Read Dagbani 1 Tɛsalɔnikanima 5 Bible Online

1 Tɛsalɔnikanima 5 - Dagbani bible

1 Tɛsalɔnikanima 5

¹Ti mabihi, di bi kpa talahi ni ti lan sab’ dabisa mini saha yɛla zaŋ chaŋ dimbɔŋɔnim’ ni ti yɛn niŋ saha shɛli polo;

² dama yimaŋmaŋ’ mi viɛnyɛliŋga ni ti Duuma labbuna dabisili la ni ti kana kaman tayiɣa ni kanna yuŋ shɛm la.

³Saha shɛli niriba yi ti yɛri ni suhudoo mini gom beni, di saha maa ka bahi yoli dii yɛn paai ba, ka bɛ ku tiligi. Di ni ti bemi kaman paɣ’ ni yi wolisiri ni o dɔɣi ka biɛrim shɛli mal’ o la.

⁴Amaa ti mabihi, yinim’ bi be zibisim ni ka dindali maa ni ti libigi ya kaman tayiɣa ni libigiri niriba shɛm la.

⁵Yi nyɛla neesim mini wuntaŋ’ ni niriba. Ti pala yuŋ bee zibisim ni niriba.

⁶Dinzuɣu di bi simdi ni ti gbihiri kaman shɛb’ ni niŋdi shɛm la, amaa chɛliya ka ti ne n-ʒiya ka gbibi ti maŋa.

⁷Dama gɔgbihiriba gbihirila yuŋ, ka danyuriba gba nyuri kuuni yuŋ.

⁸ Amaa tinim’ ni nyɛ wuntaŋ’ ni niriba la zuɣu, chɛliya ka ti gbibi ti maŋa ka zaŋ yɛda mini yurilim leei nyɔtaɣirigu m-pa ti nyɔri zuɣu, ka zaŋ ti tiliginsim tahima kaman tɔbutuhiri’ zuɣupila la pili.

⁹Naawuni bi zali ti ni o suhuyiɣisili tibidarigibo ti di ti, amaa o zali ti ni ti nyala tiliginsim ti Duuma Yisa Masia zuɣu.

¹⁰Ŋuna n-daa kpi ti zuɣu ni di chɛ ka ti min’ o laɣim be, di yi nyɛ ti bela ti nyɛviya ni bee ti yi gbihirila kum puuni.

¹¹Daliri ŋɔ zuɣu kpaŋsimiya tab’ suhuri, ka niŋdi din ni sɔŋ yi taba ka bɛ zooi Naawuni dolibu ni kaman yi ni niŋdi shɛm pumpɔŋɔ la.

¹²Ti mabihi, ti Duuma ni pii ninvuɣ’ shɛba ka bɛ be yi sani tumd’ o tuma la, ti suhiri ya ni yi lum’ ba sizuura. Bɛna n-nyɛ bɛn wuhiri ya ka kpamdi ya jaande la.

¹³Timiya ba jilima, ka yuri ba pam bɛ ni tumdi tuun’ shɛli maa zuɣu; ka maliya suhudoo ni taba.

¹⁴Ti mabihi, ti kpamdi ya jaande: Kpahimiya gbinyaɣinim’ zuɣu ni; ka kpaŋsimiya bɛn suhuri miligi la suhuri; ka sɔŋmiya bɛn gbarigi la; ka maliya suɣilo ni sokam.

¹⁵Yi ni so di bɔh’ o kpee biɛri, amaa niŋmiya ania n-kul niŋmi yi taba zaŋ tabili sokam zaa din viɛla.

¹⁶Kul maliya suhupiɛlli;

¹⁷suhimiya Naawuni sahakam,

¹⁸ka paɣimiya Naawuni shɛlikam zaa puuni. Dina n-nyɛ Naawuni ni yu shɛli yi biɛhigu ni Yisa Masia zuɣu.

¹⁹Miriya ka yi taɣi Naawuni Shia Kasi zali;

²⁰ka di ʒiɛmya anabitali yɛtɔɣa tɔɣisibu.

²¹Amaa buɣisimiya binshɛɣukam nya, ka gbibiya din viɛla.

²²Zomiya dinkam nyɛ zaɣ’ biɛɣu.

²³Ti Duuma Naawuni ŋun tiri ti suhudoo la malimi yi luɣili pinaayi zaa ka di be kasi, ka gbibi yi niŋgbuna zaŋ tabili yi suhuri ni yi shihi zaa ka di mali yaa ka ti ku mali taali hal baabiɛla ti Duuma Yisa Masia labbuna dali.

²⁴Ŋun boli ya maa nyɛla ŋun ni niŋ li, dama o nyɛla ŋun ʒe yim.

²⁵Ti mabihi, suhimiya Naawuni tiri ti gba.

²⁶Puhimiya ti mabihi la zaa mabihili puhigu ti ti.

²⁷N kpamdi ya jaande ti Duuma zuɣu ni yi karimmi gbaŋ ŋɔ wuhi ti mabihi la zaa.

²⁸Ti Duuma Yisa Masia daalibarika kpalimmi be yi ni!