasi ti Naawuni ŋun nyɛ ti Ba la sani, saha shɛli ti Duuma Yisa min’ o ninvuɣ’ gahinda yi ti labina.