Read Dagbani Jɔshua 17 Bible Online

Jɔshua 17 - Dagbani bible

Jɔshua 17

¹Bɛ daa ŋmaai tiŋgban’ shɛli ti Yisifu bituuli Manaasa zuliya niriba shɛba. Makiri daa nyɛla Manaasa bidib’ kpɛma; ka Makiri mi bidib’ kpɛm’ yuli n-daa booni Giliad; Makiri daa nyɛla tɔbutuhiri’ biiŋa dinzuɣu ka bɛ daa zaŋ Giliad mini Bashan ti o.

²Ka bɛ daa ŋmahi tiŋgbani maa ti Manaasa zuliya bɛn kpalim la kaman bɛ daŋ niriba ni nyɛ shɛm. Bɛ ni daa ŋmahi li ti shɛba n-nyɛ: Abiɛza mini Hɛlɛki ni Asiriɛl ni Shɛkɛm ni Hɛfa ni Shɛmida. Yisifu bia Manaasa zuliya niriba bɛn daa nyɛ dɔbba ka nyɛ bɛ daŋ maa ni dɔɣirikpamba m-bala.

³Manaasa daa mali bidibiga ka o yuli booni Makiri, ka o gba daa mali bidibiga ka o yuli booni Giliad, ka o gba daa mali bidibiga ka o yuli booni Hɛfa; ka Hɛfa gba mali bidibiga ka o yuli booni Zɛlɔfɛhad; ka Zɛlɔfɛhad ŋun’ daa bi dɔɣi bidibisi; amaa ka lee mali bipuɣins’ anu. Bɛ yuya n-nyɛ: Mahila mini Nɔa ni Hɔgila ni Milika ni Tiriza.

⁴ Ka paɣiba ŋɔ daa ti ka maligumaana Ɛliɛza mini Nan bia Jɔshua ni Izraɛl kpamba sanna ti yɛli ba, “Yawɛ daa yɛli Musa ni o tim’ ti ti gba tiŋgbani m-pahi ti tizɔdɔbba la dini zuɣu.” Dinzuɣu Yawɛ ni daa yɛli shɛm maa zuɣu, ka bɛ daa ti ba tiŋgbani m-pahi bɛ tizɔdɔbba maa dini zuɣu.

⁵Dina n-chɛ ka Manaasa zuliya niriba maa daa deei tiŋgbana taribu maa bupia m-pahi Giliad mini Bashan din daa be Jɔɔdɛn Mɔɣili duli din’ la polo la zuɣu;

⁶dama Manaasa bipuɣinsi daa deei tiŋgbana pah’ o bidibisi zuɣu. Ka bɛ daa zaŋ Giliad ti Manaasa zuliya niriba bɛn kpalim la.

⁷Manaasa zuliya niriba tiŋgbani maa daa zaŋmi hal ti paai Asha mini Mikimɛtat din be Shɛkɛm wulimpuhili polo la. Ka di tintariga bɔbili daa zaŋ kpa nudirigu polo m-mali hal ti paai Ɛntapuanima.

⁸Manaasa zuliya niriba n-daa su Tapua tiŋgbani maa, amaa Tapua fɔŋ din daa ʒi Manaasa zuliya niriba tintariga la dina, Ifriim zuliya niriba n-daa su li.

⁹Ka Manaasa zuliya niriba tintariga bɔbili maa daa zaŋ nimaani n-gari chaŋ hal ti paai Kana kulibɔŋ. Ka fɔŋ kara din daa be nimaani zaŋ lab’ kulibɔŋ maa nudirigu polo daa bela Manaasa zuliya niriba tiŋgban’ ni, amaa ka Ifriim zuliya niriba lee su li. Ka Manaasa zuliya niriba tintariga bɔbili maa daa zaŋ kpa kulibɔŋ maa nuzaa polo m-mali lala hal ti paai di tariga Mɛditirɛniɛn Teeku ni.

¹⁰Ifriim zuliya niriba daa sula nudirigu polo, ka Manaasa zuliya niriba mi su nuzaa polo ka Teeku do bɛ sunsuuni n-nyɛ bɛ tintarisi bolo. Asha daa bela nuzaa polo ka Isaka mi be wulimpuhili polo.

¹¹Isaka mini Asha tiŋgbana maa ni Manaasa zuliya niriba n-daa su fɔn shɛŋa mini tiŋkpan’ shɛŋa din be nimaani. Tinsi maa n-nyɛ: Bɛtishɛan mini di tiŋkpansi ni Ibiliam mini di tiŋkpansi ni Dɔrinim’ mini di tiŋkpansi ni Ɛndɔnim’ mini di tiŋkpansi ni Taanaknim’ mini di tiŋkpansi ni Mɛgidɔnim’ mini di tiŋkpansi; ka din pah’ ata n-nyɛ, Nafat.

¹²Amaa ka Manaasa zuliya niriba maa daa bi tooi kari tinsi maa nima; ka Keenannim’ maa daa kul kpalim be tinsi maa ni.

¹³ Ka hal Izraɛlnim’ ni daa ti niŋ kpiɔŋ, bɛ daa bi kari Keenannim’ maa zaa, amaa ka daa naɣ’ lee muɣisiri ba mi ka bɛ tumdi tuma tiri ba.

¹⁴Ka Yisifu zuliya la daa ti bɔhi Jɔshua, “Bɔ n-niŋ ka a zaŋ tiŋgbani maa yaɣ’ yini polo din nyɛ din bi galisi ti ti? Yawɛ ni niŋ alibarika niŋ ti ni zuɣu, ti galisiya pam.”

¹⁵Ka Jɔshua garigi yɛli ba, “Yi yi galisi pam, ka Ifriim zuliya niriba zoya tiŋgban’ la pɔri ka bi saɣi ya, yin’ chamiya Pɛrizinim’ mini Rɛfaimnim’ tiŋgban’ ni yɔɣu la ni nti ŋma nyɔŋ ʒini.”

¹⁶Ka bɛ yɛl’ o, “Zoya tiŋgbani maa ku saɣ’ ti, ka Keenannim’ mi ʒi tintan’ ni, ka mali kuriti chɛchɛbunsi. Bɛ ni shɛb’ bɛn be Bɛtishɛan mini di tiŋkpansi ni bɛn be Jɛziriil Vinvamli ni la zaa mal’ li mi.”

¹⁷Ka Jɔshua yɛli Yisifu zuliya bɛn nyɛ Ifriim mini Manaasa niriba maa, “Yi shiri galisiya pam, ka mali kpiɔŋ; ka di simdi ni yi mali tiŋgbani yaɣ’ bɔbili.

¹⁸Ka zoya tiŋgban’ la ni kul nyɛ nyɔŋ la zaa yoli, yi ni tooi ŋma n-neei li ka di leei yi dini di piligu shee zaŋ ti kpa di tariga. Ka Keenannim’ maa ni kul mali kuriti chɛchɛbunsi ka mali kpiɔŋ la zaa yoli, yi ni tooi kari ba.”