Read Dagbani 1 Tɛsalɔnikanima 4 Bible Online

1 Tɛsalɔnikanima 4 - Dagbani bible

1 Tɛsalɔnikanima 4

¹Ti mabihi, din pahi nyɛla yi pun bɔhim ti sani di ni simdi ni yi be shɛm n-tiɣi Naawuni nini yɛla. Hal lala ka yi kul be, ka ti suhiri ya ka kpamdi ya jaande ti Duuma Yisa yuli zuɣu ni yi kul niŋmi lala pahima.

²Dama yi mi wuhibu shɛŋa ti ni daa zaŋ wuhi ya ti Duuma Yisa ni zali ti shɛm puuni la yɛla.

³Naawuni yubu zaŋ chaŋ yi sani nyɛla ni yi mali m-be kasi, ka di niŋdiya zina.

⁴Yi zaa yinoyino mi yi ni yɛn doli kasitali biɛhigu mini jilima soli shɛm n-kpuɣ’ omaŋmaŋ’ paɣa,

⁵ka di pa ni yi doli niŋgbuŋ kɔre soli kaman bɛn bi doli Naawuni zaligu ni niŋdi shɛm la,.

⁶Dinzuɣu yɛlli ŋɔ puuni, so miri ka o tum o kpee din bi tuhi bee ŋ-ŋar’ o kpee. Ti daa pun yɛli ya dimbɔŋɔ yɛla, ka na kul kpahiri yi zuɣu ni ni ti Duuma ni darigi bɛn tumdi din bi tuhi ŋɔ tatabo tibili.

⁷Ti Duuma Naawuni daa bi boli ti ni ti ti tumdila niŋgbuŋ kɔre tuma, amaa o daa boli ti ni ti ti dolila kasitali biɛhigu soli.

⁸Dinzuɣu ŋunkam zaɣisi wuhibu ŋɔ, pa ninsal’ wuhibu ka o zaɣisi, amaa Naawuni ŋun ti ti o Shia Kasi la wuhibu ka o zaɣisi maa.

⁹Di bi kpa talahi ni n sabi n-wuhi ya yi ni yɛn yuri yi mabihi shɛm, dama Naawuni pun wuhi ya yimaŋmaŋ’ ni yɛn yuri tab’ shɛm.

¹⁰Ka lala ka yi shiri yuri yi mabihi zaa bɛn be Masidɔnia tiŋgbɔŋ ni zaa; amaa ti mabihi, ti kpamdi ya jaande ni yi kul niŋmi lala pahima.

¹¹Kpaŋmiya yimaŋa m-be baalim, ka chɛ ka yi zaɣa be yimaŋmaŋ’ yɛla ni, ka bɔnya yimaŋmaŋ’ nuu zuɣu tuma tummi kaman ti ni daa pun wuhi ya shɛm la.

¹²Dimbɔŋɔ niŋbu zuɣu ni chɛ ka bɛn be kpaŋa lun ya sizuura, ka yi mi ku lihiri so ninni ni o dihi ya.

¹³Ti mabihi, ti bi bɔri ni yi be ʒilinsi ni zaŋ chaŋ bɛn gbihiri kum ni la polo, ka di chɛ ka yi ku fabindi bɛn kpi la zuɣu kaman bɛn ka tahima ni niŋdi shɛm la.

¹⁴Dama ti yi niŋ yɛda ni Yisa daa kpiya ka lan neei yaha, ti lan niŋ yɛda ni ti Duuma Naawuni ni ti chɛ ka bɛn gbihiri kum ni la ti doli ti Duuma Yisa labina.

¹⁵Ti Duuma yɛligu ni wuhi shɛm ka ti mali yɛri ya maa. Dina n-nyɛ ni ti ni ninvuɣ’ shɛb’ bɛn yɛn mali nyɛviya hal ti paai ti Duuma labbuna saha ti ku daŋ bɛn pun gbihiri kum ni la tooni.

¹⁶Dama ti Duuma maŋmaŋ’ ni ti yi zuɣusaa n-siɣina ni tahigu mini malaikanim’ zuɣulan’ kukoli ni Naawuni kikaa kumsi. Ka bɛn pun kpi Masia ni la ni ti daŋ kum ni neebu;

¹⁷ ka tinim’ bɛn mali nyɛviya be dunia ŋɔ ni ŋɔ mini ba ti laɣim chaŋ ti kpe sagban’ ni n-tuhi ti Duuma soli sagbani maa ni; ka ti ni ti kpalim be ti Duuma maa sani hal ni saha din ka bahigu.

¹⁸Dinzuɣu zaŋmiya yɛtɔɣa ŋɔ maami tab’ suhuri.