Read Dagbani Jɔshua 13 Bible Online

Jɔshua 13 - Dagbani bible

Jɔshua 13

¹Jɔshua ni daa ti kurigi saha shɛli, ka Yawɛ yɛl’ o, “A kurigiya pam pumpɔŋɔ, amaa ka tiŋgban’ shɛli yi ni na yɛn deei mi na galisi pam.

²Tiŋgbɔn shɛli din na kpalim ka yi yɛn deei maa n-nyɛ: Filistianim’ tiŋgbani zaa mini Gɛshurinim’ tiŋgbani.

³(Zaŋ tabili tiŋgban’ shɛli din daa do Shihɔr kulibɔŋ shee zaŋ kpa Ijipti wulimpuhili polo ni zaŋ lab’ nuzaa polo zaŋ hal ti paai Ɛkurɔn tintariga din daa nyɛ Keenannim’ ni su luɣ’ shɛl’ la. Filistianim’ nanima anu daa beni. Yino daa bela Gaza, ka yino be Ashidɔd, ka yino be Ashikɛlɔn, ka yino be Gaat ka yino mi be Ɛkurɔn), m-pahi tin’ shɛŋa din daa be Avim zaŋ lab’ nudirigu polo

⁴ka nyɛ Keenannim’ ni daa su tiŋgban’ shɛl’ la zaa mini Miara din nyɛ Sidɔnnim’ ni daa su luɣ’ shɛl’ la zaŋ ti paai Afɛk ni zaŋ hal ti paai Amɔrinim’ tintariga la

⁵mini Gɛbalnim’ tiŋgban’ la ni Lɛbanɔn tiŋgban’ la zaa zaŋ kpa wulimpuhili polo ni Baaligad din be Hɛrimɔn zolɔŋni la ni zaŋ ti paai Lɛbohamat kpɛbu shee la

⁶ ni bɛnkam zaa daa be zoya zuɣu tinsi ni Lɛbanɔn hal ti paai Misirɛfɔtimaim hal ni Sidɔnnim’ zaa. Man’ maŋmaŋa n-yɛn be Izraɛlnim’ tooni n-kari ba bahi, nyin’ dini nyɛla a piri tiŋgbɔŋ maa ti Izraɛlnim’ ka bɛ su li kaman n ni pun yɛl’ a shɛm la.

⁷Dinzuɣu pirigim’ tiŋgbɔŋ maa ti zuliya awɛi la mini Manaasa zuliya pirigili la, ka di leei bɛ dini.”

⁸ Rubin zuliya mini Gaad zuliya ni Manaasa zuliya pirigili bɛn’ la bɛn daa pun deei bɛ tarili. Yawɛ dabili Musa n-daa pun pirigi tiŋgbɔn shɛli din be Jɔɔdɛn Mɔɣili duli wulimpuhili polo la ti ba.

⁹Bɛ tiŋgbani maa piligu shee n-daa nyɛ Aroa din daa ʒi Arinɔn Mɔɣili Vinvamli dul’ la mini tin’ kar’ shɛli din daa ʒi vinvamli maa sunsuuni la ni Mɛdɛba tintan’ zaŋ hal ti paai Dibɔn

¹⁰ni Amɔrinim’ naa Sihɔn ŋun daa diri ʒi Hɛshibɔn la tin’ kara zaa zaŋ hal ti paai Ammɔnim’ tintariga

¹¹ni Giliad ni Gɛshurinim’ mini Maakatinim’ tiŋgban’ la ni Hɛrimɔn Zoli gbini zaa ni Bashan zaa zaŋ ti paai Salɛka.

¹²M-pahi Ogi (ŋun daa nyɛ ŋun kɔŋko kpalim Rɛfaimnim’ ni) ka diri Ashitarɔt mini Ɛdirɛi nam ni daa su luɣ’ shɛli zaa Bashan la. Bɛna ka Musa daa tuhi nyaŋ ka kari ba bahi la.

¹³Amaa Izraɛlnim’ daa bi kari Gɛshurinim’ mini Maakatinima, lala zuɣu Gɛshurinim’ mini Maakatinim’ maa na kul be Izraɛlnim’ ni hal ni zuŋɔ.

¹⁴ Musa daa bi pirigi tiŋgbani maa shɛli ti Lɛvinim’ bɛna ni bɛ su li. Pina sara shɛŋa bɛ ni daa yi mali nyɔri buɣim tiri Yawɛ ŋun nyɛ Izraɛlnim’ Naawuni la n-daa nyɛ bɛ tarili kaman o ni daa pun yɛl’ o shɛm.

¹⁵Musa daa pirigi tiŋgbani shɛli ti Rubin zuliya ni bɛ su li.

¹⁶Bɛ tiŋgbani maa piligu shee n-daa nyɛ: Aroa din daa ʒi Arinɔn Mɔɣili Vinvamli dul’ la mini tin’ kar’ shɛli din daa ʒi vinvamli maa sunsuuni la ni tintani din zaa daa baɣi Mɛdɛba la.

¹⁷M-pahi Hɛshibɔn mini di tin’ kara din daa be tintan’ ni la zaa ni Dibɔn ni Bamɔtibaal ni Bɛtibaalimiɔn

¹⁸ni Jahaz ni Kɛdɛmɔt ni Mɛfaat

¹⁹ni Kiriataim ni Sibima ni Zɛrɛtishaha din daa be vinvamli ni zol’ zuɣu la

²⁰ni Bɛtipɛɔr ni Pisiga zolɔŋni ni Bɛtijɛshimɔt

²¹m-pahi tin’ kar’ shɛŋa din zaa daa be tintan’ ni la mini Amɔrinim’ Naa Sihɔn ŋun daa diri ʒi Hɛshibɔn la ni daa su luɣ’ shɛlikam zaa la. Musa n-daa tuhi nyaŋ o mini Midian nanima. Midian nanim’ maa yuya m-bɔŋɔ: Ɛvi mini Rɛkɛm ni Zur ni Hur ni Rɛba bɛn daa nyɛ Sihɔn nabihi bɛn be tiŋgbɔŋ maa ni la.

²²M-pahi Bɛɔr bia Balaam ŋun daa nyɛ baɣa, ka Izraɛlnim’ daa zaŋ takɔb’ ku o pahi bɛ ni daa pun ku shɛb’ zuɣu la.

²³Jɔɔdɛn Mɔɣili noli n-daa nyɛ Rubin zuliya maa tiŋgbani tariga. Fɔntiŋ’ kara mini tiŋkpansi ŋɔ ka Musa daa zaŋ ti Rubin zuliya maa ni bɛ su li.

²⁴Musa daa lan zaŋ tiŋgbani maa shɛli ti Gaad zuliya kaman bɛ daŋ niriba ni nyɛ shɛm ni bɛ su li.

²⁵Bɛ tiŋgbani tariga daa nyɛla Jaza zaŋ tabili Giliad tin’ kara zaa ni Amɔrinim’ tiŋgbani pirigili zaŋ hal ti paai Aroa din be Raba wulimpuhili polo la

²⁶ni Hɛshibɔn zaŋ hal ti paai Ramatimizipa mini Bɛtɔnim’ ni zaŋ hal ti paai Mahanaim zaŋ chaŋ Dɛbir tintariga

²⁷ni Bɛtiharam vinvamli ni Bɛtinimira ni Sukɔt ni Zafɔn ni Hɛshibɔn Naa Sihɔn ni daa su luɣ’ shɛlikam zaa, ka Jɔɔdɛn Mɔɣili noli daa nyɛ di tiŋgbani tariga zaŋ chaŋ ti paai Kinɛrɛt Teeku tariga ha sirigili zaŋ lab’ Jɔɔdɛn Mɔɣili duli wulimpuhili polo la.

²⁸Fɔntiŋ’ kara mini tiŋkpansi ŋɔ ka Musa daa zaŋ ti Gaad zuliya kaman bɛ daŋ niriba ni nyɛ shɛm ni bɛ su li.

²⁹Ka Musa daa lan zaŋ tiŋgbani maa shɛli ti Manaasa zuliya pirigili la kaman bɛ daŋ niriba ni nyɛ shɛm ni bɛ su li.

³⁰Bɛ tiŋgbani palo daa zaŋla Mahanaim hal ti paai Bashan tiŋgbani zaa din daa nyɛ Bashan Naa Ogi ni daa su luɣ’ shɛlikam zaa la ni Jair fɔntinsi zaa din be Bashan ka di kalinli nyɛ pihiyɔbu

³¹m-pahi Giliad pirigili ni Ashitarɔt ni Ɛdirɛi din daa nyɛ fɔntiŋ’ kar’ shɛŋa Bashan Naa Ogi ni daa su la. Musa daa zaŋ dimbɔŋɔnim’ tila Manaasa bia Makiri ni di nyɛ Makiri maa zuliya pirigili dini kaman bɛ daŋ niriba ni nyɛ shɛm.

³²Musa ni daa piri tiŋgbani maa tari Mɔab bɔpiɛligu la ni Jɔɔdɛn Mɔɣili duli mini Jɛriko wulimpuhili polo la shɛm m-bala.

³³ Amaa Musa daa bi pirigi tiŋgbani maa shɛli ti Lɛvinim’ bɛna; Yawɛ ŋun nyɛ Izraɛlnim’ Naawuni ŋɔ n-daa nyɛ bɛn’ tarili kaman o ni daa pun yɛli ba shɛm.