Read Dagbani Jɔshua 15 Bible Online

Jɔshua 15 - Dagbani bible

Jɔshua 15

¹Bɛ ni daa zaŋ tiŋgban’ shɛli ti Juda zuliya piligu shee daa zaŋ kpala nudirigu polo m-mali hal ti paai Zin mɔɣu ni n-zaŋ lala hal ti paai Ɛdom tintariga.

²Nudirigu polo tintariga maa daa kpuɣila Teeku Kpiŋ la tariga mini di kulinol’ ni n-zaŋ kpa nudirigu polo.

³Di daa zaŋ kpala nudirigu polo maa hal ti paai Akirabim n-zaŋ nimaani hal ti paai Zin n-kul zaŋ kpa nudirigu polo maa hal ni Kadɛshibarinia n-zaŋ ti gari Hɛzirɔn m-mali ti paai Adda ŋ-ŋmaligi chaŋ Karika

⁴n-gari chaŋ hal ni Azimɔn n-zaŋ lala hal ti paai Ijipti kulibɔŋ m-mali hal ti paai di tariga teeku ni. Yi nudirigu polo tiŋgbani tariga n-yɛn bala.

⁵Ka wulimpuhili polo tiŋgbani tariga yɛn kpuɣila Teeku Kpiŋ shee zaŋ hal ni Jɔɔdɛn Mɔɣili noli. Ka nuzaa polo tiŋgbani tariga mi piligi Yalim Teeku maa ni Jɔɔdɛn Mɔɣili noli shee

⁶n-zaŋ hal ni Bɛtihɔgila n-yi nimaani zaŋ gari hal ti paai Bɛtaraba nuzaa polo. Ka di tariga maa zaŋ lala hal ni Rubin bia Bɔhan kuɣili la gbini;

⁷ka di tariga maa lan yi Akɔr Vinvamli ni n-zaŋ hal ti paai Dɛbir n-zaŋ kpa nuzaa polo nti ŋmaligi kpa Giligal polo yaɣ’ shɛli polo din tuhi Adumim din daa be vinvamli maa nudirigu polo la. Ka daa lan kpuɣi nimaani n-zaŋ hal ni Ɛnshɛmɛsh kulibɔna ni m-mali hal ti paai Ɛnrɔgɛl.

⁸Ka yi nimaani hal ti gari Hinnom Bidibisi Vinvamli ni zaŋ lab’ Jɛbusi nudirigu polo, Jɛrusalɛm m-bala n-lan kpuɣi nimaani hal ti du zo’ shɛli din do Hinnom Vinvamli wulinluhili polo la zaŋ lab’ Rɛfaim Vinvamli tariga nuzaa polo.

⁹Ka tintariga maa daa lan kpuɣi zoli maa zuɣu n-zaŋ hal ti paai Nɛfitɔa kulibɔna n-yi nimaani zaŋ hal ti paai tiŋ’ kar’ shɛŋa din ʒi Ɛfurɔn Zoli zuɣu la. Ka di daa lan yi nimaani n-chaŋ ti ŋmaligi n-zaŋ hal ti paai Baala bee Kiriatijiarim.

¹⁰Ka di daa zaŋ chaŋ ha nti lan gili Baala wulinluhili polo n-zaŋ hal ti paai Ɛdom zoya ni n-zaŋ chaŋ hal ti baɣisi Jiarim Zoli nuzaa polo gari bee din nyɛ Chɛsalɔn la, ka di lan zaŋ nimaani hal ti paai Bɛtishɛmɛshi n-gari chaŋ ti baɣisi Timna gari.

¹¹Ka lan zaŋ nimaani chaŋ hal ti du Ɛkurɔn nuzaa polo kuŋkuni. Ka di tariga maa daa ŋmaligi chaŋ hal ni Shikɛrɔn n-zaŋ nimaani hal ti baɣisi Baala Zoli gari, ka lan zaŋ nimaani hal ti paai Jabiniil; ka di daa naanyi kana ti paai di tariga teeku ni.

¹²Wulinluhili polo tiŋgbani maa tariga daa nyɛla Mɛditirɛniɛn Teeku la. Tintariga bɔbili maa n-daa gili Juda zuliya maa niŋ sunsuuni.

¹³Naawuni ni daa zali Jɔshua shɛm zuɣu daa chɛ ka o ŋmaai Juda zuliya la tiŋgbani yaɣ’ shɛli polo bɛ ni booni Hiburɔn la ti Jɛfune bia Kalɛb. Kiriatariba, di gbinni nyɛla Hiburɔn. (Ariba n-daa nyɛ Anakinim’ yaba)

¹⁴ Ka Kalɛb daa ŋme n-kari Anaki bidibis’ ata bɛn daa nyɛ: Shɛshai mini Ahiman ni Talimai bɛn daa nyɛ ŋun’ Anaki zuliya la bahi.

¹⁵Ka Kalɛb daa lan yi nimaani chaŋ ti lu Dɛbirinim’ zuɣu. Dɛbir tuuli yuli n-daa nyɛ Kiriatisɛfa.

¹⁶Ka Kalɛb daa yɛli, “Ninvuɣ’ so ŋun ŋme n-nyaŋ Kiriatisɛfanim’ ka deei bɛ tiŋ’ maa, n ni zaŋ m bipuɣiŋga Akisa ti o paɣipini.”

¹⁷Ka Otiniɛl ŋun daa nyɛ Kalɛb tizo Kɛnaz bidibiga la daa chaŋ ti tuhi deei tiŋ’ maa; ka Kalɛb daa shiri zaŋ o bipuɣiŋga Akisa maa ti o ka o niŋ o paɣa.

¹⁸Bɛ ni daa ti kulisi Akisa na dahin’ shɛli, ka Otiniɛl daa kpam’ o jaande ni o suhim’ o ba tiŋgbani palo. Ka Akisa daa ti sheeg’ o buŋ’ zuɣu na; ka Kalɛb bɔh’ o, “Bɔ ka a bɔra?”

¹⁹Ka o garigi yɛl’ o, “Tim ma pini. A ni zaŋ Nɛgɛb tiŋgbani n-ti ma la zuɣu, tim ma kulibɔna din kom zɔri gba pahi.” Ka Kalɛb daa zaŋ zuɣusaa polo mini naɣiliŋga ni kulibɔna ti o pahi.

²⁰Juda zuliya ni daa deei tiŋgban’ shɛli ni bɛ su li m-bɔŋɔ.

²¹Juda zuliya ni daa su fɔntiŋ’ kar’ shɛŋa daa bela nudirigu polo ha zaŋ kpa Ɛdom tintariga polo. Tinsi maa n-nyɛ Kabiziil mini Ɛda ni Jagur

²²ni Kina ni Dimɔna ni Adada

²³ni Kɛdɛshi ni Hazɔr ni Itinan

²⁴ni Zif ni Tɛlɛm ni Biilɔt

²⁵ni Hazɔrihadata ni Kiriɔtihɛzirɔn (bee Hazɔr)

²⁶ni Amam ni Shɛma ni Molada

²⁷ni Hazarigada ni Hɛshimɔn ni Bɛtipɛlɛt

²⁸ni Hazarishual ni Bɛrishiiba ni Biziɔtia

²⁹ni Baala ni Iim ni Ɛzɛm

³⁰ni Ɛlitolad ni Chɛsil ni Hɔrima

³¹ni Zikilag ni Madimanna ni Sansanna

³²ni Lɛbaɔt ni Shilihim ni Ain ni Rimɔn: ka di zaa kalinli yiɣisi fɔntiŋ’ kara pihitayinika m-pahi di tiŋkpansi zuɣu.

³³Fɔntiŋ’ kar’ shɛŋa din daa be zolɔna ni n-nyɛ: Ɛshitaol mini Zɔra ni Ashina

³⁴ni Zanɔa ni Ɛnganim ni Tapua ni Ɛnam

³⁵ni Jarimut ni Adulam ni Soko ni Azɛka

³⁶ni Shaaraim ni Aditaim ni Gɛdɛra ni Gɛdɛrɔtaim: ka di zaa kalinli yiɣisi fɔntiŋ’ kara pinaanahi m-pahi di tiŋkpansi zuɣu.

³⁷Tin’ shɛŋa din yuya dolina ŋɔ gba daa beni. Dina n-nyɛ: Zɛnan mini Hadasha ni Migidaligad

³⁸ni Dilian ni Mizipa ni Jokitiɛl

³⁹ni Lakishi ni Bɔzikat ni Ɛgilɔn

⁴⁰ni Kabɔn ni Lamam ni Chitilishi

⁴¹ni Gɛdɛrɔt ni Bɛtidagɔn ni Naama ni Makɛda: ka di zaa kalinli yiɣisi fɔntiŋ’ kara pinaayɔbu m-pahi di tiŋkpansi zuɣu.

⁴²Tin’ shɛŋa din yuya dolina ŋɔ gba daa beni. Dina n-nyɛ: Libina mini Ɛta ni Ashan

⁴³ni Ifita ni Ashina ni Nɛzib

⁴⁴ni Kɛila ni Akizib ni Marɛsha ka di zaa kalinli yiɣisi fɔntiŋ’ kara awɛi m-pahi di tiŋkpansi zuɣu.

⁴⁵Ɛkurɔn mini di fɔndi ni di tiŋkpansi gba daa beni Ɛkurɔn zaŋ hal ti paai Mɛditirɛniɛn Teeku noli daa nyɛla

⁴⁶fɔntiŋ’ kara mini fɔndi zaa din baɣi Ashidɔd la m-pahi di tiŋkpansi zuɣu.

⁴⁷Ashidɔd mini di fɔndi ni di tiŋkpansi ni Gaza mini di fɔndi ni di tiŋkpansi daa zaŋmi hal ti paai Ijipti kulibɔŋ mini Mɛditirɛniɛn Teeku noli tintariga la.

⁴⁸Zoya zuɣu tinsi mi n-daa nyɛ: Shamir mini Jatir ni Soko

⁴⁹ni Danna ni Kiriatisɛfa (dina n-nyɛ Dɛbir)

⁵⁰ni Anab ni Ɛshitɛmo ni Anim

⁵¹ni Goshɛn ni Holɔn ni Gilo: ka di zaa kalinli yiɣisi fɔntiŋ’ kara piniyini m-pahi di tiŋkpansi zuɣu.

⁵²Tin’ shɛŋa din pahi n-daa nyɛ Arab mini Duma ni Ɛshan

⁵³ni Janim ni Bɛtitapua ni Afɛka

⁵⁴ni Humta ni Kiriatariba (Hiburɔn m-bala) ni Ziɔr: ka di zaa kalinli yiɣisi fɔntiŋ’ kara awɛi m-pahi di tiŋkpansi zuɣu.

⁵⁵Ka tin’ shɛŋa din pahi n-daa lan nyɛ: Maɔn mini Kamɛl ni Zif ni Juta

⁵⁶ni Jɛziriil ni Jokidiyam ni Zanɔa

⁵⁷ni Kain ni Gibia ni Timna: ka di zaa kalinli yiɣisi fɔntiŋ’ kara pia m-pahi di tiŋkpansi zuɣu.

⁵⁸Ka tin’ shɛŋa din gba lan pahi n-daa nyɛ: Halihul mini Bɛtizur ni Gɛdɔr

⁵⁹ni Maarat ni Bɛtanɔt ni Ɛlitɛkɔn: ka di zaa kalinli yiɣisi fɔntiŋ’ kara ayɔbu m-pahi di tiŋkpansi zuɣu.

⁶⁰Kiriatibaal (Kiriatijiarim m-bala) mini Raba gba daa beni: di daa nyɛla fɔntiŋ’ kara ayi m-pahi di tiŋkpansi zuɣu.

⁶¹Tin’ shɛŋa din gba daa be yɔɣu ni la n-daa nyɛ: Bɛtaraba mini Midin ni Sɛkaka

⁶²ni Nibishan ni Yalim Tiŋ’ la ni Ɛngɛdi: ka di zaa kalinli yiɣisi fɔntiŋ’ kara ayɔbu m-pahi di tiŋkpansi zuɣu.

⁶³ Amaa ka Judanim’ daa bi tooi kari Jɛbusinim’ bɛn daa pun be Jɛrusalɛm la bahi. Dina n-chɛ ka Jɛbusinim’ mini Judanim’ na kul laɣim be Jɛrusalɛm hal ni zuŋɔ.