Read Dagbani Jɔshua 14 Bible Online

Jɔshua 14 - Dagbani bible

Jɔshua 14

¹Bɛ ni daa pirigi Jɔɔdɛn Mɔɣili duli wulinluhili polo Keenan tiŋgbɔŋ tiŋgbana ti Izraɛlnim’ shɛm m-bɔŋɔ. Ɛliɛza ŋun daa nyɛ maligumaana la mini Nan bia Jɔshua ni Izraɛl zuliyanim’ kpamba n-daa pirigi tiŋgbɔŋ maa tari ba.

² Bɛ daa pihila kuɣa sɔŋ[8] ni bɛ lihi nya zuliya awɛi ni pirigili la ni yɛn su tiŋgbɔŋ maa yaɣ’ shɛŋa polo kaman Yawɛ ni daa pun zali Musa shɛm.

³ Dama Musa daa pun piri Jɔɔdɛn Mɔɣili duli wulimpuhili polo tiŋgbɔŋ la tari zuliya ayi ni pirigili la. Amaa o daa bi pirigi tiŋgban’ shɛli ti Lɛvinim’ bɛn daa be bɛ ni.

⁴Dama (Yisifu zuliya daa pirigila buyi. Bɛna n-nyɛ: Manaasa mini Ifriim.) Bɛ daa bi pirigi tiŋgban’ shɛli ti Lɛvinima, naɣila tinsi ka bɛ daa ti ba ni bɛ beni m-pahi luɣ’ shɛŋa bɛ niɣi ni yɛn ŋubiri mɔri mini luɣ’ shɛŋa bɛ ni yɛn zaŋ bɛ binyara zali.

⁵Izraɛlnim’ daa piri tiŋgbɔŋ maa ti tab’ mi kaman Yawɛ ni daa pun yɛli Musa shɛm la.

⁶ Di saha ka Juda zuliya ninvuɣ’ shɛb’ daa ka Jɔshua sanna Giligal; ka Jɛfune ŋun daa nyɛ Kɛnizi nir’ la bia Kalɛb ŋun daa nyɛ bɛ ni yino la ti yɛli Jɔshua, “A mi Yawɛ ni daa pun yɛli Musa ŋun nyɛ Naawuni nir’ la m min’ a yɛla shɛm Kadɛshibarinia la.

⁷ N daa nyɛla yuun’ pihinahi nira saha shɛli Yawɛ dabili Musa ni daa tim ma ka n yi Kadɛshibarinia n-kana ti puɣisi nya tiŋgbɔŋ ŋɔ; ka daa ʒi di lahiba’ maŋli ti yɛl’ o.

⁸M mini ninvuɣ’ shɛb’ bɛn daa chaŋ chandi maa bɛn’ daa chɛ ka dabiɛm kpɛla Izraɛlnima, amaa ka man’ daa kul ʒe Yawɛ ŋun nyɛ n Naawuni ŋɔ yim.

⁹ Ka Musa daa lo alikauli dindali maa yɛli, ‘Yɛlimaŋli a ni ʒe Yawɛ ŋun nyɛ n Naawuni ŋɔ yim maa zuɣu, a napɔna ni no tiŋgban’ shɛli zuɣu ŋɔ ni ti leeg’ a min’ a bihi ni yɛn su shɛli sahakam.’

¹⁰Izraɛlnim’ ni daa be mɔɣu ni n-dari gindi saha shɛl’ la ka Yawɛ daa yɛli Musa lala maa. Amaa nyama, di saha maa zaŋ kana pumpɔŋɔ nyɛla yuun’ pihinahinaanu, ka o na kul chɛ ka m be. Ka nyama, n nyɛla yuun’ pihiniinaanu pumpɔŋɔ.

¹¹M mi na kul malila yaa zuŋɔ dabisili ŋɔ kaman n ni daa mali yaa shɛm saha shɛli Musa ni daa tim ma maa. Ka n na kul mali yaa din ni tooi chaŋ ti tuhi tɔbu.

¹²Dinzuɣu zaŋm’ zoya tiŋgbani din nyɛ Yawɛ ni daa yɛli shɛli yɛla dindali maa ti ma. Dama amaŋmaŋ’ daa wumya dindali maa ni Anakinima m-be nimaani birini tin’ kara ni. Di pa shɛli Yawɛ ni be n sani n-chɛ ka n kari ba yihi ni kaman o ni daa pun yɛli shɛm maa.”

¹³Ka Jɔshua daa suhi alibarika niŋ Kalɛb ni; ka zaŋ Hiburɔn ti ŋun’ Kalɛb ŋun daa nyɛ Jɛfune bia la ni o su li.

¹⁴Ka Hiburɔn daa leei Jɛfune ŋun daa nyɛ Kɛnizi nir’ la bia Kalɛb ni su shɛli hal ni zuŋɔ, o ni daa ʒe Yawɛ ŋun nyɛ Izraɛlnim’ Naawuni yim la zuɣu.

¹⁵Hiburɔn yuli piligu ni ha daa nyɛla Kiriatariba; Ariba ŋɔ n-daa nyɛ Anakinim’ ni wɔɣirili. Ka tɔbu daa chɛ tuhibu bɛ tiŋgbɔŋ maa ni.