Read Dagbani Jɔshua 16 Bible Online

Jɔshua 16 - Dagbani bible

Jɔshua 16

¹Yisifu zuliya tiŋgbani daa kpuɣila Jɔɔdɛn Mɔɣili ni chaŋ ti baɣisi Jɛriko n-zaŋ hal ti paai Jɛriko wulimpuhili polo kulibɔna n-yi nimaani mali hal ti paai tiŋgban’ nɛl’ la. Ka di daa zaŋ Jɛriko maa hal ti paai zoya ni tinsi la n-zaŋ lala hal ti paai Bɛtɛl.

²Ka di daa zaŋ Bɛtɛl maa hal ni Luz n-gari chaŋ hal ti paai Atarɔt din nyɛ Arikinim’ tiŋgban’ la.

³Ka daa lan zaŋ nimaani hal ti paai Jafilɛtinim’ tiŋgban’ ni n-zaŋ lala hal ti paai Bɛtihɔrɔnnim’ tiŋgbani din daa be zolɔŋni la m-mali lala hal ni Gɛza n-yi nimaani chaŋ ti naai Mɛditirɛniɛn Teeku ni.

⁴Yisifu zuliya bɛn nyɛ Ifriim mini Manaasa niriba bɛn be Wulinluhili polo daa deei tiŋgbani ŋɔ ka di leei bɛ dini.

⁵Bɛ ni daa zaŋ tiŋgban’ shɛli ti Ifriim zuliya kaman bɛ daŋ niriba ni nyɛ shɛm m-bɔŋɔ: bɛ tiŋgbani maa piligu shee daa kpuɣila Atarɔtada wulimpuhili polo n-zaŋ hal ni Bɛtihɔrɔn Duli polo

⁶n-yi nimaani n-zaŋ hal ti paai Mɛditirɛniɛn Teeku ni. Ka Mikimɛtat daa be bɛ nuzaa polo; ka bɛ tintariga bɔbili daa zaŋ chaŋ wulimpuhili polo ha nti ŋmaligi kpa Taanatishilo polo n-chaŋ ti gari di zuɣu wulimpuhili polo n-zaŋ hal ti paai Janɔa.

⁷Ka daa yi Janɔa maa m-mali hal ti paai Atarɔt mini Naara n-zaŋ hal ni Jɛriko n-kul mali lala hal ti paai di tariga Jɔɔdɛn Mɔɣili ni.

⁸Ka bɛ tiŋgbani maa zaŋ kpa wulinluhili polo mi daa kpuɣi Tapua m-mali hal ti paai Kana kulibɔŋ n-zaŋ lala hal ti paai di tariga Mɛditirɛniɛn Teeku ni. Dina n-nyɛ bɛ ni daa zaŋ tiŋgban’ shɛli ti Ifriim min’ o daŋ niriba ni bɛ su la

⁹m-pahi fɔn shɛŋa mini tiŋkpan’ shɛŋa din daa be Manaasa min’ o zuliya niriba tiŋgban’ ni, ka bɛ daa lee zaŋ li n-ti Ifriim min’ o zuliya niriba maa la.

¹⁰ Amaa ka Ifriim zuliya niriba maa daa lee bi kari Keenannim’ bɛn daa be Gɛza, dina n-chɛ ka Keenannim’ mini Ifriim zuliya niriba maa na kul laɣim’ be hal ni zuŋɔ; amaa ka bɛ lee chɛ ka Keenannim’ maa tumdi dabitim tuma tiri ba.